1 छबिमा याहवेहजी मोशाने बिइ, “थेद्, ङइ फारोए ल्हागिर क्हि परमेश्‍वर धोंन् लमिंइमुँ, धै क्हिए आघें हारून क्हिए ताँ पोंमिंबै म्हि तब्मुँ। 2 ङइ क्हिने बिबै ताँन् ताँमैं क्हिइ क्हिए आघें हारूनने बिद्, धै क्हिए आघें हारूनइ इस्राएलीमैंलाइ ह्रोंसए ह्‍युलर ह्‍याल् पिंन् बिसि फारोने बिब्मुँ। 3 दिलेया ङइ फारोए सैं सारो लवाब्मुँ। धै ङइ ङ्हिंन् ङ्हाँन् तबै औदिबै चिनुमैं ल्हें लमिंब्मुँ।✡7:3 चिब्मैं ७:३६ 4 दिलेया फारोइ क्हेमैंए ताँ थेरिब् आरे। छतमा ङइ ङए शक्‍ति मिश्र ह्‍युलर उँइँब्मुँ। धै छेनाले निसाफ लसि ङए म्हिमैं मिश्रउँइँले तेइ पखब्मुँ। 5 ङइ मिश्र ह्‍युलर ह्रोंसए यो क्वेसि चमैंए म्हाँजोउँइँले इस्राएलीमैं तेइ पखब्मुँ। छलमा मिश्रीमैंइ ङ याहवेह मुँना बिसि सेब्मुँ।”

6 याहवेहजी मोशा नेरो हारूनने बिब् धोंलेन् चमैंइ लइ। 7 फारोने ताँ लमा मोशा प्रेच्यु बर्षर्बै नेरो हारून प्रेच्युसे सोंदिर्बै मुँल।

8 झाइले याहवेहजी मोशा नेरो हारूनने बिइ, 9 “फारोइ क्हेमैंने ‘औदिबै के लसि उँइँन्’ बिमा, क्हिइ हारुने ‘प्हरे फारोए उँइँर भ्योंवाँन्’ बिदु, धै च प्हरे प्हुरि तब्मुँ।” 10 छतसि मोशा नेरो हारून फारो ङाँर ह्‍यासि याहवेहजी बिब् धोंलेन् हारूनइ ह्रोंसए प्हरे किंसि फारो नेरो चए म्हिमैंए ओंसों भ्योंवामा प्हरे प्हुरि तयाइ। 11 छतमा फारोज्यै या ह्रोंसए ह्रब सेब्मैं नेरो टुना मुना लब्मैं हुइबर कुलइ। धै च मिश्रर्बै जादु लब्मैंज्यै या ह्रों-ह्रोंसए न्होंर्बै सिपउँइँले छान् लइ। 12 ताँनइ ह्रों-ह्रोंसए प्हरे भ्योंवामा प्हुरि तयाइ। दिलेया हारूनए प्हरेइ चमैंए प्हरे क्ल्ह्‍योंवाइ। 13 दिलेया फारोए सैं सारो तइ। धै याहवेहजी बिब् धोंलेन् फारोइ चमैंए ताँ आथे।

14 झाइले याहवेहजी मोशाने बिइ, “फारोए सैं सारो तइमुँ। छतसि चइ म्हिमैं ह्‍याल् आपिं। 15 न्हाँकर्न फारो नील स्योंउँइ ह्‍यारिबै त्हेर क्हि च प्हुरि तबै प्हरे बोसि नील स्योंए तिरर चने त्होबर रारिद्। 16 झाइले चने छ बिद्, ‘हिब्रूमैंए याहवेह परमेश्‍वरजी ङलाइ क्हि ङाँर कुलइमुँ। खीजी क्हिने “ङए म्हिमैंलाइ क्यु आयोंबै क्ल्ह्‍योर ङए सेवा लबर ह्‍याल् पिंन्!” बिइ। दिलेया तोगो समा क्हिइ ह्‍याल् आपिं। 17 छतसि “ङ्‍ह्‍योद्, ङइ नील स्योंर्बै क्यु ङए योर्बै प्हरेइ प्रिंब्मुँ। धै च को तयाब्मुँ। छले ङ याहवेह ग बिबै ताँ क्हिइ सेब्मुँ।✡7:17 दर्शन १६:४ 18 झाइले स्योंर्बै ताँगमैं सियाब्मुँ, धै स्यों बेल्‍ले थाँ नाँबइले मिश्रीमैंइ चर्बै क्यु थुँल् खाँरिब् आरे,” बिसि याहवेहजी बिइमुँ।’ ”

19 धबै याहवेहजी मोशाने बिइ, “ ‘मिश्ररर्बै स्यों, क्युखादुँ, ङ्‍ह्‍योखो, नेरो कुलोर्बै क्यु को तयारिगे बिसि क्हिए प्हरे किंसि च ताँनए फिर क्हिए यो स्योंन्,’ बिसि हारूनने बिद्। ‘छलस्याँ ताँन् मिश्रर मुँबै क्यु, सिं नेरो युँमाइ बनेबै छेदो न्होंर्बै क्युमैं या, को तयाब्मुँ।’ ”

20 झाइले मोशा नेरो हारूनइ याहवेहजी बिब् धोंलेन् लइ। फारो नेरो चए के लब्हिमैंए उँइँर्न हारूनइ प्हरे नील स्योंए क्युर प्रिंमा ताँन् क्यु को तयाइ। 21 नील स्योंर्बै ताँगमैं सियासि स्यों थाँ नाँबर होंइ, धै मिश्रर्बै ताँन् क्यु को तयाबइले मिश्रीमैंइ स्योंर्बै क्यु थुँल् आखाँल।

22 दिलेया मिश्रर्बै जादु लब्मैंज्यै या ह्रोंसए न्होंर्बै सिपउँइँले छान् लइ। याहवेहजी बिब् धोंलेन् फारोए सैं सारो तसि चमैंए ताँ आथे। 23 च्हौ थेबै दुःख तलेया तो तल् तरिगे बिसि फारो ह्रोंसए दरबारर एह्‍याइ। 24 नील स्योंर्बै क्यु थुँल् आखाँबइले ताँन् मिश्रीमैंइ नील स्योंए रेजरे थुँबै क्युए ल्हागिर ताबर होंइ।

25 याहवेहजी नील स्योंर्बै क्यु को लमिंसि ङिगें तइ।