34
छारा युँमाए प्लना
(व्यवस्था १०:१-५)
1 याहवेहजी मोशाने बिइ, “ओंसोंबै धोंलेन् युँमाए प्लना ङ्हिं थोसि पखो। क्हिइ ओंसों तिवाबै युँमाए प्लनार प्ह्रिबै ताँमैं च युँमाए प्लनार ङइ प्ह्रिब्मुँ। 2 प्हन्हाँग न्हाँकर्न छेसि सिनै कोंर ङने त्होबर खो। 3 क्हिने खाबै या आखरिगे, कोंर खनिरै या म्हिमैं आम्रोंरिगे। र-क्यु नेरो खेदोमैं या चर आरेंरिगे।”
4 छतसि मोशाइ धबै युँमाए प्लना ङ्हिं थोसि याहवेहजी बिब् धोंलेन् न्हाँकर्न युँमाए प्लना किंसि सिनै कोंर ह्याइ। 5 झाइले याहवेह न्हाँम्स्यो न्होंउँइँले तयुइ, धै मोशाने बालु रासि ह्रोंसए मिं “याहवेह” बिसि ओरइ। 6 च लिउँइ याहवेह चए ओंसोंउँइँले ह्यासि छ बिसि ओरइ,
“याहवेह, याहवेह!
ङ म्हिमैंए फिर बेल्ले म्हाँया नेरो ल्हयो खबै पइरमेश्वर ग!
ङ युनन् ह्रिस आख,
थेबै म्हाँया लमुँ, भर पर्दिल् खाँब् मुँ।
7 ङइ हजार-हजार पुस्ताए फिर आशिक पिंमुँ,
धै दुष्ट केमैं, प्होंगि कैगि लब नेरो पापए क्षमा लमिंम्।
दिलेया दोषिलाइ खैले बिलेना सजैं पिंमुँ।
आबा-आमाइ लबै पापए दण्ड चमैंए च्ह-च्हमिमैं, क्वें-क्वेंमिमैं पुस्ता सों प्लि समा पिंमुँ।”✡ 34:6-7 प्रस २०:५-६; गन्ती १४:१८; व्य ५:९-१०; ७:९-१०
8 छ बिबै तोंदोंन् मोशाइ सर क्र कुरसि परमेश्वरलाइ फ्योइ। 9 धै मोशाइ बिइ, “ओ याहवेह, क्हिए म्हाँया ङने मुँ बिस्याँ ङ यो छ्युँ लमुँ, क्हिन् ङिने बालु प्रमिंन्। चु म्हिमैं आच्योब्मैं मुँलेया ङिए दुष्ट केमैं नेरो पापए क्षमा लमिंसि ङिलाइ क्हिए म्हिमैं लमिंन्।”
छारा बाछा
(प्रस्थान २३:१४-१९; व्यवस्था ७:१-५; १६:१-१७)
10 याहवेहजी मोशाने बिइ, “थेद्, ङ इस्राएलीमैंने बालु बाछा घ्रि फैम्। क्हिए म्हिमैंए ओंसों ङ औदिबै केमैं लब्मुँ। छाबै के पृथ्बीर्बै खाब् ह्रेंमैंए ङाँर आलइमुँ। ङ याहवेहजी क्हिए ल्हागिर छाबै औदिबै के लमना बिसि क्हिने बालु मुँबै म्हिमैंइ म्रोंब्मुँ। 11 ङइ क्हिने बिबै ताँ म्हाँदिद्। ङइ क्हिए उँइँर्न एमोरी, कनानी, हित्ती, परिज्जी, हिव्वी नेरो यबूसीमैं ल्हाब्मुँ। 12 छतसि न्ह क्रों मि क्रोंले टिद्! क्हि ह्याबै ह्युलर्बै म्हिमैंने बालु बाछा आफैद्। बाछा फैस्याँ क्हेमैंए ल्हागिर ङो चुब् धोंन् तब्मुँ। 13 बरु चमैंए ख्रो पिंबै क्ल्ह्योमैं फुवाद्, चमैंए पबित्र युँमामैं त्हुला भुँ लवाद्, धै चमैंए अशेरा देबीए कुमैं (मूर्तिहरु) फुमिंन्!✡ 34:13 व्य १६:२१ 14 क्हेमैंइ अरू देवतामैंए पूजा आलद्, तलेबिस्याँ ङ याहवेह ह्रिस लबै परमेश्वर ग।
