1 ओ ङइ खोबै अलि-अङाँमैं, चु ताँन् बाछामैं ङ्योए ल्हागिर्न ग। छतसि ङ्योए ज्यु नेरो सैं पापर च्होवाबै सैमैंउँइँले ङ्यो स्‍यो तले। झाइले ङ्यो परमेश्‍वरने ङ्हिंसि खीए उँइँर ज्युर सैंर छ्याँब् ततै ह्‍याले।

2 क्हेमैंए सैंर्बै ताँ ङिने आलोद्, क्‍हेमैंए सैंर तो मुँ चन् ङिने बिद्। ङिइ खाबलै या न्होह्रों आलइमुँ, खाबलाज्यै या नास तबै के आलइमुँ। ङिए केउँइँले ङिइ खाब्ने या फायदा आकिंइमुँ। 3 क्‍हेमैंलाइ छ्याब् ल्हैदिबर ङइ छ बिब आङिं। ङइ ओंसों बिब् धोंलेन्, ङिए सैंर क्हेमैंए फिर ल्हें म्हाँया मुँ, छतसि सिलेया सोलेया ङि खोंयोंन् बिलै क्‍हेमैंने बालुन् तब्मुँ। 4 क्‍हेमैं म्रोंसि ङ ढुक्‍का तसि ङ्‍हो लोंइँमुँ। क्हेमैं म्रोंसि ङए सैं क्होइमुँ। छतसि ङिइ खैतबै दुःख योंलेया ङ सैं तोंन्लेन् टिम्।

5 ङि माकेडोनिया ह्‍युलर फेनेसि तीतसइ पबै सँउँसर आयोंन् समा सन्‍दोक आरेल। चर ङिइ तो के ललेया खन्तोंदोंउँइँले दुःखन् तखइ, म्हिमैं ङिने प्‍होंमल, ङिए सैं ङ्हिंमल।✡7:5 २ कोर २:१३ 6 दिलेया सैं च्‍योंब तब्‍मैंलाइ सैं थेब् लमिंबै परमेश्‍वरजी तीतस ङि ङाँर कुल्मिंसि ङिए सैं भोंब् लमिंइ। 7 तीतस खसि मत्‍त्रे आङिं, क्‍हेमैंइ चलाइ भों पिंबै ताँ थेसि ङि झन् सैं तोंइ। क्‍हेमैं ङने त्‍होदा ङ्हाँइमुँ रो, ह्रोंसइ लबै आछ्याँबै केमैंइ लमा क्हेमैंइ पछुत लइमुँ रो, झाइले म्हिमैंइ ङए बारेर आछ्याँबै ताँ पोंमा क्‍हेमैंइ ङए ख लसि पोंम् रो बिबै ताँमैं थेसि ङ झन् बेल्‍ले सैं तोंइ।

8 ङइ ओंसों च हौदिबै प्ह्रिछ्या प्‍ह्रिसि क्‍हेमैंए सैं नवालेया ङइ च प्ह्रिछ्या प्‍ह्रिलन् त्हुमल। च प्ह्रिछ्याइ तिस्याँदे क्‍हेमैंए सैं नइ। क्हेमैंए सैं नब् म्रोंसि ङइ “आप्‍ह्रिलेन् तमल” ङ्हाँइ, 9 दिलेया तोगो ङ सैं तोंइमुँ। क्‍हेमैंए सैं नल् लवासि ङ सैं तोंब आङिं, बरु च प्ह्रिछ्याए ताँइ लमा क्‍हेमैंइ ह्रोंसए आछ्याँबै केउँइँले सैं एइमुँ बिब् थेसि ङ सैं तोंइमुँ। क्हेमैंए सैं परमेश्‍वरजीन् नल् लब् ग, छतसि क्‍हेमैंए सैं नलेया ङि ङाँइँले क्‍हेमैंला तोइ न्होह्रों आतइमुँ। 10 तलेबिस्याँ परमेश्‍वरउँइँले खबै न्हुँइ लमा क्हेमैंइ आछ्याँबै के लब् पिसि खोंयोंइ आखाँबै छ्ह योंम्। खीए छ्याँबै घ्‍याँर प्रमा ङ्यो खोंयोंइ पछुत् खल् आत्‍हु। दिलेया ह्‍युलउँइँले खबै न्हुँइ बिस्याँ ङ्यो नास लवाम्। 11 मैंन्दि, परमेश्‍वर ङाँइले खबै न्हुँइ लमा क्‍हेमैंला थेबै फायदा तइमुँ! क्‍हेमैंला खैबै फायदा तइमुँ बिस्‍याँ: क्‍हेमैंला छ्याँबै के लबै सैं खइमुँ, झाइले म्हिमैंए उँइँर “ङि छ्याब् आरेब्” खैले तब् ङ्‍हे बिबै सैं खइमुँ, पाप लब् म्रोंसि ह्रिस खइमुँ, परमेश्‍वरए ताँ आङिंना बिब् सेसि आतिदिइमुँ, ङने त्‍होदा ङ्हाँइमुँ, झन् झन् छ्याँबै के लबै सैं खइमुँ, च आछ्याँबै के लबै म्हिलाइ सजैं पिंबै सैं खइमुँ। छले क्‍हेमैंइ चु ताँन् केमैं ठिक लसि ह्रोंसलाइ छ्याब आरेब् उँइँइमुँ।

12 ङइ च प्ह्रिछ्या आछ्याँबै के लबै म्हिलाइ हौदिबर मत्‍त्रे आङिं, झाइले सैदिबै म्हिलाइ ल्होबरै या आङिं, परमेश्‍वरए उँइँर क्हेमैंइ ङिए फिर कति थेबै म्हाँया लइमुँ बिब क्हेमैंइ सेरिगे बिसि प्‍ह्रिब् ग। 13 ङिइ बिबै ताँ क्हेमैंइ ङिंब् म्रोंसि ङिए सैं क्‍होइ।

ङिए सैं क्‍होब मत्‍त्रे आङिं, क्‍हेमैंइ तीतसलाइ छ्याँन् लसि चए सैं तोंन् लमिंब् म्रोंसि ङि झन् सैं तोंइमुँ। 14 क्‍हेमैंए बारेर ङइ तीतसने प्हैंलेया क्‍हेमैंए बारेर ङ फापिल् त्हुबै घ्याँ तोइ आरेल। ङिइ खोंयोंन् बिलै क्‍हेमैंने क्‍ह्रोंसेंन्‍बै ताँ बिइमुँ। छलेन ङिइ तीतसने क्‍हेमैंए बारेर प्हैंब् धों तबै के क्‍हेमैंइ लसि उँइँइ। 15 क्‍हेमैं तीतसने ङ्हिंसि चलाइ बेल्‍ले मान लइ, झाइले क्‍हेमैं ताँनइ चइ बिबै ताँ ङिंबर तयार तइ। छतसि क्‍हेमैंइ लबै च्हौ छ्याँबै केमैं मैंसि तीतसइ क्हेमैंए फिर म्हाँया झन् ल्हें लइमुँ। 16 क्‍हेमैंइ लबै ताँन् केमैं म्रोंसि ङ बेल्‍ले तोंइमुँ, तलेबिस्याँ क्हेमैंए फिर ङल थेबै बिश्‍वास मुँ।