23
1 पावलइ थेबै म्हि च्हों ङाँइ ङ्ह्योसि बिइ, “ओ आघें-अलिमैं, तिंयाँबै त्हिंइ समा परमेश्वरए उँइँरि ङइ छ्याँबै छ्ह थोइमुँ बिसि ङए सैंइ बिम्।”
2 पावलए ताँ थेसि ख्रो पिंबै खेगि क्रथे हननियाइ*23:2 चु कितबरि हननिया सों मुँ, म्हि स्यो स्यो मुँ। हननिया घ्रिइ परमेश्वरने स्योर तेसि सियाइ (५:१-५); धै हननिया बिबै दमस्कसथें घ्रिइ शाऊल ङाँर ह्यासि प्राथना लइ (९:१०-१८); धै हननिया बिबै ख्रो पिंबै खेगि क्रथे घ्रिइ म्हि च्होंरि “पावलए सुँर प्रिंन्” बिइ (२३:२; २४:१)। पावलए ङाँर रारिबै म्हिमैंने “चए सुँर प्रिंन्!” बिइ।
3 छबिमा पावलइ चने बिइ, “ओ सुँइ छ्याँब लब सैंइ बिस्याँ आछ्याँब मैंबै म्हि!†23:3 ओ सुँइ छ्याँब लब सैंइ बिस्याँ आछ्याँब मैंबै म्हि! ग्रिक क्युइरि, ओ तार्ग्या कमेरइ स्यालबै भेत्ता! क्हिलाज्यै या परमेश्वरजी प्रिंब्मुँ। क्हि परमेश्वरए ठिमइ बिब् धोंले ङए निसाफ लबर टिसि ठिमए बिरोधर ङलाइ प्रिंबर ल्हैदिम्मा?”✡23:3 मत्ती २३:२७,२८
4 चु ताँ थेसि पावलए ङाँर रारिब्मैंइ पावलने बिइ, “क्हि परमेश्वरए मिंर ख्रो पिंबै खेगि क्रथेने म्हि आच्हिल्ले पोंम्मा?”
5 पावलइ बिइ, “ओ अलिमैं, चु ख्रो पिंबै खेगि क्रथे ग बिसि ङइ आसेल। ‘क्हिइ ह्रोंसए म्हिमैंए चिबए फिर आछ्याँबै ताँ आपोंन्।’✡23:5 प्रस २२:२८ बिसि ठिमर प्ह्रिथेंइँमुँ।”
6 च थेबै म्हि च्होंर सदुकीमैंए टोलि नेरो फरिसीमैंए टोलि मुँना बिब सेसि पावलइ थेबै कैले बिइ, “ओ अलिमैं, ङम् फरिसीमैंए च्ह फरिसीन् ग। म्हि सिइरि धबै सोगों तब्मुँ बिबै आशा ङइ थेंबइले ङए फिर चु मुद्दा ल्हैदिइमुँ।”✡23:6 चिब्मैं २६:५; फिलि ३:५
7 चइ छ बिबै लिउँइ फरिसीमैं नेरो सदुकीमैंए सैं ख्रेलेयासि चमैं आक्ह्रि। 8 तलेबिस्याँ सदुकीमैंइ म्हि सिइरि धबै सोगों आत, स्वर्गदूत नेरो प्ल्ह बिब तोइ या आत बिमल। दिलेया फरिसीमैंइ चु ताँन् सैमैं तम् बिसि क्वेंमल।✡23:8 मत्ती २२:२३; मर्क १२:१८; लूक २०:२७ 9 चर थेबै खैला-बैला तमा फरिसीमैं न्होंर्बै को-कोइ शास्त्रिमैंइ रेसि “चु म्हिने ङिइ तोइ दोष आयों। प्ल्ह नेरो स्वर्गदूतइ चुने पोंइ बिस्याँ तो तइ दि?” बिइ। 10 छले चमैंए सैं ख्रेलसि चर थेबै खैला-बैला तबइले “चमैंइ पावल लाछिवाम्दो!” बिब् मैंसि रोमी पल्टनर्बै चिबइ सिपाइमैंने “क्युरु ह्यासि चमैंए म्हाँजोउँइँले पावल पखसि ब्यारेक न्होंर बोद्,” बिसि ल्हैदिइ।
