15
मोशाइ प्रिंबै क्वे
1 झाइले मोशा नेरो इस्राएलीमैंइ याहवेहए ल्हागिर चु क्वे प्रिंइ:
“ङ याहवेहए ल्हागिर क्वे प्रिंब्मुँ, तलेबिस्याँ खीजी थेबै लडें लसि ट्होइमुँ।
खीजी घोडा नेरो चए फिर क्रेब्मैं मा ङ्युँइर (समुन्द्रर) भ्योंमिंइमुँ।✡15:1 प्रस १५:३
2 याहवेहन् ङए शक्ति ग, ङलाइ जोगेमिंब खीन् ग,
छतसि ङ खीलाइ क्वे प्रिंब्मुँ।
खी ङए परमेश्वर ग, ङ खीए सेवा लब्मुँ,
खी ङए खेमैंए परमेश्वर ग, ङ खीए मिं थेब् लब्मुँ।✡15:2 भज ११८:१४; यशै १२:२
3 याहवेहन् ल्हडेंर नेमुँ,
खीए मिं याहवेह ग।
4 “खीजी फारोए रथमैं नेरो चए सिपाइमैं या मा ङ्युँइर भ्योंमिंइमुँ।
फारोए धाँसे थेबै चिबनाँब्मैं ओल्ग्या मा ङ्युँइर (समुद्रर) प्ल्हुँयाइ।
5 गैरु क्युइ चमैंलाइ हुवाइ।
चमैं युँमा धोंले गैरुर प्ल्हुँयाइ।
6 “ओ याहवेह, क्हिए क्योलो यो बेल्ले भोंब् मुँल।
ओ याहवेह, क्हिए क्योलो योइ शत्तुरमैं त्हुला भुँ लवाइ।
7 क्हिजी ल्हडेंर ट्होवाँइले क्हिए बिरोधर राब्मैं क्युरु खारमिंइ।
क्हिजी ह्रोंसए मि धोंबै ह्रिस उँइँमिंइ,
च ह्रिसइ चमैंलाइ पराल धोंले ख्रोंवाइ।
8 क्हिए नखुँर्बै सोइ फुइमा क्युए थुप्रो तयाइ।
प्ल्होंखबै क्यु क्ल्ह्यो घ्रिर्न थुप्रो तसि बान्नों धोंले राइ।
गैरु क्यु मा ङ्युँइए म्हाँजोर चाँयाइ।
9 शत्तुरइ बिइ, ‘ङइ चमैं ल्हासि स्याब्मुँ,
लुडिबै सैमैं ङ चुब्मुँ, च लुडिबै सैमैंउँइँले तो लदा ङ्हाँमुँ च ङ किंब्मुँ।
ङइ ङए सेलाँ (तरवार) ट्हुइसि चमैं सैवाब्मुँ।’
10 दिलेया क्हिजी ह्रोंसए सो फुइमा मा ङ्युँइ (समुन्द्रइ) चमैं हुवाइ।
बेल्ले भोंबै मा ङ्युँइर चमैं पैए सिसा धोंले प्ल्हुँयाइ।
11 “ओ याहवेह, देवतामैं न्होंर क्हि धों तब खाब् मुँ?
बेल्ले पबित्र, बेल्ले मान लल् त्हुब,
औदिबै के लबर क्हि धों तब खाब् मुँ?
