1 “क्ह्रोंसेंन्बै अँगुरए धुँ ङन् ग, ङए आबा बिस्याँ धुँमैं छेनाले ङ्‍ह्‍योबै क्ल्हे ग। 2 ङने मुँबै हाँगमैं न्होंरि रोमैं आरोबै हाँग खीजी छाँडेब्मुँ। धै रोमैं रोबै हाँगमैं बिस्याँ अझै ल्हें रोमैं रोरिगे बिसि खीजी छिमल्दिब्मुँ। 3 ङइ क्हेमैंने बिबै ताँमैंउँइँले क्हेमैं ओंसोंन् चोखो तल् खाँइमुँ। 4 ङने टिद्, धै ङ या क्हेमैंने टिब्मुँ। हाँग अँगुरए धुँर आटिस्याँ च हाँगइ रोमैं रोल् आखाँ, छलेन क्हेमैं या ङने आटिइ बिस्याँ रोमैं रोल् आखाँ।

5 “अँगुरए धुँ ङन् ग, क्‍हेमैं हाँगमैं ग। खाबै ङने टिइ बिस्याँ, धै ङ चने तइ बिस्याँ, चइ ल्हें रोमैं रोब्मुँ। तलेबिस्याँ ङ ङाँइँले स्यो तसि क्हेमैंइ तोइ लल् आखाँ।✡15:5 गला ५:२२-२३ 6 ङने आटिब्मैं बिस्याँ रोमैं आरोबै हाँग धोंले बैरु भ्योंवाब्मुँ, धै कारयाब्मुँ। छाबै हाँगमैं म्हिमैंइ खागु लसि मिर ख्रोंवाब्मुँ। 7 क्‍हेमैं ङने टिइ बिस्याँ, धै ङए ताँ क्हेमैंए सैं न्होंर थेंइ बिस्याँ, क्हेमैंइ तो ह्रिदा ङ्हाँमुँ ह्रिद्, परमेश्‍वरजी क्हेमैंए ल्हागिर पिंब्मुँ। 8 क्‍हेमैंइ ल्हें रोमैं रोसि ङए चेलामैं ग बिसि उँइँमिंइ बिस्याँ ङए आबाए मिं थेब तब्मुँ।

9 “आबाजी ङने खैले म्‍हाँया लइमुँ, ङज्यै या क्हेमैंने छाबन् म्हाँया लइमुँ। छतसि क्हेमैं ङए म्हाँयार टिरिद्। 10 ङए आबाए ताँमैं ङिंसि खीए म्हाँयार ङ टिरिब् धोंले क्हेमैंइ ङइ बिबै ताँमैं ङिंइ बिस्याँ क्हेमैं ङए म्हाँयार टिरिब्मुँ। 11 ङए सैं तोंब् धोंलेन क्हेमैं या बेल्‍ले सैं तोंरिगे बिसि ङइ क्हेमैंने चु ताँ बिइमुँ।

12 “ङइ बिबै ताँ चुन् ग, ङइ क्‍हेमैंने म्‍हाँया लब् धोंलेन् क्‍हेमैंज्यै या घ्रिइ-घ्रिने म्‍हाँया लद्।✡15:12 यूह १३:३४; १५:१७; १ यूह ३:२३; २ यूह ५ 13 ह्रोंसए थुमैंए ल्हागिर ह्रोंसै ज्यु पिंब् भन्दा थेबै म्हाँया अरू तोइ आरे। 14 ङइ बिबै ताँमैं क्हेमैंइ लइ बिस्याँ क्हेमैं ङए खोबै थुमैं तब्मुँ। 15 तारेसेरो ङइ क्हेमैंने केब्छैं आबि, तलेबिस्याँ क्ल्हेइ तो लम् बिसि केब्छैंइ था आसे। दिलेया ङइ क्हेमैंने थु बिइमुँ, तलेबिस्याँ ङए आबाउँइँले थेबै तोन्दोंरि ताँ ङइ क्हेमैंने बिमिंइँमुँ। 16 क्‍हेमैंइ ङलाइ त्‍हाँब आङिं, ङइ क्हेमैं त्हाँब् ग। क्हेमैं ह्‍यासि रामैं रोरिगे धै क्हेमैंए रामैं खोंयोंन् बिलै तरिगे बिसि ङइ क्हेमैं हुइ। छलमा क्हेमैंइ ङए मिंर आबाने तो सै ह्रिलेया खीजी क्हेमैंलाइ पिंब्मुँ। 17 क्हेमैंज्यै या घ्रिइ-घ्रिने म्हाँया लरिगे बिसि ङ चु ताँमैं क्हेमैंने बिमुँ।

18 “ह्‍युलर्बै म्हिमैंइ क्‍हेमैं प्ह्रइ बिस्‍याँ, क्हेमैं प्ह्रब् भन्दा ओंसों चमैंइ ङलाइ प्ह्रब् ग बिसि क्हेमैंइ मैंन्। 19 क्‍हेमैं चु ह्‍युलर्बै आङिं, क्हेमैं चु ह्‍युलर्बै ङिंस्याँम् ह्‍युलर्बै म्हिमैंइ क्हेमैं ह्रोंसल धों ङ्हाँसि म्हाँया लमल। ङइ क्हेमैं चु ह्‍युलउँइँले त्हाँइ। छतसि ह्‍युलर्बै म्हिमैंइ क्हेमैंलाइ हेल लम्। 20 केब्छैं ह्रोंसए क्ल्हे भन्दा थेब् आत बिसि ङइ क्हेमैंने बिबै ताँ मैंन्। म्हिमैंइ ङ ह्रुगुदिइ बिस्याँ क्हेमैंलाज्यै या ह्रुगुदिब्मुँ। चमैंइ ङए ताँ ङिंइ बिस्याँ क्हेमैंए ताँ या ङिंब्मुँ।✡15:20 मत्ती १०:२४; लूक ६:४०; यूह १३:१६ 21 क्हेमैंइ ङए मिं किंसेरो म्हिमैंइ चु तोन्दोंरि दुःख क्हेमैंलाइ पिंब्मुँ। तलेबिस्याँ चमैंइ ङ कुल्मिंबै आबा ङो आसे। 22 ङ युसि चु ह्‍युलर्बै म्हिमैंने आबिमिंस्याँ चमैंने पापए दोष आतमल। दिलेया तारेम् चमैंए पापए ल्हागिरि चमैंने तोइ न्युँ आरे। 23 ङलाइ हेल लब्मैंइ ङए आबालाज्यै या हेल लम्। 24 अरू खाबज्यै या लल् आखाँबै औदिबै केमैं ङइ चमैंए उँइँर आलस्याँ चमैं पापए दोष आतमल। दिलेया चमैंइ ङ नेरो ङए आबा ङ्हिंना-ङ्हिंन् म्रोंसेया हेल लइमुँ। 25 दिलेया छ्वेर प्ह्रिथेंबै चु ताँ पूरा तबर छ तब् ग,

26 “ङइ आबाउँइँले ल्होमिंबै पबित्र प्ल्ह क्हेमैं ङाँर कुल्मिंब्मुँ, खी परमेश्‍वर आबाउँइँले युब्मुँ, खीजीन् ङए बारेर ग्वाइ पिंब्मुँ। 27 क्हेमैं ओंसों ओंनोंन् ङने बालु मुँबइले क्हेमैं या ङए साक्षि ग।”