1 चु खैला-बैला च्याँ तबै लिउँइ पावलइ चर्बै चेलामैं हुइसि चमैंलाइ अर्थि पिंइ। धै चमैंने फ्रेसि माकेडोनिया ह्‍युलउँइ ह्‍याइ। 2 च क्ल्ह्‍योजरे या चेलामैंए सैं क्होबै ताँ बिमिंसि च ग्रिस बिबै ह्‍युलर ह्‍याइ। 3 पावल चर म्हैंन सोंल् समा टिइ। धै क्यु झाजर क्रेसि सिरिया ह्‍युलउँइ ह्‍याबर होंमा यहूदीमैंइ चए बिरोधर जाल लइमुँ बिब् सेसि पावल माकेडोनिया तसिन् एह्‍याबै सैं लइ। 4 झाइले पावलने बालु बेरियाथें पुरसए च्ह सोपात्रोस, थेसलोनिकाथेंमैं अरिस्‍तार्खस नेरो सिकन्‍दस, डर्बिथें गायस, तिमोथी, नेरो एशियाथेंमैं तुखिकस नेरो त्रोफिमस ह्‍याइ। 5 ङि ह्‍याब् भन्दा ओंसोंन् चमैं ह्‍यासि त्रोआस बजारर ङि पैंरिल। 6 ङि बिस्याँ प्लेढा आझोंबै क्हें चबै त्हिंइए लिउँइ फिलिप्‍पी शहारउँइँले क्यु झाजर क्रेसि ङ्‍हरोर त्रोआस बजारर चमैं ङाँर फेखइ, धै चर ङि ङिरो टिइ।

7 आइतबार त्हिंइर ङि प्रभु भोज चबर खागु तमा पावलइ प्हँन्हाँग्धों ह्‍याबै सैं लबइले म्‍हुँइँस आधा समन् चमैंने बालु ताँमैं सेरिल। 8 ङि खागु तबै फिर्बै कोठर ल्हें बत्तिमैं म्रोल। 9 युटिकस मिं मुँबै फ्रेंसि घ्रि झ्यालर क्हुँल। पावलइ ल्हें त्हे समा ताँ लरिमा चलाइ न्हरु खइ। न्हरुइ लमा च तल सोंउँइँले तेयाइ। च रेबर ह्‍यामा च सियाल् खाँना। 10 छतमा पावल क्युरु तयुसि चए फिर पत्खु तसि अँगलो झोंसि “क्हेमैं आआतिद्। चु सोगोंन् मुँ!” बिइ।✡20:10 १ म्रुँ १७:१७-२३; २ म्रुँ ४:३२-३६ 11 झाइले पावल फिर क्रेयासि क्हें चुसि प्रभु भोज चल् खाँबै लिउँइ न्हाँगर मि आम्रोंन् समा ल्हें त्हे ताँ लसि टिइ, धै च लिउँइ फ्रेयाइ। 12 धै चमैंइ च फ्रेंसिलाइ सोगोंन् धिंर बोसि चमैं ताँन् सैं तोंइ।

13 पावल प्हलेइ प्रसि ह्‍याबै सैं लमा खिइ बिब् धोंले ङि ओंसोंन् क्यु झाज मुँबै क्ल्ह्‍योर ह्‍याइ, धै क्यु झाजर क्रेसि ङि अस्‍सोसर ह्‍याइ। ङिइ अस्‍सोसर पावललाइ क्यु झाजर क्रेमिंदा ङ्हाँल। 14 दिलेया च अस्सोसर समा प्हलेइ प्रसिन् खइ, धै ङिइ खीलाइ क्यु झाजर क्रेमिंसि ङि ताँन् मितिलेनेर खइ। 15 च क्ल्ह्‍योउँइँले क्यु झाजर क्रेसि प्हँन्हाँग्धों खियस टापूए रेर फेखइ, धै नुँइम्धों सामोस टापूर फेखइ। चए सोंजमा ङि मिलेटस नाँसर खइ। 16 पावल खाँन् समा पेन्‍तिकोसए त्हिंइर यरूशलेमर्न फेबै सैं लबइले च एशिया ह्‍युलर टिबै सैं आल। छतसि च एफिससर आहोंल्‍ले ह्‍याबै सैं लइ।

17 पावलइ मिलेटसउँइँले एफिससर मुँबै चर्चर्बै एल्डरमैं हुइबर म्हिमैं कुलइ। 18 चमैं खबै लिउँइ खिइ चमैंने बिइ:

“ओ अलि-अङाँमैं ङइ एशिया ह्‍युलर*20:18 एशिया ह्‍युलर एफिसस बिस्या एशिया ह्‍युलर्बै थेबै सहर मुँल। प्हले म्हैबै त्हिंइ ओंनोंन् ङइ क्हेमैंए म्हाँजोर खैले त्हिंइ थोइ बिब क्हेमैंइ सेइमुँ। 19 च्योंने तसि मिक्लि पिदै यहूदीमैंइ लबै जाल झेलर ने दुःख कष्‍टरै या ङइ प्रभुए सेवा लइ। 20 क्हेमैंए ल्हागिर छ्याँब तबै ताँमैं ताँनए उँइँर बिमिंबर नेरो धिं-धिंर ह्‍यासि क्हेमैं लोमिंबर ङ लिलि आस्यो। 21 यहूदीमैं नेरो ग्रिकमैंने पाप केमैं पिसि परमेश्‍वरउँइ सैं एद् धै ङ्योए प्रभु येशूए फिर बिश्‍वास लद् बिसि ङइ ग्वाइ पिंइँमुँ।

