9
कुल्मिंबै चेला चिब्मैंए हग
1 ङ पावल खाबै न्होंर मुँ रो वा? ङ कुल्मिंबै चेला चिब आङिं वा? ङ्योए प्रभु येशूलाइ ङइ आम्रोंइमुँ वा? क्हेमैंन् प्रभुए ल्हागिर ङइ लबै केए रोमैं आङिं वा? 2 को-कोइ म्हिमैंइ ङ कुल्मिंबै चेला चिब आङिं ङ्हाँलेया ङलाइ प्रभुइ कुल्मिंबै चेला चिब बिसि क्हेमैंइ म्हाँदिम्। तलेबिस्याँ ङउँइँले सैं तोंबै ताँ थेसि क्हेमैंइ प्रभुए फिर बिश्वास लइ छतसि “ङ कुल्मिंबै चेला चिब ग” बिबै प्रमाण क्हेमैंन पिंम्! 3 ङए बिरोधर पोंब्मैंलाइ ङए ज्वाफ चुन् ग।
4 छतसि कुल्मिंबै चेला चिबए के ङइ लसेरो चब् थुँबै खर्ज ङइ योंल् आत्हु वा? 5 पत्रुस, प्रभु येशूए अलिमैं नेरो अरू कुल्मिंबै चेला चिब्मैं धोंलेन् ङज्यै या प्रभु येशूए फिर बिश्वास लबै च्हमिरि ब्ह्या लसि प्रल् आयों रो वा? 6 बर्णाबास नेरो ङइ मत्त्रे के लसि ह्रोंसए फो न्हल् त्हुब् रो वा? 7 फौजर मुँमा सिपाइमैंइ ह्रोंसए खर्जर्न के लम् रो वा? अँगुरए धुँ रुँइँसि अँगुरए रो आचब खाब मुँ? छलेन र-क्युमैं न्हसि चए ङ्हे आथुँब खाब् मुँ?
8 चु म्हिमैंइ बिबै ताँ मत्त्रे आङिं, परमेश्वरए छ्वेरै या छाबन् ताँ प्ह्रिइमुँ। 9 “दाँइ झोंबै क्ल्याए सुँर म्हुँलु आझोंन्” बिसि मोशाइ प्ह्रिबै ठिमरि प्ह्रिइमुँ।✡9:9 व्य २५:४; १ तिमो ५:१८
चु ताँ परमेश्वरजी क्ल्याए ल्हागिर मत्त्रे बिब् आङिं, 10 म्हिमैंए ल्हागिरै या बिब् ग। चु ताँ ङ्योए ल्हागिर्न प्ह्रिब् ग। तलेबिस्याँ क्योबै म्हि नेरो दाँइ झोंबै म्हि ङ्हिंन-ङ्हिंनैन रा-रो योंम् बिबै आशार के लम्। 11 ङिइ क्हेमैंए सैंर पबित्र प्ल्हउँइँले खबै प्लु प्लुइमुँ। छतसि ङिलाइ चैदिबै सैमैं च्युगु-च्युगु पिंबर्न क्हेमैंइ थेबै सै पिंब् धोंन् ङ्हाँइ वा?✡9:11 रोम १५:२७ 12 क्हेमैंउँइँले अरूमैंइ चैदिबै सैमैं योंम् बिस्याँ, झन् ङिइमि क्हेमैंउँइँले ल्हें योंल् त्हुम्।
दिलेया ङिइ चु हग आम्हैइमुँ। बरु ख्रीष्टउँइँले खबै सैं तोंबै ताँ म्हिमैंने बिप्रमा क्हेमैंए फिर तोइ दुःख आतरिगे बिसि ङिइ तोन्दोंरि दुःख सैदिइ। 13 मन्दिरर के लबै म्हिइ मन्दिरर खबै सैमैंउँइँलेन् चल् योंम्, छलेन ख्रो पिंबै क्ल्ह्योर के लबै म्हिमैंइ ख्रो पिंबै सैउँइँलेन् ह्रोंसए भाग योंम्।✡9:13 व्य १८:१ 14 छलेन सैं तोंबै ताँ बिप्रब्मैंइ सैं तोंबै ताँ बिप्रबै केउँइँलेन् चल्-थुँल् योंरिगे बिसि प्रभुजी बिइमुँ।✡9:14 मत्ती १०:१०; लूक १०:७
