Ⅰ Aye ore omoseera kobua abakungu bonsi,

ng’ai omwanchi oo achiire?

Omwanchi oyio oo, ng’ai aonchokire gochia?

Togende amo naye tomorigie.

Ⅱ Omwanchi one mogondo agenda,

ogendire ase ebigondo bi’ebimeri bi’ebinsari.

Ogendire korisia riicho riaye ase emegondo,

naende nao akare kona‐gosangereria ebisicha ebiya.

Ⅲ Inche nigo inde oyo bw’omwanchi one, nere nigo are oyone;

nigo akorisia riicho riaye agwo ase ebisicha ebiya bire.

Ⅳ Aye omwanchi one, nigo ore omoseera buna omochie o Tirisa;

nigo ore bw’okogokia buna Yerusalemu,

na oyo bw’okoirokia buna abasikari babogoretie ebendera.

Ⅴ Onchora amaiso ao otige kondigereria,

ekiagera ambuire;

etukia yao nigo enga buna riicho rie chimbori,

chigotirimboka ase ebitirimboko bia Gileadi.

Ⅵ Amaino ao nigo anga riicho rie ching’ondi chiabeeri chianachirwe amarionya,

chiarure gosibigwa chiarabire se,

chionsi nigo chikobiara chisare,

na manwa ende teri egokwa.

Ⅶ Chinsea chiao nigo chitubire ime ase egietubo kiao,

nigo chinga buna chimbaara chie ritunda rikorokwa rikomomanga.

Ⅷ Mbareo abakungu chiting’ana chi’omorwoti emerongo etano nomo,

na abakungu ba sere‐sere emerongo etano na etato,

boigo mbareo abaiseke abekungi abange batari kobareka.

Ⅸ Korende oyomo bweka nere omwanchi one, nere riruma riane omoikeranu.

Ere nigo are omwana omomoima ng’ina abwate,

oyo omoiborete nigo amwanchete.

Abaiseke abwo bakamorora, bakamoroka oyosesenirie;

abakungu baria chiting’ana na baria ba sere‐sere boigo bakamorora, bakamotogia.

Ⅹ Ning’o oyio okorigereria buna erioba rigotonga mambia?

Ning’o oyio ore omuya buna omotienyi,

na okomeka‐meka buna erioba?

Ere nigo are oyo bw’okoirokia buna abasikari babogoretie chibendera chiabo.

Ⅺ Inche nigo natirimbogete gochia ase omogondo bw’emete enga buna emelozi;

nkagenda ase rikura korora ebimeri ebiya buna bikoreereta,

na korora gose emesabibu yachakire goseboka.

Na emekomomanga gose yachakire gosicha.

Ⅻ Ekero konya ntaramanya, omoyo one okang’ira,

okambeka ase egari y’omogambi bw’abaanto baane.

ⅩⅢ Irana! Irana, aye Omosulamiti!

Irana! Irana, erinde tokorigererie!

Nase ki mokondigereria inche Omosulamiti,

buna mokorigereria ogotenga kw’ebiombe bibere bi’abasikari?