1 ताँन् इस्राएलीमैं सिनए क्यु आयोंबै क्ल्ह्‍योउँइँले याहवेहजी बिब् धोंलेन् क्ल्ह्‍यो-क्ल्ह्‍योर ह्‍यासि रपिदिम बिबै क्ल्ह्‍योर ब्यारेक लइ। चर चमैंइ प्ह्रों बनेइ, दिलेया चर म्हिमैंए ल्हागिर थुँबै क्यु आरेल। 2 छतमा चमैंइ मोशाने ह्रिस खसि बिइ, “ङिलाइ थुँबै क्यु पिंन्।”

छबिमा मोशाइ चमैंने बिइ, “क्हेमैं तले ङने ह्रिस खमुँ? क्हेमैं तले याहवेहए जाँच लमुँ?”

3 दिलेया म्हिमैंलाइ क्यु पिइ, छतसि चमैंइ मोशाने बालु गनगन लइ, “क्हिइ ङि, ङिए प्हसेमैं नेरो खेदोमैं क्यु थुँल् आयोंल्‍ले सैबर तले मिश्रउँइँले चुर पखल?”

4 छबिमा मोशाइ याहवेहने “ङ चु म्हिमैंलाइ तो लब? चुमैंइ ङ युँमाइ ल्हिल् म्हैमुँ!” बिसि प्राथना लइ।

5 छ लमा याहवेहजी मोशाने बिइ, “इस्राएलीमैंए चिबनाँब्मैं न्होंर्बै को-कोइ नेरो क्हिइ नील स्योंर ल्हिबै प्हरे योर किंसि म्हिमैंए ओंसो-ओंसों ह्‍याद्। 6 ङ होरेब मुँबै पारार क्हिए ओंसों राब्मुँ। क्हिइ पारार प्हरेइ ल्हिद्, छले ल्हिमा म्हिमैंइ थुँबै क्यु छाइले त्होंब्मुँ।” झाइले मोशाइ इस्राएलीमैंए चिबनाँब्मैंए ओंसों छान् लइ।

7 याहवेह ङ्योए म्हाँजोर मुँ उ आरे बिसि इस्राएलीमैंइ आक्वेंसि प्होंगि कैगि लसि याहवेहए जाँच लइ, छतसि च क्ल्ह्‍योए मिं मोशाइ मस्साह*17:7 मस्साह हिब्रू क्युइर, जाँच लब नेरो मेरीबा†17:7 मेरीबा हिब्रू क्युइर, प्होंगि कैगि। थेंइ।✡17:1-7 गन्ती २०:२-१३

8 च लिउँइ रपिदिम बिबै क्ल्ह्‍योर अमालेकीमैं खसि इस्राएलीमैंए फिर ह्‍वानेइ। 9 छतमा मोशाइ यहूशूने बिइ, “अमालेकीमैंने नेबै ल्हागिर च्हौदे म्हिमैं त्हँसि नेबर ह्‍याद्। प्हन्हाँग याहवेहए प्हरे ङए योर किंसि ङ कोंए फिर राब्मुँ।” 10 मोशाइ बिब् धोंले यहोशूइ लइ, धै अमालेकीमैंने नेबर होंइ। मोशा, हारून नेरो हुर बिस्याँ कोंए फिर ह्‍याइ। 11 मोशाइ यो कैंडो क्वेरिमा इस्राएलीमैंइ ट्होमल। यो क्युरु लमा अमालेकीमैंइ ट्होमल। 12 मोशाए यो नारमा हारून नेरो हुरइ युँमा घ्रि पखसि चए न्होंर थेंमिंमा च चए फिर क्हुँइ। धै हारून नेरो हुरइ घ्रि तिराइ घ्रि तिराइ रासि चए ह्‍योरमिंइ। त्हिंयाँ आलिन् समा चए यो कैंडोन् क्वेरिइ। 13 छलमा यहोशूइ अमालेकी सिपाइमैंलाइ सेलाँइ (तरवारइ) ल्हिसि तोइ आचैन् लवाइ।

14 च लिउँइ याहवेहजी मोशाने बिइ, “चु ताँ मैंबै ल्हागिर कापिर प्ह्रिथेंन्। ङइ चु ह्‍युलउँइँले अमालेकीमैंए मिं क्ह्रन् म्हवाम् बिसि यहोशूने बिद्।”✡17:14 व्य २५:१७-१९; १ शमू १५:२-९ 15 मोशाइ चर ख्रो पिंबै क्ल्ह्‍यो घ्रि बनेसि चए मिं “याहवेह ङए ताच्यैं (झन्डा) ग” थेंइ। 16 झाइले मोशाइ बिइ, “याहवेहए ताच्यैं क्वेद्! पुस्ता पुस्ता समा याहवेह अमालेकीमैंने नेमिंब्मुँ।”