15 दिलेया ङइ चु हग आम्है। तोगो या ङइ चु प्ह्रिछ्या हग योंरिगे बिसि प्ह्रिब् आङिं। ङइ प्हैंबै ताँ खाबज्यै या थोब् भन्दा बरु ङलाइ सिब सब् मुँ! 16 तलेबिस्याँ ङइ सैं तोंबै ताँ म्हिमैंने बिप्रइ बिसि ङ थेब् प्हैंल् त्हुबै ताँ तोइ आरे। तलेबिस्याँ ङइ सैं तोंबै ताँ बिप्रलन् त्हुम्। ङइ सैं तोंबै ताँ आबिप्रइ बिस्याँ ङ आसोलै तम्। 17 ङइ ह्रोंसए इच्छाइ चु के लस्याँ चु केए नों सै म्हैमल। चु के ङइ ललन् त्हुबै के ग, तलेबिस्याँ परमेश्वरजी ङलाइ चु के लबै जिम्मा पिंइमुँ। 18 छ बिस्याँ ङइ योंल् त्हुबै नों सै तो जा? मुइ आकिंल्ले सैं तोंबै ताँ बिप्रल् योंरिगे, सैं तोंबै ताँ बिप्रमा योंल् त्हुबै हग ङइ म्हैल् आत्हुरिगे, ङए नों सै चन् ग।
19 ङ खाबै न्होंरै या आरे, दिलेया खाँन् समा ल्हें म्हिइ येशू ख्रीष्टए फिर बिश्वास लरिगे बिसि ङ ताँनए के लबै म्हि धोंन् तइमुँ। 20 यहूदीमैंइ येशू ख्रीष्टए फिर बिश्वास लरिगे बिसि ङ यहूदी धोंन् तइ। छलेन मोशाइ पिंबै ठिम (नियम) म्हाँदिबै म्हिमैंइ येशू ख्रीष्टए फिर बिश्वास लरिगे बिसि ङइ च ठिम आम्हाँदिलै या चमैंए ल्हागिर ङै या च ठिम म्हाँदिबै म्हि धोंन् तइ। 21 छलेन ठिम आम्हाँदिबै अरू ह्रेंमैंए म्हाँजोर ङइ के लमा चमैंइ येशू ख्रीष्टए फिर बिश्वास लरिगे बिसि ङ मोशाइ पिंबै ठिम आम्हाँदिबै म्हि धोंन् तइ। (दिलेया ङ परमेश्वरए ठिमए न्होंर टिसि ख्रीष्टजीन् बिबै ताँ ङिंम्।) 22 छलेन बिश्वासर आभोंब्मैंए बिश्वास भोंब् तरिगे बिसि ङै या बिश्वासर आभोंब्मैं धोंन् तइ। खैले तमुँ छले खाब् आङिं खाबइ प्रभुए फिर बिश्वास लरिगे बिसि म्हिमैं खै तल ङै या छान् तल। 23 चु सैं तोंबै ताँ खन्तोंदोंन् फेनेरिगे धै चु ताँउँइँले योंबै आशिक ङज्यै या योंरिगे बिसि ङइ छ लम्।
24 चु ताँ क्हेमैंज्यै सेइमुँ: न्हेबर भाग किंब्मैं ताँन् न्हेम्, दिलेया पुरस्कार घ्रिइ मत्त्रे योंम्। छतसि क्हेमैं या पुरस्कार योंल् खाँल्ले न्हेद्। 25 खेलर भाग किंबै म्हिमैं तोन्दोंरि सैर ह्रोंसए ज्यु तार झोंम्। चमैं नास तयाबै पुरस्कार योंबै ल्हागिर छ लम्, दिलेया ङ्यो खोंयोंइ नास आतबै पुरस्कार योंबै ल्हागिर छ लम्। 26 छतसि तोक्दिबै क्ल्ह्योर आफेनेन् समा ङ न्हेम्। खैंर मुड्किइ ल्हिब्मैंइ धोंले ङ मुड्किइ आल्हि। 27 ङइ ह्रोंसए ज्यु भोंब् लबै ल्हागिर तालिम पिंब् धोंले ह्रोंसए न्होंर थेंम्। तले छ लम् बिस्याँ ङइ अरूमैंलाइ “खेलर भों लद्” बिसेरो ङ फेल आतरिगे बिसि छ लब् ग।