1 ओ अलि-अङाँमैं, क्‍हेमैंए न्होंरि ल्‍हें म्‍हिमैं लोमिंबै चिब तल् आम्‍हैद्, तलेबिस्याँ परमेश्‍वरजी निसाफ लमा लोमिंबै चिब्मैंलाइ कडा निसाफ लब्मुँ बिसि क्‍हेमैंइ था सेइमुँ। 2 ङ्यो ताँनइ ल्‍हें गल्तिमैं लम्, दिलेया खाबइ ह्रोंसइ पोंबै ताँर गल्ति आल, चइ ह्रोंसए ताँन् ज्युइ या तार झोंल् खाँम्, धै च क्ह्रोंसेंन्बै छ्याँबै म्हि तम्। 3 ङ्योइ बिब ङिंरिगे बिसि घोडाए सुँर लगाम झोंस्‍याँ ह्रोंसइ खनिर बोदा ङ्हाँमुँ छाइन बोल् खाँम्। 4 ङ्ह्‍योत्ति, क्यु झाजमैं थेबै खैंए भोंइ प्रम्। क्यु झाजमैं थे-थेब मुँलेया च्‍युथिरि ओलेबै सैउँइँले क्यु झाज ओलेबै म्‍हिइ ह्रोंसइ खनि बोदा ङ्हाँमुँ छाइन बोम्। 5 छलेन ङ्योए ले च्युथिरि मुँलेया ङ्योइ तार आझोंस्याँ चइ थे-थेबै ताँ पोंम्।

च्‍युथिरि मिइ थे-थेबै क्ह्‍यों (बन) तिस्यादेर्न ख्रोंवाम्। 6 ङ्योए ले या मि धों तब् ग। ज्युर्बै सैमैं न्होंर ङ्योलाइ पापर च्होवाबै सै चुन् ग। चुइ ताँन् ज्यु पापर च्होवाम्। धै ङ्योए छ्हर मि त्हवासि नर्गर झोंवाम्। 7 ह्‍युलर्बै ताँन् खालर्बै खेदो, नमे, प्‍हुरि, ताँगमैं म्‍हिइ तार झोंल् खाँमुँ। 8 दिलेया म्हिए ले खाबज्‍यै या तार झोंल् आखाँ। लेम् बिखइ प्लिंबै तार झोंल् आखाँबै दुष्‍ट सै ग। 9 चु लेउँइँलेन् ङ्योइ ङ्योए प्रभु नेरो परमेश्‍वर आबाए मिं क्वेम्, धै चु लेउँइँलेन् परमेश्‍वरजी बनेबै म्‍हिमैंलाइ गाल् केम्।✡3:9 उत १:२६ 10 च सुँउँइन परमेश्‍वरलाइ धन्यबाद पिंब नेरो म्हिमैंलाइ गाल् केब लम्। ओ ङए अलि-अङाँमैं, छ तल् आतमल। 11 मुल घ्रिउँइँले लिंब नेरो काँबै क्‍यु त्‍होंम् रो वा? 12 ओ ङए अलि-अङाँमैं, तुँबु धुँर जैतुनए रो रोल् खाँम्‍मा? धै अँगुरए धुँर तुँबुए रो रोल् खाँम्‍मा? आखाँ, छलेन काँबै क्‍युए मूलउँइँले लिंबै क्‍यु त्होंल् आखाँ।

13 क्हेमैं न्होंर ह्रब्-सेब नेरो ताँ क्‍होबै म्‍हि खाब मुँ? च म्‍हिइ थेब् आप्‍हैंन्‍ले छ्याँबै बानिउँइँले छ्याँबै केमैं लसि उँइँरिगे। 14 दिलेया क्‍हेमैंए सैंर ह्रिस लब, खोंबै सैं मुँइबिस्‍याँ छाबै ताँर आप्हैंन्। छाबै ताँर थेउ प्हैंस्याँ क्हेमैंइ क्ह्रोंसेंन्बै ताँ थोम्। 15 छाबै के परमेश्‍वरउँइँले योंबै ह्रब्-सेबै ताँ आङिं। दिलेया चु ह्‍युलर्बै, ङ्योए आछ्याँबै सैंउँइँले खब नेरो शैतान बिबै दुष्‍टउँइँले खबै ताँ ग। 16 तलेबिस्याँ म्हिमैंइ आगुए फिर ह्रिस लब, खोंसि ल्हें किंल् म्‍हैस्याँ चर सैं आक्ह्रिसि म्हिमैंइ दुष्‍ट केमैं लम्। 17 दिलेया परमेश्‍वरजी ह्रब्-सेबै लमिंबै म्‍हिए सैं छ्याँब तम्, धै चइ आक्ह्रिब्मैं क्ह्रिमिंब, आगुए फिर ल्हयो खब, च्हैंसि मैंसि के लब, दयाम्हाँया लब, छ्याँबै केमैं लब, खाबै आफेलल्‍ले क्ह्रोंसेंन्बै ताँ लब तम्। 18 छले क्ह्रिल् लबै म्‍हिमैंइ क्ह्रिबै ताँ पोंसि ठिक केमैंए रो योंम्।*3:18 ठिक केमैंए रो योंम् अर्थ, म्हिमैंए न्होंरि ताँनइ ठिक के लमा प्होंगि आत।