22 “तारे पबित्र प्ल्हजी खैलसे या यरूशलेमउँइ ह्‍याद् बिबइले ङ चर ह्‍यासिन् मुँ। चर ङए फिर तो तम् बिब ङइ आसे। 23 चर्बै म्हिमैंइ ङ झेलर च्युवाब्मुँ धै ङए फिर दुःख खब्मुँ बिसि पबित्र प्ल्हजी ताँन् सहरर ङने था पिंइँमुँ, च्हौ मत्‍त्रे ङइ सेइमुँ। 24 दिलेया ङइ ह्रोंसए छ्ह ह्रोंसए ल्हागिर तोइ सैइ आमैं। बरु परमेश्‍वरजी म्हिमैंए फिर दयाम्हाँया लबै बारेर सैं तोंबै ग्वाइ बिप्रबर प्रभु येशूजी पिंबै के ङइ ताँन् लल् खाँरिगे बिब् मत्‍त्रे ङइ मैंम्।✡20:24 २ तिमो ४:७-८

25 “क्हेमैंए म्हाँजोर ङइ परमेश्‍वरए ग्याल्सर्बै ताँ बिदै प्रइ, तारे क्हेमैंइ ङ धबै खोंयोंन् बिलै म्रोंरिब् आरे बिसि ङइ सेइमुँ। 26 छतसि तिंयाँन् ङइ क्हेमैंने ग्वाइ पिंसि बिमुँ, क्हेमैं न्होंरि खाबै या नर्गर फेस्‍याँ ङ चए दोषि तरिब् आरे। 27 तलेबिस्याँ परमेश्‍वरजी ङ्योए ल्हागिर लमिंबै केमैंए बारेर ङइ क्हेमैंने तोन्दोंरि ताँ बिल् खाँइँमुँ। 28 तारे क्हेमैं ह्रोंसै या न्ह क्रों मि क्रोले टिद्, धै पबित्र प्ल्हजी क्हेमैंने जिम्मा पिंबै बगालै या छेनाले ङ्‍ह्‍योद्। प्रभु येशूजी ह्रोंसए को पिंसि परमेश्‍वरए चर्च किंब् ग। छतसि चए छैं छेनाले लद्। 29 ङ ह्‍याबै लिउँइ ङ्हिंन् ङ्हाँबै प्याउँमैं धों तबै म्हिमैं क्‍हेमैंए म्‍हाँजोरि खसि बिश्‍वासीमैंलाइ ल्हें दुःख पिंब्‍मु। 30 क्‍हेमैंए न्होंउँइँलेन् स्‍योर ताँमैं पोंबै म्हिमैं रेसि चेलामैं चमैंए लिलि बोयाब्मुँ। 31 छतसि चु ताँ मैंसि छेनाले टिद्! सोंदिं समन् त्हिंयाँ म्‍हुँइँसा मिक्लि पिंदै ताँन् म्हिमैंने ङइ लोमिंबै ताँ आम्‍लेद्।

32 “तारे ङइ क्‍हेमैंलाइ परमेश्‍वरए जिम्‍मार सुम्‍पिदिइमुँ। खीए दयाम्हाँयाए बारेर्बै ताँइ क्‍हेमैंए सैं भोंब् लमिंल् खाँम्, झाइले खीए म्‍हिमैंए फिर पूरा आशिक पिंब्‍मुँ। 33 ङइ खाबलै या मारा, चाँदि नेरो क्वेंए लोब आल। 34 दिलेया ङए योइन ङला नेरो ङने मुँब्मैंए चैदिबै सैमैं योल् लइमुँ बिसि क्हेमैंइ सेइमुँ। 35 प्रभु येशूजी बिबै चु ताँ मैंन्, ‘किंबै म्हि भन्दा पिंबै म्हिइ आशिक् योंम्।’ छतसि क्हेमैंज्यै या बेल्‍ले भोंले के लसि भों आरेब्मैं ल्होल् त्हुम् बिसि क्हेमैंए उँइँर्न ङइ के लसि नमुना उँइँमिंइँमुँ।”

36 पावलइ च्हौ बिसि च्हि तुँसि चमैंने बालु प्राथना लइ। 37 झाइले चमैं ताँन् क्रोसि पावलने अँगलो झोंसि म्वें लइ। 38 “तारे क्हेमैंइ ङ म्रोंरिब् आरे” बिबै पावलए ताँ मैंसि चमैंए सैं बेल्‍ले क्रोइ। च लिउँइ चमैंइ चलाइ क्यु झाज क्रेबै क्ल्ह्‍यो समा सनेइ।