चु कितब लूकाइ प्‍ह्रिब् ग। लूकाइ ओंसों सैं तोंबै ताँए बारेर प्ह्रिइमुँ, धै चु कितबर बिब् म्हैबै ताँ येशूए ओंसोंबै च्युसे ङ्हिं चेलामैंइ लबै केमैंए बारेर प्ह्रिइमुँ। पबित्र प्ल्हजी लोमिंमा चमैंइ यरूशलेम, यहूदीया, सामरिया नेरो पृथ्बीए कुना-कुना समा येशूए सैं तोंबै ताँ खैले बिप्रइ बिसि प्ह्रिब् ग। परमेश्‍वरजी चु सैं तोंबै ताँ येशूउँइँले युम् बिसि ओंसों यहूदीमैंने बिइ। चु ताँ ओंसों यहूदीमैंने बिइ, धै लिउँइ ताँन् ह्‍युलर बिमिंइ। छले तिंयाँ ताँन् म्हिमैंइ चु सैं तोंबै ताँ थेल् योंब् ग। लूकाइ अर्को ताँ ङ्हिं बिमिंइँमुँ: “ख्रीष्‍टियानमैं रोम ग्याल्सर्बै न्होह्रों लब्मैं आङिं,” धै “येशूए फिर बिश्‍वास लबइले यहूदी धर्म पूरा तइ।”

कुल्मिंबै चेला चिब्मैंइ लबै केमैं भाग सोंर चुल् खाँम्:

चु कितबर्बै सेलन् त्हुबै ताँ पबित्र प्ल्हजी लबै केमैं ग। पबित्र प्ल्ह पेन्तिकोसए त्हिंइर यरूशलेमर्बै येशूए फिर बिश्‍वास लब्मैंए फिर शक्‍ति पिंबर युइ (२:१-४)। धै पबित्र प्ल्हजी खीए के लबै ल्हागिरि येशूए फिर बिश्‍वास लब्मैं नेरो चमैंए चिब्मैंलाइ बिश्‍वासर भोंब् लमिंमल। चु कितबर चेला चिब्मैंइ ख्रीष्‍टए बारेर्बै सैं तोंबै ताँ खोल्दिमिंइँमुँ। परमेश्‍वरए फिर बिश्‍वास लब्मैंए छ्ह नेरो परमेश्‍वरए मिंर चमैंइ लबै संगतिरि परमेश्‍वरए शक्‍ति खैब मुँ बिसि चु कितबर्बै ताँमैंइ उँइँमिंइँमुँ।