1 याकूब ह्रोंसए आबा टिबै कनान ह्‍युलर टिमल। 2 चए सन्तानए ताँ चुन् ग।

चए च्ह योसेफ च्युसे ङिदिं तमा चए आघेंमैंने बालु र-क्युमैंए बगाल छमल। चमैं याकूबए केब्स्योमैं बिल्हा नेरो जिल्पाए च्हमैं मुँल। तिंगें योसेफइ ह्रोंसए आघेंमैंइ लबै आछ्याँबै केमैं आबा ङाँर बिखइ। 3 याकूब (इस्राएल) खेब् तबै त्हेर योसेफ फिबइले चइ अरू च्हमैं भन्दा योसेफलाइ ल्हें म्हाँया लमल। छतसि चइ योसेफए ल्हागिर छ्याँब बुट्टा झोंबै ह्रिंबै बखु टुमिंइ। 4 छले आबाइ अरू च्हमैं भन्दा चए फिर ल्हें म्हाँया लब् म्रोंसि चए आघेंमैं चने बालु ख्रे लबर होंइ। धै चने बालु छेनाले आपोंमल।

5 तिगें योसेफइ म्होंड म्रोंइ। चइ च म्होंड आघेंमैंने सेमा चमैं झन चने बालु ल्हें ख्रे लबर होंइ, 6 तलेबिस्याँ चइ चमैंने बिइ, “ङइ म्रोंबै म्होंड थेद् ओ। 7 ङ्यो ताँन् म्रोंर गउँए प्हैं फैरिल। ङए प्हैं राइ, धै क्हेमैंए प्हैंमैंइ कारग्युले ङए प्हैं फ्योइ।”

8 छबिमा चए आघेंमैंइ चने बिइ, “ङिए फिर क्हिइ ग्याल्स लल् म्हैल् वा? ङिए फिर क्हि क्ल्हे तल् म्हैल् वा?” छतमा चइ म्रोंबै म्होंडए ताँमैंइ लमा आघेंमैं चने बालु बेल्‍ले ख्रे लबर होंइ।

9 च लिउँइ चइ धबै म्होंड म्रोंसि आघेंमैंने बिइ, “ङइ धबै म्होंड म्रोंइ। त्हिंयाँ, लयाँ नेरो च्युसे घ्रि मुसारमैंइ ङलाइ फ्योरिल।”

10 छले चइ ह्रोंसए आबा नेरो आघेंमैंने चु म्होंड सेमा चए आबाइ चलाइ हौदिसि बिइ, “क्हिइ म्रोंबै चु म्होंड खैबै म्होंड जा? ङ, क्हिए आमा नेरो क्हिए आघेंमैं खसि क्हिलाइ कुरसि फ्योले वा?” 11 छतमा चए आघेंमैंइ चने ह्रिस लबर होंइ। दिलेया आबाइ बिस्याँ च ताँ सैं न्होंर्न थेंइ।✡37:11 चिब्मैं ७:९

12 तिगें योसेफए आघेंमैंइ आबाए र-क्युमैं छबर शकेम बिबै क्ल्ह्‍योर ह्‍याल। 13 छतमा याकूबइ (इस्राएलइ) योसेफने बिइ, “क्हिए आघेंमैं शकेमर र-क्युमैं छसिन् मुँ। छतसि खो! ङइ क्हि चमैं ङाँर कुलब्मुँ।”

योसेफइ “तम्, ङ ह्‍याबर तयार मुँ, आबा,” बिइ।

14 याकूबइ चने बिइ, “क्हिए आघेंमैं नेरो र-क्युमैं छ्याँबन् मुँ उ आरे ह्‍यासि ङ्‍ह्‍योद्। झाइले च ताँमै ङ ङाँर बिखो।” छबिसि चइ योसेफलाइ हेब्रोनए ब्याँसिउँइँले शकेमर कुलइ।

योसेफ शकेमर फेनेमा 15 म्हि घ्रिइ च म्रोंर स्युररिब स्यासि चने “क्हिइ खाबलाइ म्हैल?” बिसि ङ्योएइ।

16 “ङ ङए आघेंमैं म्हैरिलो। चमैंइ र-क्युमैं खनिर छरिइमुँ? गार आम्हाँदिल्‍ले ङने बिमिंन् बिसि चइ,” बिइ।

17 धै च म्हिइ बिइ, “चमैं छुइले ह्‍याइ। चमैंइ ‘ङ्यो दोतानइ ह्‍‍याले’ बिरिब ङइ थेल।” छबिमा योसेफ ह्रोंसए आघेंमैं म्हैदै ह्‍यामा चमैंलाइ दोतानर स्याइ।

