1 तिगें त्हिंइर्बै ख्वालबै त्हेर अब्राहाम मम्रे बिबै क्ल्ह्‍योर ङ्‍हसिं धुँए ङाँर्बै ह्रोंसए तम्बुए म्रार टिरिमा याहवेह च ङाँर म्रोंयुइ। 2 चइ ङ्‍ह्‍योमा ह्रोंसए ओंसों मुँयुँमैं सों रारिब् म्रोंइ। चमैं म्रोंसि चए तम्बुए म्राउँइँले त्होंसि न्हे‍ह्‍याइ धै पत्खु तसि चमैंलाइ फ्योइ।✡18:2 हिब्रू १३:२ 3 धै चइ बिइ, “ओ चिब्मैं, ङए फिर क्हेमैंए म्हाँया मुँस्याँ क्हिए केब्छैंए तम्बु न्होंर आहोंनले छलेन् आह्‍यामिंन्। 4 क्हेमैंए प्हले ख्रुबै ल्हागिर ङ क्यु पखमुँ। क्हेमैं चु सिंधुँ न्होंर्न भों न्हद्। 5 क्हेमैं ह्रोंसए केब्छैं ङाँर युइ छतसि ङ क्हेमैंए ल्हागिर चबै सै पखमुँ च चदु धै भों न्हसि ह्‍याल् खाँमुँ। क्हेमैं ङए तम्बुर खसेरो ङइ मान लल् पिंन्।”

चमैंइ बिइ, “तम् तम्, ह्‍याद्। क्हिइ बिब् धोंन् लद्।”

6 झाइले अब्राहाम च तोदोंन् तम्बुर सारा ङाँर ह्‍यासि “युन्ले प्रो ङ्‍हब्यों चेंसि क्हें झोंन्,” बिइ।

7 अब्राहाम बिस्याँ प्ह्रोंर ह्‍यासि ह्रोंसए खेदोमैंए बगलउँइँले क्ल्या भार घ्रि किंसि चए केब्छैंने सैबर पिंइ। धै सैबै तोंदोंन् चइ ह्‍योइ। 8 झाइले चइ दै, ङ्‍हे नेरो ह्‍योबै से बोसि चमैंए उँइँर थेंमिंइ। चमैंइ आचन् समा च चमैं ङाँर्न रारिइ।

9 चमैंइ चने “क्हिए प्ह्रेंस्यो सारा खनिर मुँ?” बिसि ङ्योएमा

चइ “चम् तम्बुर मुँ,” बिइ।

10 झाइले याहवेहजी बिइ, “क्हुरिंम्बै चु त्हेजरे ङ क्हि ङाँर एयुब्मुँ। च्हमा क्हिए प्ह्रेंस्यो साराई च्ह घ्रि फिब्मुँ।”

साराई चु ताँ चए लिउँइ तम्बुए म्राउँइँले थेरिल।✡18:10 रोम ९:९ 11 अब्राहाम नेरो सारा खेब्-माँब् तसि चमैंए छ्ह ल्हें तयाल् खाँल। साराए क्होर्बै या टियाल् खाँल। 12 छतसि सारा सैं न्हों-न्हों “ङ माँब् तयाल् खाँइमुँ ङए प्युँ या खेब् तयाल् खाँइमुँ छाबै त्हेरै या ङ सैं तोंल् योंम् रो वा?” बिसि निस्योइ।✡18:12 १ पत्र ३:६

13 “ ‘माँब् तयालेया ङइ च्ह-च्हमि योंम् रो वा?’ बिसि सारा तले निस्योइ? बिसि याहवेहजी अब्राहामने ङ्योएइ। 14 याहवेहजी लल् आखाँबै सै तोइ मुँ वा? क्हुरिंम्बै ङ युम् बिबै त्हेर ङ क्हि ङाँर एयुब्मुँ। च्हमा साराल च्ह घ्रि तब्मुँ।”✡18:14 लूक १:३७

15 दिलेया साराई ङ्हिंदै “ङम् निआस्यो बिइ।”

चइ बिइ, “आङिं! क्हि निस्योल।”

16 झाइले च मुँयुँमैंइ छाइले सदोमउँइ ङ्ह्‍योबर होंइ। छतसि अब्राहाम चमैंने बालु दे क्याइ समा घ्याँ तेंबर ह्‍याइ। 17 याहवेहजी बिइ, “ङइ लबर होंबै के अब्राहामउँइँले लोइ थेंले वा? 18 अब्राहामउँइँले घ्रि थेब नेरो भोंबै ह्रें तब्मुँ। च ङाँइलेन् पृथ्‍बीर्बै ताँन् ह्रेंमैंइ आशिक योंब्मुँ। 19 तलेबिस्याँ चइ ह्रोंसए च्ह-च्हमिमैं नेरो परवामैं ‘छेनाले लोदा-सैंदा लसि याहवेहजी बिब् धोंले प्रबर ल्हैदिरिगे’ बिसि ङइ च त्हाँइमुँ। चमैंइ छ लस्याँ याहवेहजी अब्राहामने फैबै बाछा पूरा लमिंब्मुँ।”

