11
बिश्वास
1 बिश्वास बिब तो जा बिस्याँ ङ्योए सैंइ तो सैए फिर आशा थेंमुँ च सै क्ह्रोंसेंन तब्मुँ, धै मिइ आम्रोंलै या च सै योंब्मुँ बिसि भर लब् ग।
2 तलेबिस्याँ छाबन् बिश्वास स्योंम्बै म्हिमैंइ लबइले परमेश्वरजी चमैंलाइ खोमल।
3 ताँन् ह्युल परमेश्वरए बचनउँइँले बनेइ, धै म्रोंल् खाँबै सैमैं म्रोंल् आखाँबै ताँउँइँले बनेइ बिसि बिश्वासउँइँलेन् ङ्योइ क्होल् खाँम्।✡11:3 उत १:१; भज ३३:६,९; यूह १:३
१. हाबिल
(उत्पत्ति ४:३-१०)
4 बिश्वासउँइँलेन् कयिनइ भन्दा हाबिलइ बेल्ले छ्याँबै ख्रो परमेश्वरलाइ पिंइ। छाबै बिश्वासइ लमा हाबिल परमेश्वरए उँइँर ठिक ठर्दिइ, तलेबिस्याँ चइ पिंबै ख्रो म्रोंसि परमेश्वर सैं तोंइ। हाबिल सियालेया चइ लबै बिश्वासउँइँलेन् अझै च पोंसिन्मुँ।✡11:4 उत ४:३-१०
२. हनोक
(उत्पत्ति ५:२१-२४)
5 बिश्वासउँइँलेन् हनोक सिल् आत्हुनले स्वर्गर क्वेबोयाइ। च खाबने या आत्हो, तलेबिस्याँ परमेश्वरजी चलाइ स्वर्गउँइ बोयाल। च स्वर्गउँइ क्वेबोब् भन्दा ओंसों चइ परमेश्वरलाइ सैं तोंन् लल बिबै ताँ परमेश्वरए छ्वेर प्ह्रिइमुँ।✡11:5 उत ५:२१-२४ 6 बिश्वास आलल्ले खाबज्यै या परमेश्वरलाइ सैं तोंन् लल् आखाँ। तलेबिस्याँ खाउ म्हि परमेश्वरए चेंदो खमुँचम्हिइ “परमेश्वर क्ह्रोंसेंन मुँ धै खीलाइ म्हैब्मैंलाइ खीजी इनाम पिंब्मुँ,” बिसि बिश्वास लल् त्हुम्।
३. नोआ
(उत्पत्ति ६:५—८:२२)
7 बिश्वासउँइँलेन् नोआज्यै च त्हे समा आम्रोंबै केमैंए बारेर*11:7 च त्हे समा आम्रोंबै केमैंए बारेर अर्थ, थेबै नाँ बाडि तसि क्युइ ह्युल नास लवाब्मुँ। परमेश्वरउँइँले था सेइ। धै खीजी बिबै ताँ क्वेंसि ह्रोंसए परवा जोगेबर नोआइ क्यु झाज घ्रि बनेइ। धै “ह्युलर्बै म्हिमैंइ परमेश्वरजी बिबै ताँ आक्वेंइमुँ,” बिसि नोआइ चमैंलाइ छ्याब् मुँबन् ठर्दिइ, दिलेया ह्रोंसए बिश्वासउँइँले च ठिक ठर्दिइ।✡11:7 उत ६:१३-२२
४. अब्राहाम
(उत्पत्ति ११:३१—१२:९)
8 बिश्वासउँइँलेन् अब्राहामइ परमेश्वरजी बिब ङिंइ, धै ह्याद् बिबै क्ल्ह्योउँइ ह्याइ। लिउँइ च क्ल्ह्योए क्ल्हे चलाइन तल् पिंबै सैं परमेश्वरल् मुँल। दिलेया ह्रोंस खनइ ह्यारिइमुँ बिब ह्रोंसलाइन था आरेल।✡11:8 उत १२:१-५ 9 बिश्वासउँइँलेन् अब्राहाम आगुए ह्युलर्बै म्हि धोंले परमेश्वरजी पिंस्यो बिसि बाछा फैबै ह्युलर इसहाक नेरो याकूब धोंले तम्बुजरे टिइ। चमैं या अब्राहामने बा-बालुन् परमेश्वरजी पिंम् बिसि बाछा फैबै हगवालमैं मुँल।✡11:9 उत ३५:२७ 10 तलेबिस्याँ परमेश्वरजीन् बनेबै खोंयोंइ बिलै तरिबै जग मुँबै सहरए घ्याँ अब्राहामइ ङ्ह्योरिल।
