ⅬⅩⅩⅩⅨ
Ogoteera kw’ogotogia Nyasae ekero egesaku ki’Abaisraeli kere nemechando
(Ogoteera kw’Etani Omoezara)
Ⅰ Aye Omonene,
goika kare na kare ninterere obwanchani bwao bogendererete botambe,
nindarie obwegenwa bwao ase ebiaare bionsi.
Ⅱ Ninkwane ng’a obwanchani bwao mbogendererete botambe
bwakorirwe kobao goika kare na kare;
aaria igoro nigo okong’etie obwegenwa bwao.
Ⅲ Aye nigo gwateebete, “Nakorire okobwatana nomochore one,
narire eira y’ogotiana ase Daudi omosomba one.
Ⅳ 89:4: 2 Sam 7:12-16; 1 Amg 17:11-14; Zab 132:11; Ogok 2:30Ninkore oroiboro rwao rogenderere koba ne chinguru botambe,
nintenenie ekerogo kiao ki’obonene kebe ase ebiaare bionsi.”
Ⅴ Aye Omonene, igoro nchitogie emeremo yao y’ogokumia,
naende obwegenwa bwao boigo ase omosangererekano bw’abachenu bao.
Ⅵ Inee! Ning’o ore agwo igoro oranyare koreng’anigwa n’Omonene?
Nkereki ase ebitongwa bia Nyasae kenga buna ere?
Ⅶ Ere nigo are Nyasae oirokire ase ekegambero ki’abachenu,
bonsi abamoetanaine nigo bamoirogete.
Ⅷ Aye Omonene, Nyasae bw’Emeganda,
ning’o obwate okobua buna okwao?
Ee, Omonene, obwegenwa bwao nigo bogoetanaine.
Ⅸ Aye nigo okogambera enyancha ekoimokerera igoro;
ekero emerindo yaye ekoimokerera igoro,
aye nigo okoyotoereria.
Ⅹ Aye nigo gwasenyentete enchoka eria Rahabu*89:10 Rahabu: rora Ayubu 9:13 ekaba buna egetondo,
nokoboko kwao kore ne chinguru ogasiarera ababisa bao.
Ⅺ Igoro neyao, na ense neyao,
ense na ebinto bionsi bireo naye kwabitongete.
Ⅻ Naye gwatongete sugusu na Irianyi;
egetunwa gia Tabori, na ekia Herimoni, nigo bigotogia erieta riao nomogooko.
ⅩⅢ Okoboko kwao nigo kore nokobua,
ee, nigo kore ne chinguru;
okoboko kwao gw’okorio nigo koimokererete igoro.
ⅩⅣ Oboronge na ekeene nabio bire oboroso bw’okogamba kwao,
obwanchani bwa kare na kare, na obwegenwa, nigo bitang’aine bosio bwao.
ⅩⅤ Mbarenomogooko abanto abwo bamanyete goaka eriogi ri’omogooko asore,
abwo bagotaara ase oborabu bokorwa ase obosio bwao aye Omonene.
ⅩⅥ Abwo nigo bagochengera erieta riao omobaso boira;
na goetera ase oboronge bwao nigo bakoimokererigwa igoro.
ⅩⅦ Aye nigo ore obonene bwabo ne chinguru chiabo;
ase engencho y’ogwancherwa kwao ching’unchara chiaito chiakinire.
ⅩⅧ Oyore enguba yaito n’oyore Omonene,
ee, omorwoti oito noyo bw’Oyore Omochenu bw’Abaisraeli.
Nyasae okoriera Daudi chiira
ⅩⅨ Kare ngwakwanete nabegenwa bao ase okorora, okabateebia,
“Narentire ogokonywa goetera ase oyomo ore nokobua,
naimokereirie igoro oyomo nachorire korwa ase egati y’abanto.
ⅩⅩ 89:20: a 1 Sam 13:14; Ogok 13:22; b 1 Sam 16:12Nanyorire Daudi, omosomba one,
namoakire amaguta aane amaachenu ase okomwatanana ase ’nde.
ⅩⅪ Okoboko kwane nkobe amo nere botambe,
ee, okoboko kwane nkomobeke chinguru.
ⅩⅫ Ababisa tibakomobwata mobosokano,
na abakori amabe tibakomochanda.
ⅩⅩⅢ Ninsenyente ababisa baye ase obosio bwaye,
abwo bamogechete nimbae amaakwa.
ⅩⅩⅣ Obwegenwa na obwanchani bwane bogendererete botambe mbibe amo nere;
ase erieta riane orogunchara rwaye ndokine.
