1 क्‍हेमैं न्‍होंरि ब्यभिचार तइमुँ रो, चु छाबै आछ्याँबै के बिश्‍वास आलब्‍मैं न्होंरै या आत। तलेबिस्याँ क्‍हेमैं न्‍होंर्बै म्‍हि घ्रि ह्रोंसए आम्‍ज्‍यों आमान् किंसि टिइमुँ रो बिबै ताँ ङइ थेइमुँ।✡5:1 व्य २२:२० 2 क्‍हेमैं न्‍होंर्न छाबै आछ्याँबै के लबै म्हि मुँसेया क्‍हेमैं खैले थेब् प्‍हैंमुँ? क्‍हेमैंम् शोक लल् त्‍हुमल आङिं वा? छाबै आछ्याँबै के लबै म्हिलाइ क्‍हेमैंए न्‍होंउँइँले तेवाद्। 3 क्‍हेमैंने बालु ङ आरेलै या ङए सैं क्‍हेमैंनेन् मुँ। छतसि ङ चर मुँब् धोंलेन् चए निसाफ ङइ लल् खाँइमुँ। 4 क्‍हेमैं ङ्योए प्रभु येशूए मिंर खागु तमा ङए सैं या क्‍हेमैंने बालु तमुँ। धै ङ्योए प्रभु येशूए शक्‍तिए के चर तब्मुँ। 5 तारेसेरो चइ छाबै पाप केमैं आलरिगे, धै प्रभु येशू युबै त्हिंइर चए प्ल्ह सोरिगे बिसि च म्हिलाइ दुष्‍टए योर पिंवाँन्।*5:5 च म्हिलाइ दुष्‍टए योर पिंवाँन् दुष्टइ चलाइ दुःख पिंमा च धबै प्रभु ङाँइ सैं एसि खरिगे धै प्रभु युबै त्हेर चए प्ल्ह जोगेमिंरिगे बिसि चलाइ दुष्‍टए योर पिंवाँन्

6 क्हेमैं थेब् प्‍हैंब ठिक आरे। च्युगुदे प्लेढाइ ल्हें क्हें फुल्दिवाम् बिब क्‍हेमैंइ आसेइमुँ वा?✡5:6 गला ५:९ 7 क्‍हेमैं प्लेढा आझोंबै क्हें धों तबै ल्हागिर क्हेमैंए आछ्याँबै बानि ब्योर पिवाद्। तलेबिस्याँ ङ्योलाइ दुःखइले फ्रेमिंबै ल्हागिर ख्रो तसि येशू ख्रीष्‍ट सिल् खाँइमुँ। छतसि क्‍हेमैं चोखो तल् खाँइमुँ।✡5:7 प्रस १२:५ 8 छतमा तारे ङ्योइ प्लेढा झोंबै क्हें धों तबै ओंसोंबै आछ्याँबै बानि ब्योर पिवासि छ्याँबै केमैं लदै क्ह्रोंसेंन्बै ताँमैं पोंदै प्लेढा आझोंबै क्हें चसि चाड म्हाँदिले।✡5:8 प्रस १३:७; व्य १६:३

9 ङइ क्‍हेमैंलाइ ओंसों प्‍ह्रिबै प्ह्रिछ्यार ब्यभिचार लब्‍मैंने बालु आप्रद् बिसि प्‍ह्रिल। 10 ङइ बिल् म्हैबै ताँ, प्रभु येशूलाइ आम्हाँदिबै ब्यभिचार लब्‍मैंने, लोबिमैंने, लुडिब्मैंने, कु पूजा लब्‍मैंने कत्ति आप्रद् बिब आङिं। चमैंने आप्रइ बिस्याँम् क्‍हेमैं चु ह्‍युलउँइँले त्‍होंह्‍याल् त्‍हुमल। 11 ङइ बिल् म्हैबै ताँ तो जा बिस्‍याँ, “ङ प्रभु येशूए फिर बिश्‍वास लबै म्हि ग” बिमुँ दिलेया चइ आछ्याँबै केमैं, व्यभिचार, लोबि, कु पूजा लब, गाल् केब, प्हा को तब, ह्‍योब, छाबै के लइबिस्‍याँ चने बालु प्रब्-टिब आलद्।

12 तलेबिस्याँ बैरुबै म्हिमैंए निसाफ लबै के ङल आङिं। दिलेया चर्ज न्होंर्बै म्हिमैंए निसाफ ङ्योइ लल् त्हुम्। 13 बैरुबै म्हिमैंए निसाफ परमेश्‍वरजीन् लमुँ। छतसि “क्‍हेमैंए न्होंउँइँले दुष्‍ट म्हिमैं तेवाद्।” बिसि परमेश्‍वरए छ्वेर बिइमुँ।✡5:12-13 व्य १३:५; १७:७