1 कैसरिया बिबै क्ल्ह्‍योर कर्नेलियस मिं मुँबै म्हि घ्रि मुँल। च इटालिया बिबै पल्टनर्बै कप्‍तान*10:1 कप्‍तान ग्रिक क्युइरि, सिपाइ प्रए चिब मुँल। 2 चइ परमेश्‍वर म्हाँदिमल, धै च नेरो चए परवा ताँनइ परमेश्‍वरजी बिब ङिंमल। चइ थेबै सैंइ म्हिमैंए खाँचोमैं टार्दिमिंसि परमेश्‍वरने खोंयोंन् बिलै प्राथना लरिमल। 3 तिगें त्हिंइर्बै सों ह्राबै त्हेजरे परमेश्‍वरए स्वर्गदूत घ्रि दर्शनर च ङाँइ युसि, “ओ कर्नेलियस!” बिरिब चइ थेइ।

4 छबिमा कर्नेलियस ङ्हिंसि स्वर्गदूत ङाँइ ङ्ह्‍योबै-ङ्ह्‍योबन् लसि, “बिल् त्हुबै ताँ तोइ मुँ वा?” बिइ।

स्‍वर्गदूतइ चने बिइ, “क्हिइ ङ्हाँदुमैंए खाँचो टार्दिमिंबै छ्याँबै केमैं नेरो क्हिइ लबै प्राथना परमेश्‍वरए उँइँर फेनेइमुँ। 5 तारे पत्रुस बिबै सिमोन हुइबर योप्पार म्हिमैं कुल्मिंन्। 6 च ट्हिबिए के लबै सिमोन ङाँर टिइमुँ। चए धिं मा ङ्युँइए छेउर मुँ।” 7 च्हक बिसि स्वर्गदूत कर्नेलियसउँइँले छ्युडिह्‍याइ। च लिउँइ कर्नेलियसइ चए केब्छैंमैंर म्हि ङ्हिं नेरो खीलाइन सेवा लरिबै सिपाइ घ्रि हुइ। च सिपाइ परमेश्‍वरलाइ म्हाँदिब् मुँल। 8 झाइले खिइ म्रोंबै ताँन् ताँ चमैंने बिसि चमैंलाइ योप्पार कुल्‍मिंइ।

9 प्‍हँन्हाँग्धों त्हिंइर्बै च्युसे ङ्हिं ह्राबै त्हेजरे चमैं योप्‍पा सहरए चेंदो फेखइ। च त्हेजरे पत्रुस प्राथना लबर धिंए आडि फिर ह्‍याइ। 10 च प्राथना लदै मुँमा फो ख्रेंसि तो मुँलै चल् योंस्याँ तमल ङ्हाँरिल, दिलेया अरूमैंइ चब् ह्‍योरिबै त्हेर च प्रभुने बेल्‍ले चेंदो तमा 11 चइ स्‍वर्ग थोंब नेरो च्हो प्लिर्न फैबै तन्‍न धों तबै सै ताले माइ पृथ्बीउँइँ तयुरिब् म्रोंइ। 12 च च्यादरर पृथ्बीर्बै ताँन् खालर्बै प्हले प्लि प्ह्‍याबै खेदोमैं, फोइ क्ल्‍‍याँइ प्रबै प्हँलाँ प्हुँलुमैं नेरो मुर्बै नेमामैं मुँल। 13 च्हमा “ओ पत्रुस, रेद्, चु सैमैं सैसि चद्,” बिबै कै चइ थेइ।

14 दिलेया पत्रुसइ बिइ, “आङिं, प्रभु! ङइ चोखो आरेब् नेरो चल् आतबै सैमैं खोंयोंइ आचइमुँ।”

15 पत्रुसइ छबिमा धबै “परमेश्‍वरजी चोखो लमिंबै सै क्हिइ ‘चोखो आरे’ बिसि आमैंन्!” बिबै कै चइ थेइ। 16 चु ताँ सोंब्‍ले समा छान् बिरिइ। च तोंदोंन् च च्यादर स्वर्गउँइ बोयाइ।

