3
बिश्वास लसि ठिक ठर्दिम उ यहूदी ठिम म्हाँदिसि?
1 ओ बुद्धि आरेबै गलातीमैं! खाबइ क्हेमैंलाइ म्होंनि झोंइ? येशू ख्रीष्ट क्रूसर च्योवाबै ताँ क्हेमैंने ङिइ छेनाले बिल। 2 ङ क्हेमैंने ताँ घ्रि ङ्योएम्: परमेश्वरए पबित्र प्ल्ह क्हेमैंइ खैले योंइ? ठिमइ बिब् धोंले लसि योंइ उ, सैं तोंबै ताँ थेसि क्वेंबइले योंइ? 3 क्हेमैं तले छले बुद्धि आरेब्मैं धों तल? क्हेमैंइ परमेश्वरए पबित्र प्ल्हउँइँले छ्ह थोबै सुरु लसि धबै ह्रोंसए सैंर तो मैंमुँ छान् लप्रसि छ्ह थोल् म्हैम्मा? 4 तिंयाँ समा च्हौ ल्हें दुःख क्हेमैंइ फाक्कर्न योंइ वा? क्हेमैंइ योंबै दुःख फाक्कर्न आतरिगे! 5 परमेश्वरजी क्हेमैंलाइ पबित्र प्ल्ह पिंसि क्हेमैंए म्हाँजोर खीजी औदिबै केमैं लम्। छाबै केमैं खीजी क्हेमैंइ ठिमइ बिब् धोंबै के लसि लब् उ, येशू ख्रीष्टउँइँले खबै सैं तोंबै ताँ थेसि क्हेमैंइ बिश्वास लबइले लब् जा?
6 स्योंम्बै अब्राहामलाइ मैंन्दि।
“अब्राहामइ परमेश्वरए फिर बिश्वास लइ,
छतसि परमेश्वरजी चलाइ ठिक ठर्दिमिंइ।”✡3:6 उत १५:६; रोम ४:३
7 छतसि खा-खाबमैंइ बिश्वास लमुँ, चमैंन् अब्राहामए सन्तान ग बिसि क्हेमैंइ क्होल् त्हुम्।✡3:7 रोम ४:१६ 8 परमेश्वरजी अरू ह्रेंमैंलासेया खीए फिर्बै बिश्वासर्न ठिक ठर्दिमिंब्मुँ बिबै ताँ ओंसोंन् छ्वेर प्ह्रिथेंल। छतसि परमेश्वरजी अब्राहामलाइ
“क्हिउँइँलेन् ताँन् ह्रेंमैंइ आशिक योंब्मुँ”✡3:8 उत १२:३
बिसि सैं तोंबै ताँ बिल। 9 छतसि अब्राहामइ परमेश्वरए फिर बिश्वास लसि आशिक योंइ, च धोंलेन् अरू म्हिमैंज्यै या परमेश्वरए फिर बिश्वास लस्याँ आशिक योंब्मुँ।
10 दिलेया ठिमइ बिब् धोंले के लसि परमेश्वरए उँइँर ठिक ठर्दिबै आशा लब्मैंइ सराप योंम्, तलेबिस्याँ
“ठिमर प्ह्रिबै ताँन् ताँमैं छेनाले आम्हाँदिब्मैंइ सराप योंम्।”
बिसि परमेश्वरए छ्वेर प्ह्रिइमुँ।✡3:10 व्य २७:२६ 11 छतसि ठिमइ बिब् धोंले लसि खाबै या परमेश्वरए उँइँर ठिक ठर्दिल् आखाँ बिसि परमेश्वरए छ्वेर छेनाले प्ह्रिथेंइमुँ:
“खाब् म्हिइ परमेश्वरए फिर बिश्वास लमुँ,
च म्हिन् खीए उँइँर ठिक ठर्दिब्मुँ,
धै चइ खोंयोंइ आखाँबै छ्ह योंब्मुँ।”✡3:11 हब २:४
12 दिलेया ठिमइ बिब् धोंले लबै केमैं नेरो परमेश्वरए फिर्बै बिश्वासए ताँमैं स्यो स्यो ग, तलेबिस्याँ
“खाबइ ठिमइ बिब् धोंबै केमैं लमुँ,
च म्हि ह्रोंसइ लबै केमैंउँइँलेन् सोब्मुँ।”✡3:12 लेबी १८:५
13 ङ्योइ योंल् त्हुबै सराप खीजी नोइ, ठिमर्बै सरापउँइँले सै फोसि ङ्योलाइ खामिंइमुँ।
तलेबिस्याँ “सिं धुँर च्योसि सिब्मैं,
परमेश्वरउँइँले सराप योंब्मैं ग,” बिसि परमेश्वरए छ्वेर प्ह्रिइमुँ।✡3:13 व्य २१:२३
14 परमेश्वरजी अब्राहामने पिंबै आशिक येशू ख्रीष्टउँइँले अरू ह्रेंमैंज्यै या योंरिगे धै खीजी बाछा फैसि पिंम् बिबै पबित्र प्ल्ह ङ्योए बिश्वासउँइँले ङ्योइ योंरिगे बिसि ख्रीष्टजी सै फोसि ङ्योलाइ खामिंइ।
परमेश्वरजी फैबै बाछाए लिउँइ ठिम खइ
15 ओ ङए अलि-अङाँमैं, नमुना घ्रि बिले: तिखे पक्का तयाल् खाँबै बाछा कबूल खाबज्यै या प्लिंल् आखाँ, अर्को ताँ या थप्दिल् आखाँ। 16 छलेन अब्राहाम नेरो चए सन्तान न्होंर्बै म्हि घ्रिने परमेश्वरजी बाछा फैइमुँ। छ्वेर “ल्हें म्हिने बाछा फैइमुँ” आबि, बरु “क्हिए सन्तान न्होंर्बै म्हि घ्रि” बिसि म्हि घ्रिने मत्त्रे बाछा फैमुँ। च म्हि ख्रीष्ट ग। 17 ङइ बिल् म्हैबै ताँ चुन् ग: परमेश्वरजी अब्राहामने फैबै बाछा प्लिब्रासे सोंच्यु बर्ष लिउँइ पिंबै ठिमइ प्लिंल् आखाँ, आस्याँ बाछा केर आफेब् तयामल।✡3:17 प्रस १२:४० 18 परमेश्वरउँइँले योंबै आशिक ठिमर बिब् धोंले केमैं लसि योंम् बिस्याँम्, परमेश्वरजी फैबै बाछाउँइँले आशिक आयोंमल। छ आङिं, तलेबिस्याँ परमेश्वरजी बाछा फैसिन् अब्राहामलाइ च आशिक छलेन् पिंइ।✡3:18 रोम ४:१४
ठिम तले चैदिइ?
