1 इस्राएलीमैं मिश्रउँइँले त्होंबै म्हैंन सोंलर सिनै बिबै क्यु आयोंबै क्ल्ह्‍योर फेखइ। 2 चमैं रपिदिमउँइँले प्रसि सिनै बिबै तोइ आरेबै क्ल्‍ह्‍योर फेखसि च कोंए ओंसों इस्राएलीमैइ तम्बु टौंदिइ। 3 च लिउँइ मोशा कों क्रेसि परमेश्‍वर ङाँर ह्‍यामा याहवेहजी कोंउँइँले चने बिइ, “क्हिइ याकूबए घराना नेरो इस्राएलीमैंने छ बिद्: 4 ‘क्हेमैंलाइ जोगेबै ल्हागिर ङइ मिश्रीमैंलाइ खै लइ, क्व्रेइ ह्रोंसए प्हसे प्ह्‍यागोर नोब् धोंले ङइ क्हेमैंलाइ नोसि ङ ङाँर पखब क्हेमैंइ म्रोंइमुँ। 5 तारे ङए ताँ छेनाले थेसि ङने बाछा फैब् धोंले क्हेमैं प्रइ बिस्याँ, ताँन् ह्‍युल ङलन् तलेया ताँन् ह्रेंमैं न्होंरि क्हेमैं ङए म्हिमैं तब्मुँ।✡19:5 व्य ४:२०; ७:६; १४:२; २६:१८; तीत २:१४ 6 क्हेमैं ङए ल्हागिर पबित्र ह्रें (जात) तसि ङए खेगिमैं तब्मुँ।’ क्हिइ इस्राएलीमैंने बिल् त्हुबै ताँ चुन् ग।”✡19:5-6 १ पत्र २:९✡19:6 दर्शन १:६; ५:१० 7 च लिउँइ मोशा कोंउँइँले क्युरु युसि म्हिमैंए चिबनाँब्मैं खागु लसि याहवेहजी चने बिद् बिसि ल्हैदिबै ताँन् ताँमैं चमैंए ओंसों बिमिंइ। 8 छतमा ताँन् म्हिमैंइ तिख्खेर “याहवेहजी बिबै ताँन् ताँमैं ङिइ लब्मुँ,” बिइ। छबिमा म्हिमैंइ बिबै ताँमै मोशाइ याहवेहने बिमिंइ।

9 याहवेहजी मोशाने बिइ, “थेद्, ङ क्हिने ताँ लब म्हिमैंइ थेरिगे धै खोंयोंन् बिलै या क्हिए फिर बिश्‍वास लरिगे बिसि ङ क्हि ङाँर रुँदो न्हाँम्स्योर युब्मुँ।”

म्हिमैंइ बिबै ताँ मोशाइ याहवेहने बिमा 10 याहवेहजी चने बिइ, “क्हि म्हिमैं ङाँर ह्‍यासि ‘तिंयाँ नेरो प्हन्हाँग पबित्र तसि ह्रों-ह्रोंसए क्वें ख्रुद्,’ बिद्। 11 झाइले नोगि चमैं छेसि टिरिगे, तलेबिस्याँ नोगि सिनै कोंर ताँन् म्हिमैंइ म्रोंल्‍ले ङ युब्मुँ। 12 कोंए कारग्युले बार थोसि म्हिमैंने छ बिद्, ‘क्हेमैं न्ह क्रों मि क्रोंले टिद्, क्हेमैं कों फिर आह्‍याद्, धै चए साँदमैं या आछुइद्। कों छुइबै म्हिलाइ खैले बिलैया सैवाब्मुँ। 13 खाबज्यै च कों आछुइद्। खेदो मुँलेया म्हि मुँलेया च कों छुइ बिस्याँ चमैंलाइ आछुइल्‍ले युँमाइ तलेया म्ये त्हलेइ तलेया ल्हिसि सैवाद्। च सोल् योंरिब् आरे।’ दिलेया थुतुरु ह्राबै कै थेबै लिउँइ मत्‍त्रे चमैं कोंर खरिगे।”✡19:12-13 हिब्रू १२:१८-२०

14 मोशा कोंउँइँले क्युरु म्हिमैं ङाँर युबै लिउँइ चइ म्हिमैंलाइ पबित्र लइरि चमैइ ह्रों-ह्रोंसए क्वें ख्रुइ। 15 च लिउँइ चइ म्हिमैंने बिइ, “नोगिए ल्हागिर छेइ टिद्। क्हेमैं च्हमिरिमैंने बालु आतद्।”

16 नोगिम्धों न्हाँग तमा कोंर गड्‌याङगुडुङ तइ, धै काम्‍लि तिम्‍लि रासि कोंर रुँदो न्हाँमस्यो राइ, धै बेल्‍ले ङ्‍हेबै थुतुरिए कै थेइ। छतमा ब्यारेकर मुँबै ताँन् म्हिमैं ङ्हिंसि थरथर त्हारइ।✡19:16 दर्शन ४:५ 17 च लिउँइ मोशाइ ब्यारेकउँइँले म्हिमैंलाइ परमेश्‍वरने त्होबर पखमा म्हिमैं कोंए फेदिर राइ। 18 याहवेह मि तसि चर युबइले सिनै कों मिखु-मिखुइ प्लिंयाँइ। मिए भट्टिउँइँले मिखु त्होंब् धोंलेन् मिखु त्होंमा कोंमैं बेल्‍ले त्हारबर होंइ।✡19:16-18 व्य ४:११-१२ 19 छतमा थुतुरिए कै अझै सार्ले ङ्‍हेबर होंमा मोशा पोंबर होंइ, धै परमेश्‍वरजी मु गड्‌याङगुडुङ लवासि मोशालाइ ज्वाफ पिंइ। 20 झाइले याहवेह सिनै कोंए च्होर युसि मोशालाइ कोंए च्होर हुइ। छतसि मोशा कोंर क्रेसि ह्‍याइ। 21 याहवेहजी मोशाने बिइ, “याहवेह ङ्‍ह्‍योब् बिसि म्हिमैं बार ङ्‍वैसि कोंर आखरिगे बिसि क्हि क्युरु ह्‍यासि चमैंलाइ कों आछुइद् बिद्। चमैंइ छ लस्याँ चमैं न्होंर ल्हें म्हि सियाब्मुँ। 22 ङ ङाँर खमा खेगि या पबित्र तल् त्हुम्। पबित्र आतस्याँ ङइ च त्हेर्न चमैं सैवाब्मुँ।”

23 मोशाइ याहवेहने बिइ, “म्हिमैं सिनै कोंर क्रेसि खल् आखाँ, तलेबिस्याँ चु कों पबित्र मुँ ङ्हाँसि कोंए कारग्युले क्हिजी बार थोद् बिसि ल्हैदिल।”

24 याहवेहजी चने बिइ, “क्हि क्युरु ह्‍यासि हारूनने बालु कोंर क्रेसि खो। खेगिमै नेरो म्हिमैं बिस्याँ, बार ङ्वैसि कोंर क्रेसि ङ ङाँर आखरिगे। आस्याँ ङइ चमैं सैवाब्मुँ।” 25 च लिउँइ मोशा क्युरु म्हिमैं ङाँर ह्‍यासि याहवेहजी बिबै ताँ बिमिंइ।