20 धबै याहवेहजी बिइ, “सदोम नेरो गमोराए बिरोधर ल्हें ताँ रेइमुँ। तलेबिस्याँ चमैंइ ल्हें पाप लइमुँ। 21 तारे ङइ थेबै ताँ अनुसार चमैंइ लबै केमैं क्ह्रोंसेंन् ङिंब् उ आङिं बिसि ङ्ह्‍योबर ङ क्युरु ह्‍याब्मुँ। आङिंस्याँ ङइ सेब्मुँ।”

22 छतसि च मुँयुँमैं ङ्हिं छाइले तसि सदोमउँइ ह्‍याइ। अब्राहाम बिस्याँ याहवेहए उँइँर्न रारिइ। 23 झाइले अब्राहाम याहवेह ङाँर ह्‍यासि बिइ, “दुष्‍टमैंने बालु ठिक के लब्मैं या क्हिजी सैवाम्मा? 24 च क्ल्ह्‍योर ठिक के लब्मैं ङ्‍हच्यु मुँस्याँ च ङ्‍हच्यु म्हि आजोगेल्‍ले च क्ल्ह्‍यो नास लवाम्मा? 25 दुष्‍ट म्हिमैंने बालु ठिक के लब्मैं सैबै के क्हिउँइँले खोंयोंइ आतरिगे। क्हिउँइँले छ्याँबै के लब्मैं नेरो आछ्याँबै के लब्मैंए नों खोंयोंन् बिलै घ्रिन् आतरिगे। पृथ्‍बीर्बै नियाधिशइ क्ह्रोंसेंन्बै निसाफ आल रो वा?”

26 याहवेहजी बिइ, “सदोम सहर न्होंर ठिक के लब्मैं ङ्‍हच्यु मुँस्याँ चमैं सोरिगे बिसि ङइ ताँन् म्हिमैं जोगेमिंब्मुँ।”

27 अब्राहामइ बिइ, “ओ याहवेह, ङ स नेरो मेब्रो धों तलेया क्हिने बालु ताँ सेबै आँट लइमुँ। 28 चर म्हि ङ्‍ह आयोल्‍ले ठिक के लब्मैं प्लिच्युसे ङ्‍ह मत्‍त्रे मुँलेया क्हिजी ताँन् सैवाम्मा?”

खीजी बिइ, “चर ठिक के लब्मैं प्लिच्युसे ङ्‍ह मत्‍त्रे मुँस्याँ ङइ ताँन् सैरिब् आरे।”

अब्राहामइ धबै बिइ, “ठिक के लब्मैं प्लिच्यु मत्‍त्रे मुँस्याँ खै लम्दि?”

29 खीजी बिइ, “ठिक के लबै प्लिच्यु म्हिमैं सोरिगे बिसि ङइ च सहर नास लरिब् आरे।”

30 अब्राहामइ बिइ, “ओ याहवेह, क्हि ह्रिस आखस्याँ ङ धबै ताँ घ्रि ङ्योएम् ओ। चर ठिक के लब्मैं सोंच्यु मत्‍त्रे मुँस्याँ खै लम्दि?”

खीजी बिइ, “चर ठिक के लब्मैं सोंच्यु मत्‍त्रे मुँलेया ङइ च सहर नास लरिब् आरे।”

31 अब्राहामइ बिइ, “ओ याहवेह, ङ क्हिने ताँ सेबै आँट लरिइमुँ गार आम्हाँदिद् ओ। चर ठिक के लब्मैं ङ्हिस्यु मुँस्याँ खै लम्दि?”

खीजी बिइ, “ठिक के लबै ङ्हिस्यु म्हि सोरिगे बिसि ङइ च सहर नास लरिब् आरे।”

32 झाइले अब्राहामइ बिइ, “ओ याहवेह, क्हि ह्रिस आखस्याँ ङ धबै ताँ घ्रि ङ्योएम् ओ। चर ठिक के लब्मैं च्यु मत्‍त्रे मुँस्याँ खै लम्दि?”

खीजी बिइ, “ठिक के लबै म्हि च्यु सोरिगे बिसि ङइ च सहर नास लरिब् आरे।” 33 छले याहवेह अब्राहामने ताँ सेल् खाँबै लिउँइ छाइले ह्‍याइ। अब्राहाम बिस्याँ ह्रोंसए तम्बुर एखइ।