11 चए प्हँन्हाँग्धों म्हुँइँसर प्रभुजी पावल ङाँर रासि बिइ, “आङ्हिंन्, तलेबिस्याँ क्हिइ यरूशलेमर ङए बारेर ग्वाइ पिंब् धोंले रोम शहाररै या ग्वाइ पिंल् त्हुम्।”
पावललाइ सैबर जाल लब
12 न्हाँगर मि म्रोंबै लिउँइ यहूदीमैंइ खेंमैंए न्होंर मत फैसि “पावल आसैन् समन् ङि तोइ आच तोइ आथुँ,” बिबै कसम चइ। 13 छाबै जाल रोसि सैवाम् बिबै म्हिमैं प्लिच्यु भन्दा ल्हें मुँल। 14 च लिउँइ चमैं ख्रो पिंबै खेगि चिब्मैं नेरो चिबनाँब्मैं ङाँर ह्यासि बिइ, “पावल आसैन् समा ङि तोइ आच बिसि कसम चइमुँ। 15 छतसि क्हेमैं नेरो थेबै म्हि च्हों क्ह्रिसि रोमी पल्टनर्बै चिब ङाँर ह्यासि ‘पावलए फिर ल्हैदिबै मुद्दाए ताँर छेनाले फैसला लल् त्हुम्,’ बिसि स्योर तेसि बिद्। धै ‘चलाइ ब्यारकउँइँले तेइ पउ,’ बिद्। पावल चुर फेखउनो ङिइ च सैम्।”
16 चमैंइ छले जाल रोबै ताँ था योंसि पावलए भान्जइ ब्यारेक न्होंर ह्यासि चु ताँ पावलने बिइ। 17 झाइले पावलइ कप्तानमैं न्होंर्बै म्हि घ्रि हुइसि बिइ, “चु कोलो पल्टनर्बै चिब ङाँर सथेमिंन्, तलेबिस्याँ चुइ चिबने तोइ ताँ बिदा ङ्हाँइँमु रो।”
18 छबिमा कप्तानइ च कोलो चिब ङाँर बोसि बिइ, “ओ चिब, झेल न्होंर मुँबै पावलइ ङ हुइसि चु कोलो क्हि ङाँर बोमिंन् बिइ। चुइ क्हिने बिल् त्हुबै ताँ मुँ रो।”
19 चिबइ च कोलोए यो क्हासि तिराइ बोसि “क्हिइ ङने बिल् त्हुबै ताँ तो जा?” बिसि ङ्योएइ।
20 च कोलोइ बिइ, “पावलए बारेर छेनाले ताँमैं ङ्योएबै निउँ लसि ‘चलाइ प्हँन्हाँग थेबै म्हि च्होंर पखमिंन्’ बिसि क्हिने बिबर यहूदीमैंइ मत लसि क्ह्रिइमुँ। 21 दिलेया क्हिइ चमैंए ताँ आङिंन्, तलेबिस्याँ चमैं न्होंर म्हि प्लिच्यु भन्दा ल्हेइ ‘च आसैन् समा ङि तोइ आच तोइ आथुँ!’ बिबै कसम चसि च सैबर क्ह्वेइ टिइमुँ। चमैंइ क्हिइ तो बिब् ङ्हे बिसि ह्रेरिइमुँ।”
22 चु ताँ थेसि पल्टनर्बै चिबइ “क्हिइ ङने बिबै चु ताँ खाब्ने या आबिद्,” बिसि च कोलोलाइ कुलइ।
पावललाइ कैसरियार कुलब