15 “न्ह क्रों मि क्रों तद्! च ह्युलर्बै म्हिमैंने बालु बाछा आफैद्, तलेबिस्याँ चमैं ह्रोंसए देवतामैंए पूजा लसि ख्रो पिंमा चमैंइ क्हेमैंलाज्यै या हुइब्मुँ, धै चमैंइ ख्रो पिंबै से क्हेमैंइ चब्मुँ। 16 क्हेमैंए च्हमैंइ चमैंए च्हमिमैं ब्ह्या लसि पखलै, धै च च्हमिमैंइ ह्रोंसए देवतामैं पूजा लसि क्हेमैंए च्हमैंलाज्यै या पूजा लबर ल्हैदिब्मुँ।
17 “क्हेमैंइ ह्रोंसए ल्हागिर तो सैलैया कु (मूर्ति) बनेसि आफ्योद्।✡ 34:17 प्रस २०:४; लेबी १९:४; व्य ५:८; २७:१५
18 “प्लेढा आझोंब क्हें चबै चाड म्हाँदिद्। ङइ बिब् धोंले आबीब म्हैंनर ङिगैं समा प्लेढा आझोंब क्हें चद्, तलेबिस्याँ च म्हैंनर क्हेमैं मिश्र ह्युलउँइँले त्होंइ खब् ग।✡ 34:18 प्रस १२:१४-२०; लेबी २३:६-८; गन्ती २८:१६-२५
19 “च्ह थेब्मैं नेरो क्हेमैंए खेदोमैंइ ओंसों फिबै त्होबामैं, भालेमैं ङलन् ग।✡ 34:19 प्रस १३:२ 20 दिलेया गदाइ ओंसों फिबै प्हसेए साटोर क्यु झजा पिंसि स्यो लद्। चलाइ स्यो आलस्याँ चए खरि चुवाद्। ह्रोंसए च्ह थेब्मैंलायै या तो मुँले सै पिंसि स्यो लद।
“खाबै या भेटि आपल्ले ङ ङाँर खल् आत।✡ 34:20 प्रस १३:१३
21 “टुगैं समा ह्रोंसए के ति लद्, ङिगैंर बिस्याँ भों न्हद्। क्ल्या क्योब नेरो रो खुबै त्हेरै या ङिगैंर भों न्हद्।✡ 34:21 प्रस २०:९-१०; २३:१२; ३१:१५; ३५:२; लेबी २३:३; व्य ५:१३
22 “ओंसों मिंबै गउँ खैंमा क्हेमैंइ नोगि चबै चाड म्हाँदिद्। छलेन सर्खर रा-रोमैं खुमा प्ह्रोर टिबै चाड म्हाँदिद्।✡ 34:22 लेबी २३:१५-२१; २३:३९-४३; गन्ती २८:२६-३१
23 “क्हेमैंए ताँन् मुँयुँमैं बर्षर सोंखे इस्राएलर्बै याहवेह परमेश्वरए उँइँर खल् त्हुम्। 24 ङइ ह्रें-ह्रेंमैं क्हेमैं ङाँइँले ह्रेंगो ल्हामिंसि क्हेमैंए साँदमैं बडिमिंब्मुँ। क्हेमैं बर्षर सोंखे ह्रोंसए याहवेह परमेश्वरए उँइँर चाड म्हाँदिबर ह्याइ बिस्याँ खाबज्यै या क्हेमैंए क्ल्ह्यो लोब लरिब् आरे।
25 “ङए मिंर ख्रो पिंमा प्लेढा झोंसि ख्रोंबै क्हें आचडेद्। दुःखने फ्रेबै चाडर ख्रो पिंबै सैमैं प्हँन्हाँग्धों समा आथेंन्।✡ 34:25 प्रस १२:१०