19 छ बिस्याँ ठिम तले चैदिइ? तलेबिस्याँ अब्राहामए सन्तान न्होंर्बै बाछा योंबै म्हि ख्रीष्ट आयुन् समा आछ्याँबै केमैं तो जा बिसि उँइँबै ल्हागिर ठिम चैदिल। च ठिम स्वर्गदूतमैंउँइँले योंइ धै म्हिमैंलाइ स्वर्गदूतमैंने क्ह्रिमिंबै ल्हागिर मोशाइ च ठिम स्वर्गदूतमैंए योउँइँले किंसि म्हिमैंलाइ पिंइ। 20 क्ह्रिमिंबै म्हि तबै ल्हागिर बाछा लबै टोलि ङ्हिं तल् त्हुम्, दिलेया परमेश्वर घ्रिन् मुँ। (क्ह्रिमिंबै म्हि आरेलै खीजी आब्रहामने बाछा फैइ)।
21 छ बिस्याँ ठिम परमेश्वरजी फैबै बाछाए बिरोधर तइ वा? आत, छाबै ताँ कत्ति तल् आखाँ! म्हिमैंइ खोंयोंइ आखाँबै छ्ह योंरिगे बिसि ठिम पिंब् ग बिस्याँ, ठिमइ लद् बिबै केमैं लसिन् म्हिमैं परमेश्वरए उँइँर ठिक ठर्दिमल। 22 दिलेया “ताँन् म्हिमैं पापए न्होंर मुँ” बिसि छ्वेइ बिइमुँ। छतसि परमेश्वरजी बाछा फैसि पिंम् बिबै खोंयोंइ आनुबै छ्ह येशू ख्रीष्टए फिर बिश्वास लबइले मत्त्रेन् योंइमुँ।
23 ङ्योइ ख्रीष्टउँइँले खबै सैं तोंबै ताँ आथेन् समा ङ्यो ठिमए न्होंर्न मुँल। ठिमइ ङ्योलाइ कैदिमैं धोंलेन् च्युथेंल। 24 खीए फिर बिश्वास लबै त्हे आखन् समा परमेश्वरए उँइँर ठिक ठर्दिबै ल्हागिर ङ्योलाइ लोदा-सैंदा लसि ख्रीष्ट समा डोरेबर खीजी ङ्योलाइ ठिम पिंइ। 25 तारेम् ङ्योइ बिश्वास लबइले ङ्योलाइ लोदा-सैंदा लबै ठिम आचैदि।
परमेश्वरए प्हसेमैं
26 येशू ख्रीष्टए फिर बिश्वास लबइले क्हेमैं ताँन् परमेश्वरए प्हसेमैं तइमुँ, 27 तलेबिस्याँ क्हेमैं बप्तिस्मा किंब्मैं ख्रीष्टने घ्रिन् तइमुँ। छतसि छारा क्वें खिब् धोंलेन क्हेमैंइ ख्रीष्टए छ्याँबै बानि किंइमुँ। 28 छतसि ङ्यो न्होंर खाबै या तोइ सैरैया फरक आरे - यहूदीमैं मुँलेया, अरू ह्रेंमैं मुँलेया, केब्छैं ङिंलेया केब्छैं आङिंलेया, मुँयुँ मुँलेया च्हमिरि मुँलेया, तोइ फरक आरे। तलेबिस्याँ क्हेमैं ख्रीष्ट येशूने घ्रिन् तसि ताँन् घ्रिन् तइमुँ। 29 छले क्हेमैं ख्रीष्टने घ्रिन् तबइले क्हेमैं अब्राहामए सन्तान ग। छतसि परमेश्वरजी अब्राहामने बाछा फैसि पिंम् बिबै आशिकए हकवालामैं क्हेमैंन् ग।✡3:29 रोम 4:13