1 छतसि ङि क्हेमैंउँइँले फ्रेसि टिल् आखाँबइले ङि चु एथेन्‍स सहरर स्योले टिमा✡3:1 चिब्मैं १७:१५ 2 ङ्योए अलि तिमोथी क्‍हेमैं ङाँर कुलइमुँ। च परमेश्‍वरए सेवा लसि येशू ख्रीष्‍टए बारेर्बै सैं तोंबै ताँ बिप्रबै म्हि ग। 3 नाँसथेंमैंइ क्हेमैंलाइ दुःख पिंमा क्हेमैं खाबज्यै बिश्‍वास लब आपिरिगे बिसि तिमोथीइ क्हेमैंए बिश्‍वास भोंसि लबर लोदा सैंदा लरिगे बिसि ङिइ चलाइ क्‍हेमैं ङाँर कुल्‍मिंइमुँ। ङ्योइ चु दुःख सैदिल् त्‍हुम् बिसि क्हेमैंज्यै या सेइमुँ। 4 तलेबिस्याँ “ङ्योइ प्रभु येशूए फिर बिश्‍वास लबइले दुःख सैदिल् त्‍हुम्” बिसि ङिइ ओंसोंन् क्‍हेमैंने मुँमा बिल। छाबै दुःख क्‍ह्रोंसेंन तब क्‍हेमैंज्यै सेइमुँ। 5 छतमा ङए सैंइ ङलाइ सुखन् आपिं। धै “दुष्‍टइ क्‍हेमैंलाइ बिश्‍वासउँइँले स्योवासि ङिइ लबै दुःख खेरो ह्‍याम् उ?” बिब् ङ्हिंसि क्हेमैंए बिश्‍वास कति थेब् मुँना बिसि क्होबर ङइ तिमोथी कुल्‍मिंब् ग।

6 तोगो तिमोथी क्‍हेमैंउँइँले ङि ङाँर एखसि क्‍हेमैंइ प्रभुए फिर बिश्‍वास लबै ताँ नेरो क्‍हेमैंए न्‍होंरि म्हाँया लमन बिसि ङिने छ्याँबै सँउँसर बिमिंइ। झाइले क्‍हेमैंइ ङिए फिर म्हाँया खसि ङिइ क्‍हेमैंने त्होदा ङ्हाँब् धोंले क्‍हेमैं या ङिने त्होदा ङ्हाँइमुँ बिबै सँउँसर पखइ।✡3:6 चिब्मैं १८:५ 7 ओ अलि-अङाँमैं, ङिए फिर दुःख तनाबिलेया क्‍हेमैंए बिश्‍वासए बारेर थेल् योंमा ङिए सैं क्होइमुँ। 8 तलेबिस्याँ क्‍हेमैं प्रभुए फिर बिश्‍वास लबर भोंसि तरिस्याँ ङि सिबै म्हि सोगों तब् धोंन् ङ्हाँमल। 9 क्हेमैं प्रभुए फिर बिश्‍वास लबर भोंब् तइमुँ बिबै ताँ थेसि ङि बेल्‍ले सैं तोंइँमुँ। चुए ल्हागिर ङिइ परमेश्‍वरलाइ कति ल्हें धन्‍यबाद पिंम्। 10 क्हेमैंने त्होसि क्हेमैंए बिश्‍वास झन भोंसि लमिंबै सैं मैंसि ङि त्‍हिंयाँ म्‍हुँइँस सैं न्होंउँइँलेन् बेल्‍ले प्राथना लम्।

11 तारे ङ्योए परमेश्‍वर आबा नेरो ङ्योए प्रभु येशूजी ङि क्‍हेमैं ङाँर खबै घ्याँ थोंमिंरिगे, 12 धै ङिइ क्‍हेमैंने म्हाँया लब् धोंले प्रभुजी क्‍हेमैंलाइ घ्रिइ घ्रिने नेरो अरू ताँन् म्‍हिमैंने सब् लमिंबै म्हाँया प्लिंदै बडिमिंरिगे। 13 खीजी क्हेमैंलाइ भोंब् लमिंब्मुँ, धै प्रभु येशू खीए म्हिमैंने बालु धबै चु ह्‍युलर युमा क्हेमैं ङ्योए परमेश्‍वर आबाए उँइँर बेल्‍ले छ्याँब खोट आरेब तब्मुँ।