18 आघेंमैंइ ह्रेंगोउँइँले योसेफ खरिब् म्रोंसि च खेंमैं ङाँर फेखब् ओंसोंन् चलाइ सैबै मत लइ। 19 चमैंइ खेंमैंए न्होंर बिइ, “च म्होंड म्रोंबै म्हि खसिन् मुँ। तारे चलाइ सैसि होंल्दों घ्रिर भ्योंवाले। 20 झाइले ‘क्ह्‍योंर्बै खेदोमैंइ चलाइ चवान’ बिसि ङ्योइ आबाने बिले। धै चए म्होंडमैं तो तमना ङ्ह्‍योले।”

21 चु ताँ थेसि आघें रूबेनइ “ङ्योइ चलाइ सैल् आत,” बिसि चमैंए योउँइँले योसेफ जोगेल् म्हैइ। 22 “चलाइ आसैले, बरु चुर तोइ आरेबै क्ल्ह्‍योर्बै चु होंल्दोंर भ्योंवाले। दिलेया चए फिर यो आझोंले।” चमैंए योउँइँले जोगेसि योसेफ ह्रोंसए आबा ङाँर कुल्मिंबै सैं मैंसि रूबेनइ छ बिल। 23 झाइले योसेफ ह्रोंसए आघेंमैं ङाँर फेखमा चइ खिबै छ्याँबै बुट्टा झोंबै बख्खु चमैंइ प्लिसि प्हेंवाइ। 24 च लिउँइ चमैंइ चलाइ क्हासि क्यु आरेबै थेबै होंल्दोंर भ्योंवाइ।

25 च लिउँइ चमैं चब् चबर टिमा क्होवाँइ ङ्ह्‍योमा गिलादउँइँले छों लबर खबै इश्माएलीमैं म्रोंइ। चमैंइ लिंबै थाँ खबै मसल, लेप नेरो मूर्र सलुमैंए फिर थेंसि मिश्रउँइ ह्‍यारिल। 26 छतमा यहूदाइ ह्रोंसए आघें-अलिमैंने बिइ, “ङ्योइ ह्रोंसए अलि सैसि चए को लोस्याँ तो फाइदा तमुँ? 27 छतसि चए फिर ङ्योइ यो आझोंले, बरु चलाइ इश्माएलीमैंए योर चुँवाले। तलेबिस्याँ च ङ्योए अलि ग, ङ्योए से-को घ्रि ग।” छबिमा चए आघें-अलिमैंइ चइ बिबै ताँ ङिंइ। 28 लिउँइ छों लबै मिद्यानिथेंमैं च घ्याँउँइँले खमा योसेफए आघें-अलिमैंइ चलाइ होंल्दोंउँइँले चैंपसि इश्माएलीमैंए योर चाँदिए मुइ ङ्हिस्युर चुँवाइ। छले चमैंइ योसेफ मिश्र बिबै ह्‍युलर बोइ।✡37:28 चिब्मैं ७:९

29 च लिउँइ रूबेन होंल्दोंर एखमा योसेफलाइ चर आम्रोंमा सैं नसि ह्रोंसए क्वें ट्होवाइ। 30 झाइले अलिमैं ङाँर ह्‍यासि बिइ, “च फ्रेंसिम् चर आरेन! तारे ङ खनिर ह्‍याब?”

31 झाइले चमैंइ र घ्रि सैसि योसेफए बख्खु कोर प्ल्हुँमिंइ। 32 झाइले च छ्याँबै बुट्टा झोंबै बख्खु चमैंइ खेंमैंए आबा ङाँर पखसि बिइ, “ओ आबा! चु बख्खु ङिइ योंइ। ङ्ह्‍योत्ति, चु क्हिए च्हल् ङिंब् उ आङिं?”

33 याकूबइ च क्वें सेसि बिइ, “चु ङए च्हए बख्खु ग। क्ह्‍योंर्बै खेदोमैंइ चलाइ चवालै! क्ह्रोंसेंन ङए च्ह च्यता-चिति लवालै।” 34 छतमा चइ ह्रोंसए क्वें ट्होवाइ, धै ह्रेंगा खिसि ह्रोंसए च्हए ल्हागिर ल्हें त्हे समा शोक लइ। 35 चए च्ह-च्हमिमैं ताँनइ आबाए सैं क्होमिंल् म्हैइ। दिलेया आबाए सैं क्होल् आङिं। छतसि आबाइ योसेफए ल्हागिर शोक लसि “ङ शोक लसिन् ङए च्ह ङाँर क्रोंर ह्‍याम्,” बिइ।

36 योसेफ बिस्याँ मिश्र ह्‍युलर फेनेमा मिद्यानिमैंइ चलाइ फारो म्रुँए दरबार रुँब्मैं न्होंर्बै पोतीफर बिबै कप्‍तानने चुँवाइ।