17
थेसलोनिका सहरर तबै ताँ
1 पावल नेरो सिलास अम्फिपोलिस नेरो अपोल्लोनियाए घ्याँ ततै थेसलोनिकार फेखइ। चर यहूदीमैंए च्हों धिं घ्रि मुँल। 2 पावल सोदा धोंलेन् यहूदीमैंए च्हों धिंर ह्याइ। धै सद सों समा प्रिबै त्हिंइर चमैंने छलफल लरिइ। 3 “परमेश्वरजी कुल्मिंबै म्रुँ ख्रीष्टजी क्ह्रोंसेंन दुःख नोसि सिबउँइँले धबै सोगों तल् त्हुमल। येशूउँइँले खबै सैं तोंबै ताँ ङ क्हेमैंने बिमिंम्। खीन् परमेश्वरजी कुल्मिंबै म्रुँ ख्रीष्ट ग!” बिसि चइ परमेश्वरए छ्वेउँइँले प्रमाण उँइँइ। 4 पावल नेरो सिलासए ताँ थेसि चमैंए न्होंर्बै को-कोइ यहूदीमैंइ चमैंइ बिबै ताँ क्वेंसि पावल नेरो सिलास ङाँइ ल्हैदिइ। धै परमेश्वर म्हाँदिबै ल्हें ग्रिकमैं नेरो ल्हें क्रथे मिंथे च्हमिरिमैं या चमैं ङाँइ ल्हैदिइ।
5 दिलेया कोइ यहूदीमैंइ ह्रिस लसि बजारर्बै बदमासमैं खागु लसि ल्हें म्हि रेसि सहरर खैला-बैला लबर होंइ, धै यासोनए धिंर खैच्हिजिले होंसि पावल नेरो सिलास म्हिमैंए उँइँर पखल् म्हैइ। 6 दिलेया चमैंइ पावल नेरो सिलास स्याल् आखाँमा यासोन नेरो प्रभुए फिर बिश्वास लबै को-कोइ आघें-अलिमैं सहरर्बै चिबनाँब्मैं ङाँर चैं पखसि बिइ, “ह्युलन् उल्टो-पुल्टु लबै म्हिमैं चुरै या फेखइमुँ,” बिसि ओरइ। 7 “चु यासोनए धिंर चमैं प्ह्रें तसि टिइमुँ, चमैं ताँनइ येशू बिबै अर्को थेबै म्रुँ घ्रि मुँ बिसि कैसर म्रुँए बिरोधर के लम्।” 8 चु ताँ थेसि म्हिमैं नेरो सहरर्बै चिबनाँब्मैं आल-मल तयाइ। 9 झाइले सहरर्बै चिबनाँब्मैंइ यासोन नेरो चने बालु मुँबै अरू म्हिमैंने धरौटि किंसि चमैं पिमिंइ।
पावल नेरो सिलास बेरिया नाँसर युब
10 झाइले च तोंदोंन् प्रभुए फिर बिश्वास लबै अलि-अङाँमैंइ पावल नेरो सिलास म्हुँइँसर्न बेरिया सहरउँइ कुल्मिंइ, चमैं चर फेनेसि यहूदीमैंए च्हों धिं न्होंर ह्याइ। 11 चर्बै यहूदीमैं थेसलोनिकाथेंमैं भन्दा स्वाब मुँल: चमैंइ परमेश्वरए ताँ बेल्ले छ्याँब ङ्हाँसि सैंर किंइ, धै चु ताँमैं पावलइ बिबै ताँने क्ह्रिम् उ आक्ह्रि बिसि त्हिंइ ह्रोंसे परमेश्वरए छ्वेर्बै ताँमैं खेसि क्होल् म्हैमल। 12 छतसि चुमैंए न्होंर्बै ल्हें म्हिइ प्रभु येशूए फिर बिश्वास लइ। थेबै कुलर्बै ग्रिक च्हमिरिमैं नेरो ल्हें ग्रिक मुँयुँमैंज्यै या प्रभुए फिर बिश्वास लइ। 