1 धै बजलेलइ ङ्‍हउरु ह्रिंब, ङ्‍हउरु प्ल्हाब, सोंउरु नुब चार पाटे मिइ ख्रोंसि ख्रो पिंबै बबुल सिंए क्ल्ह्‍यो बनेइ। 2 चए कुना प्लिर रुमैं बनेइ। च ख्रो पिंबै क्ल्ह्‍यो नेरो रुमैं सिं घ्रिउँइँलेन् बनेसि काँसाइ म्होरइ। 3 चइ ख्रो पिंबै क्ल्ह्‍योर चैदिबै भाँडोमैं, बेल्चामैं, क्यु झोंबै बाटामैं, से तिबै काँटामैं, मि म्ल्हमैं झोंबै भाँडोमैं काँसाला बनेइ। 4 ख्रो पिंबै क्ल्ह्‍योए फिर तिबै ल्हागिर चइ ख्रो पिंबै क्ल्ह्‍योए ङाँए न्होंर म्हाँजोर समा फेनेल्‍ले काँसए जालि घ्रि बनेइ। 5 चइ काँसाए जालिए कुना प्लिर नोबै प्हरे क्युलबै ल्हागिर न्ह प्लिउलो बनेइ। 6 प्हरेमैं बबुल सिंल बेनेसि काँसाइ म्होरइ। 7 च प्हरेमैं ख्रो पिंबै क्ल्ह्‍योए रे प्लिर प्ह्‍याबै न्हमैंर ख्रो पिंबै क्ल्ह्‍यो नोबै ल्हागिर क्युलइ। चइ बबुल सिंउँइँले न्होंर खोक्रो तबै ख्रो पिंबै क्ल्ह्‍यो बनेइ।

8 पबित्र तम्बुए म्रार के लबै च्हमिरिमैंइ ङ्‍ह्‍योबै दर्पनउँइँले (ऐना) चइ काँसाए क्यु झोंबै भाँडो नेरो च भाडोए प्हले बनेइ।✡38:8 प्रस ३०:१८

9 छेनाले ख्रिंबै सुति क्वेंए पर्दामैं बनेसि याहवेहए पबित्र तम्बु थोइ। पर्दाए माइ हारबै भाग (दक्षिण) प्र क्रुल मुँल। 10 च पर्दा च्योबै त्होमैं ङ्हिस्यु, चए क्योबै क्ल्ह्‍यो या ङ्हिस्युन् काँसाल मुँल। त्होए अङ्‍कुसिमैं नेरो छोमैं चाँदिल मुँल। 11 पर्दाए ताइ हारबै भाग या (उत्तर) प्र क्रुल मुँल। त्होमैं नेरो क्योबै क्ल्ह्‍योमैं या काँसालन् ङ्हिस्युन् मुँल। त्होमैंए अङ्‍कुसि नेरो छोमैं बिस्याँ चाँदिल मुँल। 12 छ्यो न्हुँ हारबै पर्दामैं ङ्‍हच्यु क्रुल मुँल। चए त्होमैं च्यु, क्योबै क्ल्ह्‍यो या च्युन् मुँल, त्होए अङ्‍कुसि नेरो छोमैं चाँदिल मुँल। 13 स्यार हारबै पर्दाए भाग (पूर्व) ङ्‍हच्यु क्रुल मुँल। 14 मुल म्रा हारबै पर्दामैं च्युसे ङ्‍ह क्रुल मुँल। चए त्होमैं नेरो क्योबै क्ल्ह्‍यो या सोंउलोन् मुँल। 15 ह्‍युर्बै म्राए क्योलो नेरो त्हेब्रे हारबै पर्दामैं च्युसे ङ्‍ह क्रुल मुँल। चए त्होमैं नेरो क्योबै क्ल्ह्‍यो या सोंउलोन् मुँल। 16 ह्‍युर्बै प्लि हारबै पर्दामैं छेनाले रोबै सुति क्वेंल मुँल। 17 त्होए क्योबै क्ल्ह्‍योमैं काँसाल मुँल, त्होर्बै अङ्‍कुसि नेरो छोमैं चाँदिल मुँल। त्होए च्होमैं चाँदिइ म्होरल। ह्‍युर्बै त्होमैंर च्योबै छोमैं या चाँदिलन् मुँल। 18 ह्‍युर्बै मुल म्रार्बै पर्दा मु रङ, कलेजी रङ नेरो ओल्ग्या रङर्बै रुइ टुसि बुट्टा झोंब मुँल। च पर्दा ङ्हिस्यु क्रु ह्रिंब नेरो ङ्‍हउरु नुब मुँल। 19 च पर्दा च्योबै त्होमैं नेरो क्योबै क्ल्ह्‍योमैं प्लि काँसाल मुँल। अङ्‍कुसि नेरो छोमैं चाँदिल मुँल, त्होए च्होमैं या चाँदिइ म्होरल। 20 पबित्र तम्बु नेरो तम्बुए ह्‍युर्बै काँटिमैं काँसाल मुँल।

