1 दिलेया परमेश्‍वरजी नोआ नेरो चने बालु क्यु झाजर मुँबै ताँन् धिंर न्हबै खेदोमैं नेरो क्ह्‍योंर्बै खेदोमैं मैंसि पृथ्‍बीर खैं कुल्मिंइ। धै क्यु ङ्हारबर होंइ। 2 स न्होंर्बै थे थेबै क्युए मुल्मैं ङ्हारयाइ धै मुउँइँले नाँ युब टियाइ। 3 झाइले पृथ्‍बीर क्यु ङ्हा-ङ्हारै ह्‍यासि प्रसे ङ्‍हच्यु त्हिंइ लिउँइ क्यु ङ्हारयाइ 4 च सालर्बै म्हैंन ङिलाए च्युसे ङिगैंर क्यु झाज आरारातए कोंर टियाइ। 5 क्यु ङ्हारदै ह्‍यामा म्हैंन च्युर्बै ओंसोंबै त्हिंइरि कोंमैंए च्होमैं म्रोंइ।

6 प्लिच्यु त्हिंइ लिउँइ ह्रोंसइ बनेबै क्यु झाजए च्योंने म्रा नोआइ थोंसि 7 कग घ्रि प्हुरवामा सर्बै क्यु आङ्हारन् समा च कग छाइ-छुइ प्हुररिइ। 8 च लिउँइ “सर क्यु ङ्हारइ उ” बिसि ङ्ह्‍योबर नोआइ तोंगु (ढुकुर) घ्रि या प्हुरमिंइ। 9 दिलेया पृथ्बीरि क्यु आङ्हारल। छतसि च तोंगु प्हले न्हेबै क्ल्ह्‍यो आयोंसि च ङाँर्न झाजर एखइ। छतसि नोआइ ह्रोंसए यो स्योंसि च तोंगु क्यु झाज न्होंर थेंइ। 10 झाइले ङिगैं लिउँइ नोआइ धबै च तोंगु झाजउँइँले प्हुरमिंइ। 11 च तोंगु ङेसर च ङाँर एखमा चए सुँर भर्खर टोंबै जैतुनए प्हो घ्रि मुँल। छतमा सर क्यु ङ्हारयान बिब नोआइ सेइ। 12 ङिगैं लिउँइ चइ धबै च तोंगु प्हुरमिंइ, दिलेया च लार बिस्याँ च तोंगु च ङाँर आएखा।

13 नोआ टुब्ब्रासे तिदिं तबै सालर्बै ओंसोंबै म्हैंनर्बै ओंसोंबै त्हिंइर पृथ्‍बीर क्यु ङ्हारयाइ। धै नोआइ झाजए म्रा थोंसि ङ्ह्‍योमा सर क्यु ङ्हारयाल। 14 म्हैंन ङ्हिलर्बै ङ्हिस्युसे ङिगैंर स ताँन् कारयाल।

15 छतसि परमेश्‍वरजी नोआने बिइ, 16 “क्हि, क्हिए प्ह्रेंस्यो, च्ह-चोंमैं ताँन् झाजउँइँले त्होंन्। 17 क्हिने बालु मुँबै ताँन् सो प्ह्‍याबै सैमैं खेदोमैं, नमेंमैं, क्ल्याँसि प्रबै प्हँलाँ-प्हुँलुँ बैरु तेद्। चमैं पृथ्‍बीर ल्हें तदै ह्‍युलर प्लिंदै ह्‍यारिगे।”

18 झाइले नोआ, चए प्ह्रेंस्यो नेरो च्ह-चोंमैं झाजउँइँले त्होंइ। 19 खेदोमैं ताँन्, क्ल्‍याँसि प्रबै प्हँलाँ-प्हुँलुँ, नमेंमैं पृथ्‍बीर प्रब् टिब् लबै सो प्ह्‍याबै सैमैं या चमैंए ह्रें-ह्रें पार्ले क्यु झाजउँइँले त्होंखइ।

20 झाइले नोआइ याहवेहए ल्हागिर ख्रो पिंबै क्ल्ह्‍यो घ्रि बनेसि चल् तबै खेदोमैं नेरो नमेंमैं घ्रि-घ्रि किंसि परमेश्‍वरए मिंर ख्रो पिंइ। 21 याहवेहजी ख्रोए लिंबै थाँ किंबै लिउँइ ह्रोंसए सैंर बिइ, “म्हिए सैंर्बै ताँमैं कोलो ओंनोंन् आछ्याँब तलेया म्हिइ लबै केउँइँले तारे ङइ खोंयोंइ पृथ्बीलाइ सराप पिंरिब् आरे। तोगो ङइ नास लब् धोंले सो प्ह्‍याबै ताँन् सैमैं धबै ङ नास लरिब् आरे।”