17 छतमा पत्रुस ह्रोंसइ म्रोंबै दर्शनए अर्थ तो मुँगे बिसि सैं न्हों-न्हों खैला-तोला तरिबै त्हेर्न कर्नेलियसइ कुल्मिंबै म्हिमैं सिमोनए धिं म्हैरि योंसि म्रार राइ। 18 झाइले च म्हिमैंइ, “पत्रुस बिबै सिमोन चुर टिइमुँ वा?” बिसि थेबै कैले ङ्योएइ।

19 पत्रुस ह्रोंसइ म्रोंबै दर्शन तो मुँगे बिसि मैंरिमा पबित्र प्ल्हजी चने बिइ, “ङ्‍ह्‍योद्, म्हि सोंइ क्हि म्हैरिमुँ। 20 रेसि क्युरु तद्, धै छोरों आङ्हाँन्ले चमैंने बालु ह्‍याद्, तलेबिस्याँ चमैं ङइ कुल्मिंब् ग।”

21 छबिमा पत्रुस क्युरु तसि च म्हिमैं ङाँर ह्‍यासि, “क्हेमैंइ म्हैबै म्हि ङन् ग। क्हेमैं चुर तो केइ खल?” बिइ।

22 चमैंइ बिइ, “कप्‍तान कर्नेलियसइ ङि चुर कुलब् ग। च छ्याँब सैं प्ह्‍याब नेरो परमेश्‍वर म्हाँदिबै म्हि मुँ, धै ताँन् यहूदी ह्रेंमैंउँइँले मान योंबै म्हि ग। चए धिंर क्हि हुइसि क्हिउँइँले ताँ थेद् बिसि पबित्र स्वर्गदूत घ्रिइ चने बिइमुँ।” 23 झाइले पत्रुसइ चमैं धिं न्होंर हुइसि चमैंए मान लइ।

प्‍हँन्हाँग्धों पत्रुस रेसि चमैंने बालु ह्‍याइ, धै योप्पार्बै बिश्‍वासीमैं या चने बालुन् ह्‍याइ। 24 नुँइम्धों चमैं कैसरिया फेनेइ। कर्नेलियसइ ह्रोंसए ङेमैं नेरो क्ह्रिबै थुमैं हुइसि चमैं खागु तसि पत्रुसलाइ प्रेंरिल। 25 पत्रुस फेखसि धिं न्होंर होंबि छेमा कर्नेलियस चने त्होसि चए प्हले क्हासि फ्योइ। 26 दिलेया पत्रुसइ, “आफ्योद्, ङैना म्हिन् ग,” बिदै चलाइ रेइ। 27 झाइले पत्रुस चने बालु ताँ लदै धिं न्होंर होंमा चर ल्हें म्हि खागु तब चइ म्रोंइ। 28 छतमा पत्रुसइ चमैंने बिइ, “यहूदीए ल्हागिर अरू ह्रेंमैंने त्होसि प्रब-टिब् लब बेल्‍ले आछ्याँबै ताँ ग बिसि क्हेमैंइ सेइमुँ। दिलेया ‘म्हिमैं खाबै या चोखो आरे आङ्हाँन्,’ बिसि परमेश्‍वरजी ङने उँइँमिंइँमुँ। 29 छतसि क्हेमैंइ हुइबै तोंदोंन् तोइ आङ्हाँन्ले ङ क्हेमैं ङाँर खइ। लु बिद्, क्हेमैंइ ङलाइ तले हुइल?”

30 झाइले कर्नेलियसइ बिइ, “प्लिरो ओंसों सों ह्राबै त्हेजरे ङ धिंर प्राथना लरिमा फोस्रे ब्योंबै क्वें खिबै म्हि घ्रि ङए उँइँर रासि 31 बिइ, ‘कर्नेलियस! परमेश्‍वरजी क्हिए प्राथना थेइमुँ, धै क्हिइ ङ्हाँदुमैंलाइ तो चैदिमु च पिंबै छ्याँबै केमैं या मैंइमुँ। 32 छतसि योप्पार म्हिमैं कुलसि सिमोन पत्रुस बिबै म्हि हुइपउ। च मा ङ्युँइए छेउर ट्हिबिए के लबै सिमोनए धिंर टिइमुँ।’ 33 छ बिबै तोंदोंन क्हि ङाँर म्हि कुल्मिंइ, धै क्हि या गार आम्हाँदिन्ले खमिंइ। तारे प्रभुजी क्हिने बिद् बिबै ताँमैं थेबै ल्हागिर ङि ताँन् चुर परमेश्‍वरए उँइँर खागु तइमुँ।”