५. सारा
(उत्पत्ति १७:१९; १८:१-१५; २१:२)
11 बिश्वासउँइँलेन् साराज्यै माँब् तल् खाँबै लिउँइ प्हसे नोबै भों योंइ, तलेबिस्याँ “प्हसे फिम् बिसि बाछा फैबै परमेश्वर बिश्वास योग्यर्बै मुँ” बिसि चइ मैंल।✡11:11 उत १८:११-१४; २१:२ 12 छतसि सिबै त्हे तयाल खाँबै म्हि घ्रिउँइँलेन् मुर्बै सारमैं नेरो मा ङ्युँइए रेर्बै च्योलै आखाँबै बालुवाए त्हुल धोंलेन् ल्हें सन्तान तइ।✡11:12 उत १५:५; २२:१७; ३२:१२
13 च ताँन् म्हिमैंइ परमेश्वरजी पिंम् बिसि बाछा फैबै सैंमैं आयोंलेया बिश्वास लसिन् सिइ, दिलेया च सैमैं ह्रेंगोउँइँलेन् म्रोंसि चमैं सैं तोंइ। तलेबिस्याँ चु पृथ्बीर म्हिमैं ङ्हिरोबै प्ह्रें धों तब् मुँन बिबै ताँ चमैंइ सेइ।✡11:13 उत २३:४; १ इति २९:१५; भज ३९:१२ 14 छाबै ताँ बिबै म्हिमैंइ खोंयोंन् बिलै ह्रोंसलन् तरिबै ह्युल घ्रि म्हैरिइमुँ बिसि छेनाले सेल् खाँम्। 15 चमैंइ खेंमैंइ वाथेंबै ह्युलर एयाबै सैं लस्याँ चमैंलाइ एल् योंबै मौका योंल, दिलेया चमैंइ च ह्युलए बारेर तोइ वास्ता आल। 16 बरु चमैंल झन् छ्याँबै ह्युल, अथवा स्वर्गर, ह्याबै सैं मुँल। छतसि परमेश्वर “चमैंए परमेश्वर ग” बिबर फा आपिल, तलेबिस्याँ खीजी चमैंए ल्हागिर सहर घ्रि तयार लथेंइमुँ।
17 परमेश्वरजी अब्राहामए जाँच लमा अब्राहामइ बिश्वासए भरर्न ह्रोंसए च्ह इसहाक ख्रो पिंबर होंइ। परमेश्वरजी ओंसोंन् अब्राहामने बाछा फैलेया अब्राहामइ खीए घ्रिदे मुँबै च्हए ख्रो पिंबर छेइ।✡11:17 उत २२:१-१४ 18 तलेबिस्याँ “इसहाकउँइँलेन् क्हिए सन्तान तब्मुँ,” बिसि परमेश्वरजी ओंसोंन् अब्राहामने बिल।✡11:18 उत २२:१२ 19 छतसि म्हिमैं सिलेया परमेश्वरजी धबै सोगों लमिंल् खाँम् बिबै ताँ अब्राहामइ मैंइ, धै क्ह्रोंसेंन खीए च्ह इसहाकलाइ सिबउँइँले सोगो लमिब् धोंलेन् खीजी धबै योंइ।
६. इसहाक, याकूब, योसेफ
(उत्पत्ति २७:१-४१; ४८:८-२०; ५०:२४,२५)
20 बिश्वासउँइँलेन् इसहाकइ खीए च्ह ङ्हिं याकूब नेरो एसावलाइ लिउँइ योंबै आशिक पिंइ।✡11:20 उत २७:२७-२९,३९-४०
21 बिश्वासउँइँलेन् याकूबइ सिबै त्हेर खीए च्ह योसेफए च्हमैं ङ्हिंलाइ आशिक पिंइ। झाइले खिइ छेबै प्हरेए च्होर पत्खु तसि परमेश्वरए मिं क्वेइ।✡11:21 उत ४८:१-२०; उत ४७:३१
22 बिश्वासउँइँलेन् योसेफइ ह्रोंस सिबै त्हेर इस्राएलीमैं मिश्र ह्युलउँइँले त्होंखबै बारेर्बै ताँ पोंइ। धै “ङए सिनु या मिश्रउँइँले बोयाद्,” बिसि चइ चमैंने बिथेंल।✡11:22 उत ५०:२४-२५; प्रस १३:१९
७. मोशा
(प्रस्थान १:२२—२:२; २:११-१६; ५:१-९; १२:१-३६; १४:१-३१)
