1 अब्राहामए छ्ह ल्हें तसि खेब् तयाल् खाँल। याहवेहजी अब्राहामए तोन्दोंरि सैर आशिक पिंल। 2 तिगें अब्राहामइ ह्रोंसए धिंर्बै ताँन् सैमैं छेनाले ङ्ह्‍योबै केब्छैं चिबने बिइ, “क्हिए यो ङए प्हाँ न्होंर थेंन्। 3 स्वर्ग नेरो पृथ्‍बीर्बै याहवेह परमेश्‍वरए उँइँर ङइ क्हिने कसम चबर ल्हैदिम्। क्हिइ ङए च्हए ल्हागिर तोगो ङ टिबै कनान ह्‍युलर्बै च्हमिरिमैं खाबै ब्ह्‍या लसि खैलसया आपखमिंन्। 4 बरु ङए ह्‍युलर ङए ङेंमैं ङाँर ह्‍यासि ङए च्ह इसहाकल प्ह्रेंस्यो घ्रि पखमिंन्।”

5 छबिमा च केब्छैंइ अब्राहामने बिइ, “च च्हमिरि चु ह्‍युलर ङने बालु खल् आङिंइ बिस्याँ, खाब् ह्‍युलउँइँले क्हि खल चर्न क्हिए च्हलाइ ङइ एबोब् वा?”

6 अब्राहामइ चने बिइ, “क्हिइ ङए च्ह चर खैलसे एसि आबोद्। 7 ङए आबाए धिं नेरो ङए ह्‍युलउँइँले ङलाइ पखबै स्वर्ग नेरो पृथ्‍बीर्बै याहवेह परमेश्‍वरजी कसम चसि ‘ङइ क्हिए सन्तानलाइ चु ह्‍युल पिंब्मुँ,’ बिसि ङने बाछा फैइमुँ। छतसि ङए च्हए ल्हागिर क्हिइ च क्ल्ह्‍योउँइँले प्ह्रेंस्यो घ्रि पखल खाँरिगे बिसि खीजीन् ह्रोंसए स्वर्गदूत क्हिए ओंसों ओंसों कुलब्मुँ। 8 दिलेया च च्हमिरि क्हिने बालु खबै सैं आलस्याँ ङए चु कसम क्हिए फिर ल्हैदिरिब् आरे। क्हिइ ङए च्हलाइ खैलसे चर एसि आबोद्।” 9 झाइले च केब्छैंइ ह्रोंसए क्ल्हे अब्राहामए प्हाँ न्होंर यो थेंसि चु ताँर चने बालु कसम चइ।

10 च लिउँइ च केब्छैं ह्रोंसए क्ल्हेए च्युउँलो सलु नेरो ताँन् खालर्बै छ्याँ-छ्याँबै सैमैं किंसि अराम-नाहारैमउँइँले*24:10 अराम-नाहारैम तिंजरो इराक देशर्बै उत्तरि ह्‍युल ग। तसि नाहोरए ह्‍युलर ह्‍याइ। 11 चर फेनेसि सहरए बैरु क्यु खादु ङाँर चइ सलुमैं च्युइँथेंइ। ङेसा छझँ च्हमिरिमैं क्यु खाबर चर खमल। 12 झाइले चइ सैं न्हों-न्हों प्राथना लइ। “ओ ङए क्ल्हेए याहवेह परमेश्‍वर, ङए फिर ल्हयो खसि तिंयाँ ङए के छ्याँब् लमिंन्। झाइले ङए क्ल्हे अब्राहामए फिरै या ल्हयो खमिंन्। 13 ङ चु क्यु खादु ङाँर रारिइमुँ, सहरर्बै म्हिमैंए च्हमिमैं क्यु खाबर खसिन् मुँ। 14 खाब् च्हमिरिने ङइ ‘क्हिए गौरिउँइँले ङ क्यु थुँल् पिंन्’ बिमुँ, धै चइ ङने ‘अँ अँ थुँन्! ङइ क्हिए सलुमैं या क्यु खासि थुँल् पिंम्,’ बिमुँ, च च्हमिरिन् क्हिए केब्छैं इसहाकए ल्हागिर क्हिजी त्हाँबै प्ह्रेंस्यो तरिगे। छलस्याँ ङए क्ल्हेए फिर क्हिजी ल्हयो खना बिसि ङइ सेब्मुँ।”