23 च लिउँइ पल्टनर्बै चिबइ कप्तानमैं न्होंर्बै म्हि ङ्हिं हुइसि बिइ, “तिंयाँ म्हुँइँसर्बै कु ह्राबै त्हेजरे सिपाइमैं ङ्हिंब्ब्रा, घोडा क्रेब्मैं ङिच्यु, धै बर्षा छेब्मैं ङ्हिंब्ब्रा कैसरियार ह्याबै ल्हागिर तयार लद्।” 24 झाइले पावलए ल्हागिरै या घोडा म्हैदु धै चलाइ छेनाले क्रथे फेलिक्स ङाँर सने। 25 च्हौ बिल् खाँसि चइ छाबै प्ह्रिछ्या या प्ह्रिइ:
26 “ओ चिब, क्रथे फेलिक्स, ङ क्लौडियस लुसियसउँइँले छ्याज्यालो मुँ! 27 यहूदीमैंइ चु म्हि क्हासि सैबर म्हैल, दिलेया च रोमी नागारिक मुँना बिब ङइ सेइ। छतसि ङ सिपाइमैं बोसि चलाइ जोगेमिंइ। 28 चुमैंइ तो ताँर चए फिर छ्याब् ल्हैदिगे बिसि क्होबर ङइ चु म्हि यहूदीमैंए थेबै म्हि च्होंर बोइ। 29 चमैंइ खेंमैंए ठिमर्बै ताँर चए फिर छ्याब् ल्हैदिना, दिलेया म्हिन् सैल् त्हुब नेरो झेलर च्युल् त्हुब तोइ छ्याब् ङइ आस्या। 30 चु म्हिए बिरोधर जाल लसिन् मुँ बिबै ताँ ङइ सेसि चलाइ क्हि ङाँर कुल्मिंइँमुँ। चए बिरोधर छ्याब् ल्हैदिब्मैं या क्हिए उँइँर ताँ लद् बिसि ङइ चुर्बै यहूदीमैंने बिइमुँ।”
31 पल्टनर्बै चिबइ बिब् धोंले सिपाइमैंइ पावल म्हुँइँसर्न एन्टिपाट्रिस बिबै नाँसर सनेइ। 32 प्हँन्हाँग्धों प्हलेइ प्रयाबै सिपाइमैंइ पावललाइ घोडा क्रेबै सिपाइमैंए जिम्मार पिंथेंसि यरूशलेमर्बै ब्यारेकर एखइ। 33 घोडा क्रेबै सिपाइमैं कैसरियार फेबै लिउँइ रोमी क्रथे फेलिक्सने प्ह्रिछ्या पिंसि पावल या चए जिम्मर्न पिंइ। 34 क्रथेइ प्ह्रिछ्या खेल् खाँसि पावलने “क्हि खाब् ह्युलर्बै जा?” बिसि ङ्योएइ। धै पावलइ “ङ किलिकिया ह्युलर्बै म्हि ग,” बिइ।
35 छतमा क्रथेइ पावलने “क्हिए फिर छ्याब् ल्हैदिब्मैं खबै लिउँइ क्हिए ताँ थेस्यो!” बिसि “चुलाइ बोसि हेरोदइ बनेबै दरबारर थेंन्,” बिसि सिपाइमैंने ल्हैदिइ।
*23:2 23:2 चु कितबरि हननिया सों मुँ, म्हि स्यो स्यो मुँ। हननिया घ्रिइ परमेश्वरने स्योर तेसि सियाइ (५:१-५); धै हननिया बिबै दमस्कसथें घ्रिइ शाऊल ङाँर ह्यासि प्राथना लइ (९:१०-१८); धै हननिया बिबै ख्रो पिंबै खेगि क्रथे घ्रिइ म्हि च्होंरि “पावलए सुँर प्रिंन्” बिइ (२३:२; २४:१)।
†23:3 23:3 ओ सुँइ छ्याँब लब सैंइ बिस्याँ आछ्याँब मैंबै म्हि! ग्रिक क्युइरि, ओ तार्ग्या कमेरइ स्यालबै भेत्ता!
✡23:3 23:3 मत्ती २३:२७,२८
✡23:5 23:5 प्रस २२:२८
✡23:6 23:6 चिब्मैं २६:५; फिलि ३:५
✡23:8 23:8 मत्ती २२:२३; मर्क १२:१८; लूक २०:२७