23 मोशा फिमा बेल्ले छ्याँब मुँल। छतसि बिश्वासउँइँलेन् मोशाए आबा-आमाइ म्हैंन सोंल् समा चलाइ लोथेंइ।†11:23 लोथेंइ तलेबिस्याँ च इजिप्ट ह्युलर्बै म्रुँइ हिब्रू मुयुँ कोलोमैंलाइ सैद् बिबै हुकुम पिंला धै म्रुँइ बिबै ताँ या चमैंइ आङिं।✡11:23 प्रस २:२; प्रस १:२२
24 फ्रेंसि तबै लिउँइ बिश्वासउँइँलेन् मोशाइ “खि फारो म्रुँए च्हमिंए च्ह ग,” बिसि बिल् आङिं।✡11:24 प्रस २:१०-१२ 25 पाप लसि तिस्याँदे सुख योंब् भन्दा बरु परमेश्वरए म्हिमैंने दुःख योंसिन् टिब चइ त्हाँइ। 26 मोशाइ मिश्र ह्युलर्बै ताँन् सै न्होर योंब् भन्दा ख्रीष्टए ल्हागिर आगुइ स्यारलै सैदिइ टिब थेबै ताँ मैंइ, तलेबिस्याँ परमेश्वरउँइँले लिउँइ योंबै इनाम चइ ङ्ह्योरिल।
27 बिश्वासउँइँलेन्‡11:27 बिश्वासउँइँलेन् परमेश्वरजी ङ्योलाइ मिश्रउँइँले तेइ पखम् बिसि क्वेंल। मोशाइ फारो म्रुँए ह्रिसने आङ्हिंन्ले मिश्र ह्युल पिवाइ, तलेबिस्याँ परमेश्वरलाइ आम्रोंलेया म्रोंब् धोंलेन् च भोंसि तइ। 28 काल पखबै स्वर्गदूतइ इस्राएलर्बै म्हिमैंए च्ह थेबालाइ आस्यारिगे बिसि मोशाइ बिश्वासउँइँलेन् दुःखने फ्रेबै चाडए रोस म्हाँदिइ। चइ इस्राएलर्बै म्हिमैंने क्युए ख्रो पिंसि चए को म्रार प्राबर ल्हैदिइ।✡11:28 प्रस १२:२१-३०
29 बिश्वासउँइँलेन् इस्राएलीमैंइ ओबानो क्ल्ह्योर प्रब् धोंले ओल्ग्या मा ङ्युँइ तर्दिइ, दिलेया चमैंलाइ ल्हाखबै मिश्रीथेंमैं छलेन् तर्दिबर होंमा ताँन् प्ल्हुँसि सियाइ।✡11:29 प्रस १४:२१-३१
८. कानान ह्युलरि
(यहोशू २:१-२४; ६:१-२५)
30 बिश्वासउँइँलेन् इस्राएलीमैं यरिहो बिबै सहरर ङिख्खे समा स्युररिमा यरिहोर्बै गाह्रा फुयाइ।✡11:30 यहो ६:१२-२१ 31 परमेश्वरजी बिबै ताँ आङिंबै यरिहो सहरर्बै म्हिमैंलाइ खीजी नास लमा बिश्वासउँइँलेन् फ्यालुस्यो राहाब नास आत, तलेबिस्याँ छैं लबर ह्याबै इस्राएलीमैंलाइ मान लसि चइ टिल् पिंल।✡11:31 यहो ६:२२-२५; यहो २:१-२१
32 अरू ल्हें ताँ ङइ तो बिले? तलेबिस्याँ परमेश्वर फिर बिश्वास लबै स्योंम्बै म्हिमैं गिदोन्, बाराक, शिमशोन, यिप्ता, दाऊद, शमूएल नेरो अगमबक्तामैंए बारेर्बै ताँमैं बिबै त्हे तोगो ङने आरे।✡11:32 न्याय ४:६—५:३१; ६:११—८:३२; ११:१—१२:७; १३:२—१६:३१; १ शमू १:१—२५:१; १ शमू १६:१—१ म्रुँ २:११ 33 बिश्वासउँइँलेन् नेसि चमैं न्होंरि को-कोइइ ह्युलमैं ट्होइ, धै ठिक निसाफ लसि परमेश्वरजी बाछा फैसि पिंम् बिबै आशिक चमैंइ योंइ। कोइइ सिंहए सुँ म्रुवाइ,✡11:33 दान ६:१-२७ 34 कोइइ बेल्ले लुँबै मि सैवाइ, कोइ सेलाँइ (तरवारइ) सैल् म्हैब्मैंउँइँले जोगेइ, कोइ भों आरेलेया भोंब् तइ, कोइइ ल्हडें लबर भों योंसि अरू ह्युलर्बै फौजीमैं ल्हावाइ।✡11:34 दान ३:१-३० 35 कोइ च्हमिरिमैंइ चमैंए सियाबै म्हिमैं सोगों तसि धबै योंइ।