13 दिलेया थेसलोनिकार्बै यहूदीमैंइ “पावलइ परमेश्वरए ताँ बेरियारै या बिइ प्रइमुँ!” बिब् सेसि चमैं चरै या म्हिमैं उस्केबर फेखइ। 14 च तोंदोंन् बेरियार्बै प्रभुए फिर बिश्वास लबै अलि-अङाँमैंइ पावल मा ङ्युँइए रेजरे कुल्मिंइ। सिलास नेरो तिमोथी बिस्याँ चर्न टिइ। 15 पावल सनेब्मैंइ चलाइ एथेन्स समा सनेइ। चर फेनेसि पावलइ “सिलास नेरो तिमोथी खाँन् समा युन्ले ङ ङाँर कुल्मिंन्,” बिसि सनेब्मैंने सँउँसर कुल्मिंइ।
एथेन्स सहरर तबै ताँ
16 पावलइ एथेन्स सहरर सिलास नेरो तिमोथी पैंरिमा च सहर तिगोंन् कुमैंइ प्लिंरिब् म्रोंसि चए सैं बेल्ले नइ। 17 छतमा च यहूदीमैं च्हों धिंर ह्यासि यहूदीमैं नेरो परमेश्वर म्हाँदिबै ग्रिक म्हिमैंने छलफल लरिमल, धै बजारर खीने त्होब्मैंने या त्हिंइ ह्रोंसे छलफल लरिमल। 18 को-कोइ इपिक्युरि नेरो स्तोइकि ह्रब्-सेब्मैंज्यै या पावलने छलफल लइ। चमैं न्होंर्बै कति म्हिमैंइ “चु ल्हें पोंबै म्हिइ तो बिइमुँ जा?” बिसि ङ्योएमल।
अरू म्हिमैंइ बिइ, “आगुए ह्युलर्बै देवतामैंए ताँ लरिब् धों ङ्हाँम्।” तलेबिस्याँ पावलइ येशूए बारेर नेरो म्हिमैं सिसि धबै सोगों तबै*17:18 सिसि धबै सोगों तबै ग्रिक क्युइरि चु ताँफुँमैं “अनस्तासिस्” बिबै ताँ घ्रिन् मुँ, धै च म्हिमैंइ “येशू” नेरो “अनस्तासिस्” बिब देवतामैंए मिंमैं मैंमल। ताँमैं बिरिमल। 19 छतसि चमैंइ पावल अरियोपागसर्बै म्हि च्होंर बोसि, “क्हिइ लोमिंबै चु छारा ताँमैं तो जा? ङिज्यै या क्होल् खाँम्मा?” बिसि ङ्योएइ। 20 “तलेबिस्याँ क्हिइ ङिने औदिबै ताँमैं बिरिइमुँ। छतसि चु ताँइ बिल् म्हैब तो जा? ङि च ताँमैं क्होदा ङ्हाँइमुँ।” 21 (ताँन् एथेनिथेंमैंइ नेरो चर टिबै आगुए ह्युलर्बै म्हिमैंइ नौले-नौले ताँमैं मत्त्रे लसि त्हिंइ थोरिमल।)
22 छतमा पावलइ अरियोपागसए म्हि च्होंए म्हाँजोर रासि बिइ, “ओ एथेन्सथेंमैं! क्हेमैं बेल्ले धर्मए केमैं लदा ङ्हाँब्मैं मुँना बिब ङइ सेइमुँ। 23 तलेबिस्याँ ङ चु सहर स्युरदै प्रमा क्हेमैंइ फ्योबै सैमैं ङइ ल्हें म्रोंइ। ङइ छाबै ख्रो पिंबै क्ल्ह्यो घ्रि या स्याइ। चर ‘ङो आसेबै देवता’ बिसि प्ह्रिथेंना। छतसि क्हेमैंइ आह्रसि फ्योबै ‘ङो आसेबै देवता’ खाब् जा बिसि ङइ क्हेमैंने क्होमिंस्यो। 