15 चइ प्राथना लल् आखाँबै त्हेर्न अब्राहामए अलि नाहोर नेरो मिल्काए च्ह बतूएलए च्हमि रिबेका प्हैंदार गौरि तेंसि खइ। 16 च बेल्‍ले छ्याँब नेरो खाब् मुँयुँमैंने या आरोब मुँल। क्यु खादुर तसि चइ गौरिर क्यु खासि कैंडो क्रेखइ। 17 च लिउँइ च केब्छैं चने त्होबर न्हेह्‍यासि बिइ, “गार आम्हाँदिल्‍ले क्हिए गौरिउँइँले ङलाइ च्युगुदे क्यु थुँबर पिंन्।”

18 चइ “तम्, थुँन्” बिसि आतुरल्‍ले गौरि ह्रोंसए योर थेंसि चलाइ क्यु थुँल् पिंइ।

19 चलाइ क्यु पिंल् खाँबै लिउँइ चइ बिइ, “ङइ क्यु खासि क्हिए सलुमैं या म्रेंनाले थुल् पिंम्।” 20 छ बिसि चइ ह्रोंसए गौरिर्बै क्यु डुँडर युसि धबै क्यु खाबर क्यु खादुउँइ न्हेह्‍याइ। झाइले चए ताँन् सलुमैं या क्यु खासि पिंनेइ। 21 च म्हि बिस्याँ याहवेहजी ह्रोंसए केमैं छ्याँब लमिंब ङिंब् उ आङिंगे बिसि था सेबर आपोंनले च ङाँइ ङ्ह्‍योरिइ।

22 सलुमैंइ क्यु थुँल् खाँबै लिउँइ च म्हिइ आधा तोलाए माराए फुलि नेरो तोला च्युए माराए रयाँ ङ्हिं ट्हुइसि रिबेकाने 23 “क्हि खाबै च्हमि जा? क्हिए आबाए धिंर ङि टिबै क्ल्ह्‍यो मुँ वा?” बिसि ङ्योएइ।

24 रिबेकाइ चने बिइ, “ङ नाहोरउँइँले मिल्काइ फिबै बतूएलए च्हमि ग।” 25 रिबेकाइ धबै चने बिइ, “ङिने छि नेरो पराल ल्हें मुँ। टिबै क्ल्ह्‍यो या मुँ।”

26 छबिमा च म्हिइ ह्रोंसए क्र कुरसि बेल्‍ले मान्ले यो छ्युँ लसि याहवेहलाइ फ्योसि बिइ, 27 “ङए क्ल्हे अब्राहामए याहवेह परमेश्‍वर बेल्‍ले थेब मुँ। खीजी ङए क्ल्हेने फैबै बाछा पूरा लमिंइ। तलेबिस्याँ याहवेहजी ङलाइ घ्याँर डोरेसि ङए क्ल्हेए ङेंमैंए धिंर पखमिंइमुँ।”

28 च लिउँइ च च्हमिरि ह्‍यासि ह्रोंसए आमाए परवाने ताँन् ताँमैं बिइ। 29 रिबेकाल लाबान मिं लबै आघें घ्रि मुँल। च ताँ थेसि लाबन क्यु खादुउँइ च म्हि मुँबै क्ल्ह्‍योउँइ न्हेह्‍याइ। 30 तलेबिस्याँ लाबानइ ह्रोंसए अङाँए नखुँर नथ नेरो योर रयाँ खिब म्रोंल। धै च म्हिइ ङने छ बिल बिबै ताँ चए अङाँउँइँले ओंसोंन् थेल। छतसि लाबान च म्हि ङाँर ह्‍याइ। 31 छले ह्‍यामा क्यु खादुए रेर च म्हि रारिब् म्रोंसि लाबानइ बिइ, “ओ याहवेहए आशिक योंबै म्हि, धिं न्होंर खो। तले बैरु रारिल? ङइ क्हिए टिबै क्ल्ह्‍यो नेरो सलुमैंए क्ल्ह्‍यो लथेंइमुँ।”

32 छबिमा च म्हि लाबानने बालु धिंर ह्‍याइ। झाइले लाबानइ सलुमैंए तिमैं सर थेंसि चमैंलाइ पराल नेरो छिमैं पिंइ। धै चइ अब्राहामए केब्छैं नेरो चने मुँबै म्हिमैं प्हले ख्रुबै क्यु पिंइ। 33 झाइले केब्छैंए उँइँर चबै सैमैं या थेंमिंइ। दिलेया चइ बिइ, “ओंसों ङए ताँ क्हेमैंने आबिन् समा ङ तोइ आच।”