कोइ सिबै लिउँइ झन् बेल्ले छ्याँबै अर्को छ्ह योंबै ल्हागिर थेबै दुःख नोइ।✡11:35 १ म्रुँ १७:१७-२४; २ म्रुँ ४:२५-२७ 36 कोइ म्हिमैंइ सँउँलिइ फैसि झेलर च्युवाब, बिल्लि लब, कोर्राए प्रुब ताँन् सैदिल।✡11:36 १ म्रुँ २२:२६-२७; २ इति १८:२५-२६; यर २०:२; ३७:१५; ३८:६ 37 चमैंलाइ म्हिमैंइ युँमाइ प्रिंसि सैइ, करौंतिइ क्ल्हेइ, सेलाँइ सैवाइ। छले दुःख पिंसि चमैंए सैमैं नोक्सान लवाइ। छतसि चमैं ङ्हाँदु तसि र-क्युए ट्हुबिमैं खिसि क्याइ खैने माइ खेले प्ररिइ।✡11:37 २ इति २४:२१ 38 (चु ह्युल चमैं टिबै लायकबै आरेल!) चमैं क्यु आयोंबै क्ल्ह्योजरे, कोंजरे, उजरे नेरो रो न्होंजरे टिप्रल् त्हुइ।
39 खेंमैंइ लबै बिश्वासइ लमा चमैंल छ्याँबै बयन तइ। दिलेया परमेश्वरजी बाछा फैसि पिंम् बिबै सै बिस्याँ चमैंइ आयोंल। 40 तलेबिस्याँ परमेश्वरजी ङ्योए ल्हागिर झन् छ्याँबै चाँजो लल, धै ङ्योने बालु मत्त्रे चमैं पबित्र तरिगे बिब खीए सैं मुँल।
✡11:3 11:3 उत १:१; भज ३३:६,९; यूह १:३
✡11:4 11:4 उत ४:३-१०
✡11:5 11:5 उत ५:२१-२४
*11:7 11:7 च त्हे समा आम्रोंबै केमैंए बारेर अर्थ, थेबै नाँ बाडि तसि क्युइ ह्युल नास लवाब्मुँ।
✡11:7 11:7 उत ६:१३-२२
✡11:8 11:8 उत १२:१-५
✡11:9 11:9 उत ३५:२७
✡11:11 11:11 उत १८:११-१४; २१:२
✡11:12 11:12 उत १५:५; २२:१७; ३२:१२
✡11:13 11:13 उत २३:४; १ इति २९:१५; भज ३९:१२
✡11:17 11:17 उत २२:१-१४
✡11:18 11:18 उत २२:१२
✡11:20 11:20 उत २७:२७-२९,३९-४०
✡11:21 11:21 उत ४८:१-२०; उत ४७:३१
✡11:22 11:22 उत ५०:२४-२५; प्रस १३:१९
†11:23 11:23 लोथेंइ तलेबिस्याँ च इजिप्ट ह्युलर्बै म्रुँइ हिब्रू मुयुँ कोलोमैंलाइ सैद् बिबै हुकुम पिंला
✡11:23 11:23 प्रस २:२; प्रस १:२२
✡11:24 11:24 प्रस २:१०-१२
‡11:27 11:27 बिश्वासउँइँलेन् परमेश्वरजी ङ्योलाइ मिश्रउँइँले तेइ पखम् बिसि क्वेंल।
✡11:28 11:28 प्रस १२:२१-३०
✡11:29 11:29 प्रस १४:२१-३१
✡11:30 11:30 यहो ६:१२-२१
✡11:31 11:31 यहो ६:२२-२५; यहो २:१-२१
✡11:32 11:32 न्याय ४:६—५:३१; ६:११—८:३२; ११:१—१२:७; १३:२—१६:३१; १ शमू १:१—२५:१; १ शमू १६:१—१ म्रुँ २:११
✡11:33 11:33 दान ६:१-२७
✡11:34 11:34 दान ३:१-३०
✡11:35 11:35 १ म्रुँ १७:१७-२४; २ म्रुँ ४:२५-२७
✡11:36 11:36 १ म्रुँ २२:२६-२७; २ इति १८:२५-२६; यर २०:२; ३७:१५; ३८:६
✡11:37 11:37 २ इति २४:२१