ⅩⅩⅤ Nimbeke enyancha inse y’okoboko kwaye,
ne chindooche nchibe inse y’okoboko kwaye gw’okorio.
ⅩⅩⅥ Ere nabe okorera ase ’nde na goteeba; Aye naye Tata,
naye Nyasae one, na Egetare kiane ki’ogotooreka.
ⅩⅩⅦ 89:27: Okom 1:5Erio inche nimokore abe omwana one omotangi,
abe omorwoti ore omonene kobua abarwoti bande bonsi b’ense.
ⅩⅩⅧ Obwanchani bwane botari koera nimoborendere kare na kare,
na okobwatana kwane kw’ogotianania nkorete nere ngotenene bokong’u.
ⅩⅩⅨ Ninkore oroiboro rwaye rogenderere kobao botambe,
na ekerogo kiaye ki’obonene nkegenderere kobao buna igoro erabe ereo.
ⅩⅩⅩ “Onye abanto b’ororeria rwaye bagochia gotiga amachiiko aane,
bange koigwera emeroberio yane echiikire,
ⅩⅩⅪ na onye bagochia gosaria aya nachiikire.
Bange kobwata amachiiko aane,
ⅩⅩⅫ rirorio nimbae egesusuro, mbaake nenyimbo ase engencho y’ogosaria kwabo,
na mbang’wanie ebiranya ase engencho y’ebibe biabo.
ⅩⅩⅩⅢ Korende obwanchani bwane bogendererete botambe tinkoborusia asare,
tingotiga koba omwegenwa asare.
ⅩⅩⅩⅣ Tinkonyara gosaria okobwatana kwane kw’ogotianania,
gose tinkoonchora ring’ana nakwanire nomonwa one.
ⅩⅩⅩⅤ “Ase obochenu bwane natianire rimo ng’a
tingokwana oborimo ase Daudi.
ⅩⅩⅩⅥ Oroiboro rwaye ndogenderere kobao botambe,
na ekerogo kiaye ki’obonene nkegenderere kobao,
buna erioba rirabe rireo ase obosio bwane.
ⅩⅩⅩⅦ Nkegenderere kobao buna omotienyi,
oborori obwo bwa igoro nigo bore obwegenwa.”
Okweumia ase engencho y’okobugwa kw’omorwoti
ⅩⅩⅩⅧ Korende bono, aye Omonene kwangire omoakwa amaguta oo,
kwabeire nendamwamu enene asare.
ⅩⅩⅩⅨ Bono gwatigire okobwatana kwao kw’ogotianania gwakorete nomosomba oo,
kwarutire egutwa yaye y’obogambi inse kwayemwamirie.
ⅩⅬ Gwatagoire chindwaki chiaye chionsi
gwatagoire amaagacho aye onsi are amakong’u abeire amatombe.
ⅩⅬⅠ Abanto bonsi bagoetera aase agwo nigo bakomosakora,
abamenyete ang’e nere nigo bakomochecheria.
ⅩⅬⅡ Abwo bakomochanda aye kwabaeire chinguru chinyinge,
na kwagerire ababisa baye bonsi bagoke.
ⅩⅬⅢ Kwairanirie omoro oye bw’esegi,
tori komoa chinguru chi’okorwana esegi.
ⅩⅬⅣ Kwamourire obonene bwaye,
gwaakeire inse ekerogo kiaye ki’obogambi.
ⅩⅬⅤ Kwanachire amatuko aye ay’obosae abeire ameng’e,
boigo kwamotubire nobosooku obonge mono.
Ogosaba gw’okonyora ogotoorigwa
ⅩⅬⅥ Aye Omonene, ngoika ririri oragenderere kwebisete?
Inee! Ngoika ririri endamwamu yao eragenderere gwoka buna omorero?
ⅩⅬⅦ Aye Omonene, inyora buna obogima bwane bore obweng’e,
nigo gwatongete Mwanyabaanto bonsi bakwe igo.
ⅩⅬⅧ Monto ki orabe moyo otakwe?
Ning’o oranyare gotooria omoyo oye korwa ase chinguru chi’amakweri?
ⅩⅬⅨ Omonene, ng’ai obwanchani bwao bwa kare na kare bore,
obwo ase obwegenwa bwao kwarierete Daudi eira?
Ⅼ Aye Omonene, ing’inyore inche omosomba oo buna ingokorerwa echeche;
nigo ndemereretie emerumi y’abanto abange.
ⅬⅠ Omonene, ababisa bao nigo bagonchecheria,
ee, nigo bagochecheria amabarato ’omoakwa amaguta oo.
ⅬⅡ Omonene atogigwe kare na kare!
Amina. Amina.