लाबानइ “क्हिए ताँ तो मुँ? ल्हु, बिद्,” बिइ।

34 झाइले चइ बिइ, “ङ अब्राहामए केब्छैं घ्रि ग। 35 याहवेहजी ङए क्ल्हेए फिर ल्हें आशिक पिंबइले च बेल्‍ले थेबै म्हि तइमुँ। याहवेहजी चलाइ ल्हें र-क्युमैं, मेमैं क्लामैं, मारा, चाँदि, केब्छैं, केब्स्योमैं, सलुमैं नेरो गधामैं पिंइमुँ। 36 ङए क्ल्हेए प्ह्रेंस्यो साराई माँब् तबै त्हेरै या चल च्ह घ्रि फिइमुँ। धै चइ ह्रोंसने मुँबै तोन्दोंरि सै चलाइन पिंइमुँ। 37 ‘ङए च्हए ल्हागिर क्हिइ तोगो ङ टिबै चु कनान ह्‍युलर्बै कनानीमैंए च्हमिमैं खाबै ब्ह्‍या लसि आपखो!’ बिसि ङए क्ल्हेइ ङने कसम चबर लैदिइमुँ। 38 ‘बरु ङए ङेंमैं नेरो ङए आबाए धिंर ह्‍यासि ङए च्हए ल्हागिरि प्ह्रेंस्यो घ्रि पखमिंन्।’

39 “ ‘खनिज्यै च च्हमिरि ङने बालु खल् आङिंस्याँ तो लब्दि?’ बिसि ङइ ङए क्ल्हेने ङ्योएमा 40 चइ ङने बिइ, ‘ङ याहवेहए सेवा लबै म्हि ग। छतसि खीजीन् ह्रोंसए स्वर्गदूत क्हिने बालु कुलब्मुँ, छले कुलमा क्हिए के छ्याँब तब्मुँ। धै ङए ङेंमैं नेरो ङए आबाए धिंउँइँले ङए च्हए ल्हागिरि क्हिइ प्ह्रेंस्यो घ्रि पखब्मुँ। 41 क्हि ङए ङेंमैं ङाँर ह्‍यासेया चमैंइ च च्हमि आपिंस्याँ ङइ चबै चु कसम क्हिलाइ ल्हैदिरिब् आरे।’

42 “तिंयाँ क्यु खादुर फेखसि ङइ छ बिसि प्राथना लइ, ‘ओ याहवेह, ङए क्ल्हे अब्राहामए परमेश्‍वर, क्हिए सैं मुँस्याँ क्हिजी ङए केमैं छ्याँब लमिंन्। 43 ङ्‍ह्‍योद्, ङ इनारर रारिइमुँ। क्यु खाबर खबै च्हमिरि घ्रिने ङइ “क्हिए गौरिउँइँले ङलाइ च्युगुदे क्यु थुँल् पिंन्” बिमा 44 चइ ङने “थुँन्, थुँन् बिदै ङ क्यु थुँल् पिंसि क्हिए सलुमैंलाज्यै या ङइ क्यु ख्योमिंब्मुँ,” बिमुँ, च च्हमिरिन् ङए क्ल्हेए च्हए ल्हागिरि क्हिजी त्हाँबै प्ह्रेंस्यो तरिगे।’

45 “ङइ छले सैं न्हों-न्हों प्राथना लल् खाँब् भन्दा ओंसोंन् रिबेका प्हैंदर गौरि थेंसि खइ, धै इनारर तसि क्यु ख्योइ। ङइ चने ‘गार आम्हाँदिल्‍ले ङलाइ क्यु थुँल् पिंन्,’ बिइ।

46 “छ बिबै तोदोंन् चइ ह्रोंसए प्हैंदउँइँले गौरि तसि क्यु थुँन् बिइ। धै क्हिए सलुमैंलाज्यै ङइ क्यु थुँल् पिंब्मुँ बिमा ङइ क्यु थुँइ। च लिउँइ ङए सलुमैंलाज्यै या चइ क्यु थुँल् पिंइ।

47 “झाइले ङइ ‘क्हि खाबए च्हमि जा?’ बिसि चने ङ्योएमा चइ ‘नाहोर नेरो मिल्काए च्ह बतूएलए च्हमि ग’ बिइ। छबिमा चए नखुँर ङइ फुलि नेरो योर रयाँमैं खिमिंइ। 48 झाइले ङइ ह्रोंसए क्र कुरसि मान लसि याहवेहलाइ फ्योइ, धै ङए क्ल्हे अब्राहामए याहवेह परमेश्‍वरलाइ धन्यबाद पिंइ। तलेबिस्याँ ङए क्ल्हेए अलिए क्वेंमि चए च्हए ल्हागिर पिंबर ङ फेनल् त्हुबै घ्याँर खीजी डोरेसि पखमिंइ। 49 तारे क्हेमैंइ ङए क्ल्हेए फिर ल्हयो खसि क्ह्रोंसेंन्ले चु के लमिंम् बिस्याँ ङने बिद्। छ आललैया ङने बिद्, झाइले ङ क्योलो त्हेब्रे खनइ तले ह्‍यालै।”