26 “क्हेमैंए म्रोंर्बै धाँसे ओंसों रोबै छ्याँबै रा-रोमैं ह्रोंसए याहवेह परमेश्वरए धिंर पखो।
“र बोक्याए से चए आमाए ङ्हेर आह्योद्।”✡ 34:26 व्य १४:२१; २६:२
27 याहवेहजी मोशाने बिइ, “चु ताँमैं प्ह्रिद्, तलेबिस्याँ चु ताँ धोंलेन् क्हि नेरो इस्राएलीमैंने ङइ बाछा फैइमुँ।” 28 मोशा सिनै कोंर याहवेहने बालु प्लिच्यु त्हिंइ प्लिच्यु म्हुँइँस तोइ आचल्ले तोइ आथुँल्ले टिसि युँमाए प्लनामैंर बाछा फैबै ताँमैं, अथवा म्हिमैंइ ललन् त्हुबै “च्युउलो ताँमैं” प्ह्रिइ।
मोशाए लि चारब
29 म्हिमैंइ ललन् त्हुबै ताँमैं प्ह्रिबै युँमाए प्लना ङ्हिं योर किंसि कोंउँइँले तयुमा परमेश्वर चने बालु ताँ सेरिबइले ह्रोंसए लि चाररिइमुँ बिबै ताँ मोशाइ था आसेल। 30 हारून नेरो इस्राएलीमैंइ मोशालाइ ङ्ह्योमा चए लि चारब म्रोंइ। छतमा चमैं मोशाए ङाँर ह्याबर ङ्हिंइ। 31 दिलेया मोशाइ चमैंलाइ हुइमा हारून नेरो इस्राएलर्बै ताँन् चिबनाँब्मैं मोशाए ङाँर खइ, झाइले मोशाइ चमैंने ताँ सेइ। 32 च लिउँइ इस्राएलर्बै ताँन् म्हिमैं चए ङाँर खइ, धै सिनै कोंर याहवेहजी मोशाने बिबै ताँन् ताँ मोशाइ चमैंने “ललन् त्हुबै ताँ चुन् ग” बिसि बिमिंइ।
33 मोशाइ चमैंने ताँ सेल् खाँबै लिउँइ ह्रोंसए लि क्वेंइ हुइ। 34 मोशा याहवेहए उँइँर पबित्र तम्बु न्होंर खीने ताँ सेबर ह्यामा नेरो बैरु आत्होंन् समा क्वेंइ लि आउमल। झाइले याहवेहजी ललन् त्हुम् बिसि बिबै ताँ मोशा बैरु युसि इस्राएलीमैंने बिमिंमा 35 इस्राएलीमैंइ मोशाए लि चाररिब म्रोंमल। याहवेहने बालु ताँ सेबर पबित्र तम्बु न्होंर आहोंन् समा मोशाइ धबै क्वेंइ लि हुमल।✡ 34:29-35 २ कोर ३:७-१६
✡34:7 34:6-7 प्रस २०:५-६; गन्ती १४:१८; व्य ५:९-१०; ७:९-१०
✡34:13 34:13 व्य १६:२१
✡34:17 34:17 प्रस २०:४; लेबी १९:४; व्य ५:८; २७:१५
✡34:18 34:18 प्रस १२:१४-२०; लेबी २३:६-८; गन्ती २८:१६-२५
✡34:19 34:19 प्रस १३:२
✡34:20 34:20 प्रस १३:१३
✡34:21 34:21 प्रस २०:९-१०; २३:१२; ३१:१५; ३५:२; लेबी २३:३; व्य ५:१३
✡34:22 34:22 लेबी २३:१५-२१; २३:३९-४३; गन्ती २८:२६-३१
✡34:25 34:25 प्रस १२:१०
✡34:26 34:26 व्य १४:२१; २६:२
✡34:35 34:29-35 २ कोर ३:७-१६