12 क्हिजी क्हिए क्योलो यो स्योंमा
पृथ्बीइ चमैं क्ल्ह्योंवाइ।
13 क्हिए खोंयोंन् बिलै आखाँबै म्हाँयार क्हिजी मिश्रउँइँले फ्रेमिंबै म्हिमैं डोरेब्मुँ।
क्हिजी ह्रोंसए भोंउँइँले चमैं क्हिए पबित्र क्ल्ह्योर डोरेब्मुँ।
14 ह्रें-ह्रेंमैंइ क्हिए बारेर थेसि त्हारब्मुँ।
पलिश्त ह्युलर टिब्मैं ङ्हिंसि न्हुँ खब्मुँ।
15 एदोमर्बै क्र थेब्मैं ङ्हिंब्मुँ,
मोआबर्बै चिब्मैं त्हारब्मुँ।
कनानर टिबै ताँन् म्हिमैं भों आरेब् धोंन् तयाब्मुँ। 16 ओ याहवेह, क्हिए म्हिमैं क्योंजा अतर्दिन् समा
क्हिजी मिश्रउँइँले फ्रेसि पखबै म्हिमैं क्योंजा आह्यान् समा,
च ह्रेंमैं ङ्हिंसि त्हारमा
क्हिए योर्बै भोंजी चमैं युँमा धोंले क्ल्ह्यो घ्रिर्न टिम्।
17 क्हिजी क्हिए म्हिमैं पखसि ह्रोंसए कोंर थेंब्मुँ।
ओ याहवेह, च क्ल्ह्योर्न क्हिए ल्हागिर टिबै क्ल्ह्यो बनेइ,
ओ याहवेह, च पबित्र क्ल्ह्यो क्हिए योजीन् बनेइ।
18 याहवेहजी खोंयोंइ बिलै ग्याल्स लरिब्मुँ।”
मिरियमइ याहवेहए मिं क्वेब
19 इस्राएलीमैं मा ङ्युँइए म्हाँजोउँइँले क्यु आरेबै सर प्रसि ह्याइ, दिलेया फारोए घोडामैं, रथमैं नेरो घोडा फिर क्रेब्मैं मा ङ्युँइर (समुन्द्रर) होंमा याहवेहजी चमैं फिर मा ङ्युँइए क्यु एपखइ।
20 छतमा अगमबक्तास्यो मिरियम, हारूनए आनाइ, योर खैंचडी किंमा ताँन् च्हमिरिमैं या खैंचडी किंसि सेदै चए लिलि त्होंइ। 21 मिरियमइ छ बिदै क्वे प्रिंबर होंइ,
“याहवेहए मिंर क्वे प्रिंले, तलेबिस्याँ खीजी औदिबै के लसि ट्होइमुँ।
घोडा नेरो चए फिर क्रेब्मैं खीजी मा ङ्युँइर (समुन्द्रर) भ्योंवाइमुँ।”
मारा नेरो एलीम बिबै क्ल्ह्योर्बै क्यु
22 छ तबै लिउँइ मोशाइ इस्राएलीमैं काँसए घारि मुँबै मा ङ्युँइउँइँले डोरेसि बोइ। चमैं शूर बिबै क्यु आरेबै क्ल्ह्योउँइ ह्यामा चमैंइ सोंरो समा प्रमा चमैंइ क्यु आयों। 23 झाइले मारा बिबै क्ल्ह्योर त्होंखबै लिउँइ चमैंइ मारार्बै क्यु थुँल् आखाँ, तलेबिस्याँ चर्बै क्यु काँब मुँल। (छतसि चए मिं मारा (काँब) तइ। 24 छतसि म्हिमैंइ “ङि तो थुँब?” बिसि मोशाने गनगन लबर होंइ। 25 छतमा मोशाइ याहवेह परमेश्वरने प्राथना लमा याहवेहजी चने सिंए म्हुँडा घ्रि उँइँमिंइ, धै चइ सिंए म्हुँडा क्युर झोंमा क्यु लिंब तइ।
याहवेहजी च क्ल्ह्योर्न चमैंए छ्ह थोबै ल्हागिर ठिममैं पिंसि चर्न खीजी चमैंए जाँच लइ। 26 खीजी बिइ, “क्हेमैंइ ङए ताँ छेनाले थेसि ङइ बिबै ताँन् ताँमैं नेरो ङए ठिममैं म्हाँदिइ बिस्याँ, ङइ मिश्रीमैं फिर कुलब् धों तबै नब-छबमैं घ्रि या क्हेमैंए फिर कुलरिब् आरे, तलेबिस्याँ क्हेमैं सल् लबै याहवेह ङन् ग।”
27 झाइले चमैं एलीम बिबै क्ह्ल्योर फेखइ, चर च्युसे ङ्हिं क्युए मुल नेरो ङिच्यु खजूरए धुँमैं मुँल। चमैंइ च क्यु ङाँर्न प्ह्रों बनेसि टिइ।