21 पबित्र तम्बु बनेबर ल्हैदिबै सैमैं छले मुँ। मोशाइ बिब् धोंले खेगि हारूनए च्ह ईतामारइ ल्हैदिब् अनुसार लेबीमैंइ प्ह्रिल।

22 याहवेहजी मोशाने बिब् धोंले यहूदाए कुलर्बै ऊरीए च्ह, हुरए क्वें बजलेलइ लइ। 23 चने बालु दानए कुलर्बै अहीसामाकए च्ह ओहोलीआब मुँल। च भाडर बुट्टा प्रिंल् ह्रब् नेरो मु रङर्बै, कलेजी रङर्बै नेरो ओल्ग्या रङर्बै रुमैं नेरो छेनाले ख्रिंबै सुतिइ बुट्टा झोंल् ह्रब् मुँल।

24 पबित्र तम्बु बनेसि याहवेहए मिं फुलबै ल्हागिर पखबै मारा पबित्र तम्बुर्बै पार अनुसार हाजार घ्रि किलो मुँल। 25 इस्राएलर्बै म्हिमैं च्योबै त्हेर खुबै चाँदि पबित्र तम्बुर मुँबै पारर क्वेमा ३,४३० किलो मुँल। 26 ङ्हिस्यु बर्ष भन्दा कैंडुबै म्हिमैं च्योमा लाख टुसे हजार सोंसे ङ्‍हब्रसे ङ्हच्यु (६,०३,५५०) तल। च ताँन् म्हिमैंइ एखबै मुइ पबित्र तम्बुर्बै पारइ क्वेमा आधा शेकेल मुँल।✡38:25-26 प्रस ३०:११-१६✡38:26 मत्ती १७:२४ 27 ३,४०० किलो चाँदि पबित्र तम्बु नेरो पर्दाए क्योबै क्ल्ह्‍योमैं बनेबै ल्हागिर मुँल। क्योबै क्ल्ह्‍यो घ्रि बनेमा ३४ किलो ल्हैदिइ। 28 ङैब सोंच्यु किलो चाँदिउँइँले चमैंइ त्होए च्होमैंए ल्हागिर अङ्‍कुसि बनेसि त्होए च्होमैं म्होरसि छोमैं बनेइ। 29 याहवेहए मिंर फुलबै काँसा २,४२५ किलो मुँल। 30 च काँसाइ पबित्र तम्बुर्बै मुल म्राए क्योबै क्ल्ह्‍योमैं, ख्रो पिंबै क्ल्ह्‍यो, जालि नेरो ख्रो पिंबै क्ल्ह्‍योर्बै ताँन् सैमैं, 31 ह्‍युर्बै क्योबै क्ल्ह्‍योमैं, मुल म्राए क्योबै क्ल्ह्‍योमैं, नेरो पबित्र तम्बुर चैदिबै काँटि नेरो ह्‍युए कारग्युले चैदिबै काँटिमैं बनेइ।