Ⅰ Ere oyio orenge omonene ase abamura bamwabo na ogwetogeria kwa abanto baye, nere Simioni Omokuani omonene mosinto bwo Onia. Ase obogima bwaye akayeagaacha Hekalu boyia naboigo koyeagaachera orwaki. Ⅱ Akabeeka chinyasi ibere chi’orobago rwe Hekalu. Ⅲ Ase engaki yaye nario egesima kia amaache kiaremetwe, amaache amange ang’a buna enyaancha akagiterwa. Ⅳ Ere akarengereria buna aranyare kobakoonya abanto tibasira, akayokong’ia omochie na koyogitera korwa ase obosagaani. Ⅴ Rora, ere nigo asigetwe mono na goetananwa na abanto, kera ekero arenge korwa ase agwo aachenu. Ⅵ Ere nigo arenge buna eng’enang’eni ya mambia ere ase amare, nigo arenge buna omotienyi orabete. Ⅶ Nigo arenge buna okoraba kwomobaso igoro ase Hekalu y’Omonene, buna omokubinyongo orabete korwa ime yamare. Ⅷ Nigo arenge buna ogosiicha kw’eritang’ani kwa amaua yobwanchani, buna ebisiicha biamatoke a rooche, buna ogoseboka kw’emecharake igoro ase egetunwa kia Lebanoni ase chingaki chiegurugura. Ⅸ Buna ekoroso ime ase egesagusero kiaye, buna ekebekerero gi’etaabu esibirie kegima, gechabeire na kera amagena amaya akomeka meka. Ⅹ Nigo arenge buna Omozeituni bwamire amatunda, buna ekerobo egetambe gekinete goika ase amare. Ⅺ Ere ekero arenge kobeeka chianga chiaye chiesiko, ekero arenge kogenda ase egesasiimero egechenu, ekero abegete chianga chiaye boikeranu, nigo arenge gokora ekeoreri gie Hekalu komenta koba nobonene kobua. Ⅻ Ekero abakuani barenge komoa ebitari biaye bi’ekeng’wanso, ekero ere ateneine ange negesasiimero, oetananire na abamwabo buna egutwa, ere nigo arenge buna omocharake omorere igoro ase egetunwa kia Lebanoni. Abamwabo nigo barenge komoonchokana buna emekendo nechinsagia chiaye. ⅩⅢ Ababiare bonsi ba Aroni, ekero babeekire chianga chiabo chi’obonene, ekero babogoretie ebing’wanso biokomorwera Omonene ase amaboko abo, ekero barabwo batenenire ase obosio bw’omosangererekano bwonsi bw’Abaisraeli. ⅩⅣ Ekero akorire emeremo yobokoreri ase egesasiimero, koroberia ebing’wanso bi’Omonene, Omobui, ⅩⅤ akarambora okoboko kwaye na kobogoria egekombe, agaitera edivai inse ase oboroso bw’egesasiimero, eyio ere ekeng’wanso giokonyuugwa gekomogokia Omonene Omorwoti bwa abanto bonsi. ⅩⅥ Erio ababiare ba Aroni, bagaaka eriogi, na kobugia egetuureri, ebituureri biabo biroisirie korwa ase efeta, bakoraria okobao kw’Omonene. ⅩⅦ Erio abanto bonsi ase obomo bakaayerera, bagekumba na komosasiima Omonene obo, Omonene Nyasae, Omobui Omonene kobua. ⅩⅧ Abateeri boigo bakamotogia ase amariogi abo, ase chingeero chingiya na amariogi areng’anaine buya. ⅩⅨ Erio abanto bakamogaramera Omonene kegima, bakamosaba ere omonyene amaabera goika omoroberio bw’okomosasiima Omonene okaera. Naboigo banyaarete gokora okomosasiima ere. ⅩⅩ Sioni akarua aroro, akaimokereria amaboko aye igoro ase omosangererekano bwonsi bwa Abaisraeli, erio koraria ogosesenigwa kw’Omonene korwa ase omonwa oye omonyene, na korimokereria erieta riaye igoro. ⅩⅪ Barabwo bagatung’ama naende eria kabere, konyora ogosesenigwa korwa ase Omonene ere oria ore igoro ase bionsi. ⅩⅫ Bono tiga tomotogie Nyasae o bonsi, ere oria ogokora amanene kera aase; ere oyio okorenda obogima bwaito gochaakera okoiborwa na gotokorera koreng’ana n’amaabera aye. ⅩⅩⅢ Aye otoe omogooko bwe chinkoro chiaito, na gotorentera omorembe ase amatuko yobomenyo bwaito ase Israeli buna yarenge chingaki chia kare. ⅩⅩⅣ Amabera aye amenye ase tore; ere atotorie ase amatuko aito. ⅩⅩⅤ Mbireo ebisaku bibere inche ngechete, boigo egesaku kiagatato tigeisaini korokwa egesaku. ⅩⅩⅥ Abamenyi b’egetunwa gia Edomu naboigo Abafilisiti, na abanto baria abariri bamenyete Shekemu. ⅩⅩⅦ Inche nariikire ime ase egetabu eke amorokererio y’obong’aini na obomanyi. Ninche Yoshua mosinto o Sira omwana bw’Eliezeri korwa Yerusalemu, inche ase enkoro yane nigo ing’ichire obong’aini. ⅩⅩⅧ Nasesenirie omonto okoyarengereria amang’ana ayio; nere oria orayabeeke ase enkoro yaye nabe nobong’aini. ⅩⅩⅨ Ekiagera ere oyorayakore nakong’igwe ase engaki etakoera, ekiagera okomoiroka Omonene nakwo obogima.