34 झाइले पत्रुस पोंबर होंइ, “क्ह्रोंसेंन परमेश्‍वरजी खाबलाज्यै आफेल बिसि ङइ तोगो क्होइमुँ। 35 ताँन् म्हिमैं खाब ह्रेंर्बै मुँलेया परमेश्‍वरने ङ्हिंसि छ्याँबै के लमुँ च म्हिमैंलाइ खीजी खोमुँ। 36 येशू ख्रीष्‍टउँइँले छिं ङ्हाँल् लबै सैं तोंबै ताँ परमेश्‍वरजी इस्राएलीमैंलाइ बिइ बिसि क्हेमैंइ सेइमुँ। (येशू ख्रीष्‍टन् ताँनए प्रभु ग।) 37 यूहन्‍नाइ बप्‍तिस्मा किंन् बिसि बिप्रबै लिउँइसेरो गालील ह्‍युलउँइँले तों लसि ताँन् यहूदीया तिगोंन् बिप्रबै ताँ क्हेमैंइ सेइमुँ। 38 परमेश्‍वरजी नासरतथें येशूलाइ पबित्र प्ल्ह नेरो शक्‍तिजी प्लिंमिंसि खीजी छ्याँबै केमैं लदै, दुष्‍टइ ह्रुगुदिब्मैं सल् लमिंदै प्रइ, तलेबिस्याँ परमेश्‍वर खीने बालु मुँल। 39 खीजी यहूदीमैंए ह्‍युल नेरो यरूशलेमर लबै ताँन् केमैं ङिइ म्रोंइँमुँ। च लिउँइ म्हिमैंइ खी क्रूसर च्योवासि सैवाइ। 40 दिलेया परमेश्‍वरजी येशूलाइ धबै सोंरोर सोगों लमिंइ, धै म्हिमैं ङाँर खी म्रोंखल् पिंइ। 41 ताँन् म्हिमैं ङाँर खी आम्रोंखा, दिलेया खी ङि ङाँर मत्‍त्रे, तलिबिस्याँ खी सिसि धबै सोगों तबै लिउँइ ङिइ खीने बालुन् चब-थुँब लइ। चु ताँए ग्वाइ पिंबर परमेश्‍वरजी ओंसों ओंनोंन् ङिलाइ त्हाँल। 42 ‘म्हिमैंने सैं तोंबै ताँ बिमिंबर’ धै ‘सोगोंमैं नेरो सियाब्मैंए निसाफ लबर परमेश्‍वरजी त्हाँबै म्हि येशून् ग,’ बिसि ङिलाइ ग्वाइ पिंबर परमेशजी ल्हैदिइमुँ। 43 स्योंम्बै अगमबक्‍तामैंइ ‘खीए फिर बिश्‍वास लब्मैं ताँनइ खीए मिंउँइँले पाप क्षमा योंम्,’ बिसि खीए ग्वाइ पिंइँमुँ।”

44 पत्रुसइ चु ताँमैं पोंना-पोंन् ताँ थेरिब्मैं ताँनए फिर पबित्र प्ल्ह युइ। 45 अरू ह्रेंमैंए फिरै या पबित्र प्ल्ह युब् म्रोंसि पत्रुसने बालु खबै प्रभुए फिर बिश्‍वास लबै यहूदीमैं बेल्‍ले प्लेटोयाइ। 46 तलेबिस्याँ स्यो-स्योबै क्युइर पोंसि चमैंइ परमेश्‍वरए मिं क्वेरिब चमैंइ थेइ। छतब् म्रोंसि पत्रुसइ बिइ, 47 “ङ्योइ धोंलेन् चुमैंज्यै या पबित्र प्ल्ह योंसेरो क्युए बप्‍तिस्मा आकिंन् बिसि खाबइ बिल् खाँमुँ?” 48 छतसि चइ येशू ख्रीष्‍टए मिंरि चमैं बप्‍तिस्मा पिंन् बिइ। धै चमैंइ “दे त्हिंइ गार आम्हाँदिन्ले चुर्न टिमिंन्,” बिसि पत्रुसने बिइ।