50 च लिउँइ लाबान नेरो बतूएलइ बिइ, “चु ताँ याहवेहउँइँलेन् तब् ग। छतसि ङि क्हिने छ्याँब आछ्याँब तोइ बिल् आखाँ। 51 ङ्‍ह्‍योद्! रिबेका क्हिए उँइँर्न मुँ। याहवेहजी बिब् धोंले च क्हिए क्ल्हेए च्हए प्ह्रेंस्यो तरिगे। छतसि चलाइ बोसि ह्‍याद्।”

52 अब्राहामए केब्छैंइ चमैंए ताँ थेबै लिउँइ सर कुरसि मान लसि याहवेहलाइ फ्योइ। 53 च लिउँइ चइ मारा नेरो चाँदिए घाँनामैं नेरो क्वेंमैं पखसि रिबेकालाइ पिंइ। चए आघें नेरो आमालाज्यै या सै ल्हें फेबै ह्रोमै-क्होल्सैमैं पिंइ।

54 झाइले च नेरो चने मुँबै म्हिमैंइ चसि थुँसि च म्हुँइँस चर्न थोइ।

न्हाँगर रेसि चइ बिइ, “ङए क्ल्हे ङाँर तारे ङ ह्‍याल् पिंन्।”

55 दिलेया रिबेकाए आघें नेरो आमाइ बिइ, “ङिए च्हमि कुरो-च्युरोदे चुर ङिनेन् टिल् पिंन्। च लिउँइ च ह्‍यास्याँ तम्।”

56 छबिमा चइ बिइ, “ङ क्हैल् आलमिंन्। तलेबिस्याँ ङ फेनल् त्हुबै क्ल्ह्‍योर याहवेहजी डोरेमिंइमुँ। छतसि ङ ङए क्ल्हे ङाँर ह्‍याम्। ङलाइ ह्‍याल् पिंन्।”

57 चमैंइ बिइ, “छबिस्याँ च्हमि हुइसि चइ तो बिमुँ ङि चए सुँउँइँलेन् थेम्।” 58 झाइले चमैंइ रिबेका हुइसि “क्हि चु म्हिने बालु ह्‍याम्मा?” बिसि ङ्योएमा

चइ “अँ, ङ ह्‍याम्,” बिइ।

59 छतसि चमैंइ ह्रोंसए रिं रिबेका नेरो चए केब्स्यो, अब्राहामए केब्छैं नेरो चने खबै म्हिमैंने कुल्मिंइ। 60 चमैंइ रिबेकाए फिर आशिक पिंसि बिइ,

61 च लिउँइ रिबेका नेरो चए केब्स्योमैं सलुर क्रेसि च म्हिए लिलि ह्‍याइ। छले रिबेका बोसि च केब्छैं चए घ्याँ क्हाइ।

62 चमैं फेनेबै त्हेर इसहाक बेअर-लहैरोइउँइँले†24:62 बेअर-लहैरोइ चु मिंए अर्थ “ङ म्रोंबै सो प्ह्‍याबै याहवेहए इनार” ग (उत १६:१४)। खल। तलेबिस्याँ च नेगेव‡24:62 नेगेव कनान देशर्बै दक्षिणि ह्‍युल मरुभुमि मुँल। बिबै ह्‍युलर टिमल। 63 इसहाक ङेसा छझँ स्युरबर बैरु त्होंयाल। चइ ङ्ह्‍योमा सलुमैं खरिब् म्रोंइ। 64 रिबेकाज्यै या इसहाकलाइ म्रोंइ। झाइले सलुउँइँले तसि 65 “ङ्योने त्होबर खरिबै म्हि खाब् जा?” बिसि ङ्योएमा

केब्छैंइ बिइ, “च ङए क्ल्हे ग।” छबिमा रिबेकाइ क्रमुँइ ह्रोंसए लि हुइ।

66 च लिउँइ च केब्छैंइ ह्रोंसइ लबै ताँन् केमैं इसहाकने बिइ। 67 झाइले इसहाकइ रिबेका ह्रोंसए आमा साराए तम्बुर बोसि ब्ह्‍या लइ। छले रिबेका इसहाकए प्ह्रेंस्यो तइ। धै चइ रिबेकालाइ म्हाँया लइ। छले ह्रोंसए आमा सियाबै लिउँज्यै या इसहाकइ भों योंइ।