24 परमेश्वरजी ह्युल नेरो चर मुँबै तोन्दोंरि सैमैं बनेमिंइ। खी स्वर्ग नेरो पृथ्बीर्बै प्रभु तबइले म्हिमैंए योइ बनेबै मन्दिरर खी आटि। 25 खीजीन् ताँनलाइ जीवन, सो नेरो तोन्दोंरि सै पिंमुँ। छतसि खीलाइ तोइ सैए खाँचो तब् धोंले म्हिए योउँइँले खीए सेवा लल् त्हुम् बिसि आमैंन्।✡17:24,25 १ म्रुँ ८:२७; यशै ४२:५; चिब्मैं ७:४८ 26 खीजी म्हि घ्रिउँइँले ल्हें ह्रेंमैं बनेसि पृथ्बी तिगोंन् टिल् पिंइ। धै म्हिमैं चु पृथ्बीर सोबै त्हे निबै टिबै क्ल्ह्योए साँदमैं या ओंसों ओंनोंन् तोक्दिमिंइमुँ। 27 ‘म्हिमैंइ परमेश्वर म्हैरिगे धै खनिज्यै चमैंइ छाम् छुमले म्हैसि खी स्याम् उ’ बिबै आशार खीजी छ लइ। दिलेया खी ङ्योउँइँले ह्रेंगो आरे। 28 तलेबिस्याँ म्हि घ्रिइ बिब् धोंले,
‘ङ्यो खीउँइँलेन् सोमुँ, खीउँइँलेन् प्रब-टिब लमुँ, धै खीउँइँलेन् ङ्योइ छ्ह योंम्।’
क्हेमैंए कबिता प्ह्रिबै म्हिमैंज्यै या छान् बिसि प्ह्रिइमुँ:
‘क्ह्रोंसेंन ङ्यो खीए सन्तान्मैं ग।’
29 छले ङ्यो परमेश्वरए सन्तान तबइले खी मारा-चाँदि नेरो युँमा धों तबन् ग बिसि ङ्योइ मैंल् आत। तलेबिस्याँ चु सैमैं म्हिमैंइ सैंर मैंसि चमैंए योर्बै सिपउँइँले बनेबै सैमैं मत्त्रेन् ग। 30 छतसि म्हिमैंइ ओंसोंन् परमेश्वर ङो आसेमा लबै केमैं खीजी वास्ता आल। तारे परमेश्वरजी ताँन् क्ल्ह्योर्बै म्हिमैंइ ह्रों-ह्रोंसइ लबै पाप केमैं पिसि परमेश्वरउँइ सैं एद् बिसि बिइमुँ। 31 तलेबिस्याँ खीजी ह्युलर्बै ताँन् म्हिमैंए निसाफ लबै त्हिंइ तोक्दिमिंइँमुँ। च त्हिंइर खीजी त्हाँबै म्हि घ्रिउँइँले ह्युलर्बै ताँन् म्हिमैंए निसाफ लब्मुँ। च म्हिने निसाफ लबै हग मुँ बिसि प्रमाण ताँनने उँइमिंबर परमेश्वरजी च म्हि सिबउँइँले सोगों लमिंइ।”
32 म्हि सिसि धबै सोगों तबै ताँ थेसि चमैं न्होंर्बै को-कोइ बिल्लि लइ। दिलेया अरूमैंइ बिइ, “चु ताँए बारेर क्हिए ताँ धबै ङि थेब्मुँ।” 33 च लिउँइ पावल चमैंउँइँले ह्याइ। 34 पावलइ बिबै ताँ क्वेंसि को-कोइ म्हिमैं चने बालुन् ह्याइ। चमैंए न्होंरि म्हि च्होंर्बै डियनुसियस बिबै म्हि, दामारिस बिबै च्हमिरि, नेरो अरू म्हिमैंज्यै या प्रभुए फिर बिश्वास लइ।