Ⅰ Aye Omonene ogoakana egesiomba,

aye Nyasae ogoakana egesiomba, oorokia oborabu bwao.

Ⅱ Aye omonachi ebiina bw’ense, imoka

oe abanto abaenenu eng’eria koreng’ana buna ogokora kwabo kore!

Ⅲ Omonene, ngoika ririri abanyabibe baragenderere gwetogia?

Ngoika ririri?

Ⅳ Abakori amabe bonsi nigo bagwetogia,

nigo bagokwana‐kwana amang’ana amabe.

Ⅴ Aye Omonene, abwo nigo bagosamunyorana abanto bao,

na gochanda abanto bare omwando oo.

Ⅵ Nigo bagoita ababoraka na abamenyi,

ne chintakana nigo bagochiita;

Ⅶ erio bateba, “Omonene tari korora amang’ana ayio,

Nyasae o Yakobo tari komanya ayio.”

Ⅷ Inwe abamotamanyeti gento, kabe nokomanya!

Inwe abariri, ndiriri morabe abang’aini?

Ⅸ Inee! Oyo otongete amato, tari koigwa?

Ere oyo otongete amaiso, tari korora?

Ⅹ Oyo okorongeyia ebisaku, tari korua ebisusuro?

Ere nigo akworokereria Mwanyabaanto bamanye obong’aini.

Ⅺ 94:11: 1 Abakr 3:20Omonene nigo amanyete ebirengererio bia Mwanyabaanto,

ng’a nigo bire bosa.

Ⅻ Nasesenirie omonto oyio aye Omonene okorongeyia

na komworokereria amachiiko ao,

ⅩⅢ naende kwamoa ogotimoka ase amatuko ’emechando,

goika ekero abakori amabe baraaremerwe chimbeera chiabo.

ⅩⅣ Omonene tagotuguta abanto baye,

takonyara gotiga abwo bare omwado oye.

ⅩⅤ Ebiina mbinachwe ase oboronge naende,

na abanto bonsi bare ne chinkoro chindonge mbabobwatie.

ⅩⅥ Ning’o oratenene andwanerie abakori amabe?

Ning’o oratenene ankonye korwa ase abakori ebibe?

ⅩⅦ Onye Omonene atankonyete,

omoyo one nigo orenge gocha kobeera ase obokiriru bw’amakweri bwango.

ⅩⅧ Ekero naroche ng’a natererigwe,

aye Omonene, obwanchani bwao bwa botambe nigo bwansiirete tinagwa.

ⅩⅨ Ekero enkoro yane ere nogwechanda okonge,

okoremia kwao okonge nigo gokogokia omoyo one.

ⅩⅩ Inee! Abanto b’ekegambero egekorekanu mbabwatane naye?

Abwo nigo bakorenta obokong’u ase okoonchorana amachiiko.

ⅩⅪ Nigo bakoumokera amo omoyo bw’oyore omonyaboronge,

banachera oyotari nokomocha ekiina ki’ogokwa.

ⅩⅫ Korende Omonene obeire egekengero kiane egekong’u,

ee, Nyasae one negetare ngotamera.

ⅩⅩⅢ Ere nabae egesusuro ase engencho y’ebibe biabo,

na abasirie ase engencho y’ogosaria kwabo;

ee, Omonene, Nyasae oito, nabasirie kegima.