11
येशूजी प्राथना लब लोमिंब
(मत्ती ६:९-१३; ७:७-११)
1 तिगें क्ल्ह्यो घ्रिर येशू प्राथना लरिल। खीजी प्राथना लल् खाँबै लिउँइ खीए चेला घ्रिइ खीने बिइ, “ओ प्रभु, क्युर प्ल्हुँसि बप्तिस्मा पिंबै यूहन्नाइ ह्रोंसए चेलामैं प्राथना लब् लोमिंब् धोंले ङिलाज्यै या लोमिंन्।”
2 येशूजी चमैंने बिइ, “क्हेमैंइ प्राथना लमा छले लद्:
‘ओ आबा,
ताँन् म्हिमैंइ क्हिए मिं पबित्र म्हाँदिरिगे,
क्हिए ग्याल्स युरिगे,
3 ङिए त्हिंइ ह्रोंसेबै चबै सै तिंयाँ ङि पिंनुँ।
4 ङिए पाप क्षमा लमिंनु,
तलेबिस्याँ ङिए फिर आछ्याँबै के लब्मैंलाइ ङिज्यै या ङि क्षमा लम्।
ङि सैदिल् आखाँबै जाँजर च्होंल् आपिंनु।’ ”
परमेश्वरजी चमैंए प्राथना थेब्मुँ बिब
5 झाइले येशूजी ह्रोंसए चेलामैंने चु अहान् बिइ, “क्हेमैंए न्होंरि खाब् मुँलेया म्हुँइँस आधार थु ङाँर ह्यासि ‘ओ थु, म्ल्हसि सोंम्ना खिद्,’ बिम्। 6 तलेबिस्याँ थु घ्रि तोगो ङ ङाँर बास टिबर खइमुँ, दिलेया ङने चल् पिंबै सै तोइ आरे।
7 “दिलेया क्हिए थुइ धिं न्होंउँइँले ‘छोरो ङ्हाँन् आबित्ति। ङइ म्रा तोरवाइ। तोगो ङए कोलोमैं ङने बालु न्हरु च्हुइरिइमुँ। तोगो ङ रेसि क्हिलाइ तोइ पिंल् आखाँ,’ बिम्।
8 “ङइ क्हेमैंने बिमुँ, थु तना बिलेया च रेसि क्हिलाइ तोइ आपिं, दिलेया क्हिइ ह्रिबै-ह्रिबन् लमा च रेसि क्हिलाइ चैदिबै तोन्दोंरि सै पिंब्मुँ।*11:8 चैदिबै तोन्दोंरि सै पिंब्मुँ छले ह्रिबै ह्रिबन् लमा ह्युलर मुँबै थुइमि क्हेमैंलाइ पिंम् बिस्याँ झन् क्हेमैंलाइ म्हाँया लबै परमेश्वर आबाजी कति ल्हें पिंलै।
9 “छतसि ङ क्हेमैंने बिमुँ, तो सै चैदिमुँ ह्रिब्रें लद्, झाइले परमेश्वरजी पिंब्मुँ। म्हैब्रें लद् क्हेमैंइ स्याब्मुँ। म्रार ह्राब्रें लद् क्हेमैंए ल्हागिरि खीजी म्रा थोंमिंब्मुँ। 10 तलेबिस्याँ ह्रिब्मैंइ योंब्मुँ, म्हैब्मैंइ स्याब्मुँ, झाइले म्रार ह्राब्मैंए ल्हागिर परमेश्वरजी म्रा थोंमिंब्मुँ।
11 “सैंर मैंन्दि, क्हेमैंए न्होंरि ह्रोंसए च्हइ क्हें ह्रिमा युँमा पिंबै आबा खाब् मुँगे धै ताँग ह्रिमा ताँगए साटोर प्हुरि पिंम् रो वा? 12 छलेन क्हिए प्हसेइ नग फुँ ह्रिमा क्हिइ बिच्छि पिंम् रो वा? आपिं! 13 क्हेमैं दुष्ट तलेया ह्रोंसए प्हसेमैंलाइ छ्याँबै सैमैं पिंल् ह्रम् बिस्याँ, झन् स्वर्गर टिबै क्हेमैंए परमेश्वर आबाजी खीने बालु ह्रिब्मैंलाइ कति ल्हें पबित्र प्ल्ह पिंब्मुँ।”
येशू नेरो बालजिबुल
(मत्ती १२:२२-३०; मर्कूस ३:२०-२७)
14 तिगें येशूजी मोंइ स्यासि लड तयाबै म्हि घ्रिउँइँले मों ल्हामा मों त्होंयाबै लिउँइ च लडा पोंबर होंइ। छ तब् म्रोंसि च खाउ मुँबै म्हिमैं प्लेटोयाइ। 15 दिलेया चमैं न्होंर्बै को-कोइइ “मोंमैंए चिब बालजिबुलउँइँले†११:१५ बालजिबुल दुष्ट बिबै स्योर तेबै थेबै मोंए अर्को मिं ग। चइ मोंमैं ल्हाम्,” बिइ।✡11:15 मत्ती ९:३४; १०:२५ 16 अरू म्हिमैंइ बिस्याँ “परमेश्वरजी क्हिलाइ शक्ति पिंब् ग बिस्याँ स्वर्गर्बै चिनु घ्रि उँइँन्,” बिसि येशूए जाँच लइ।✡11:16 मत्ती १२:३८; १६:१; मर्क ८:११
17 दिलेया येशूजी चमैंए सैंर्बै ताँ सेसि चमैंने बिइ, “ग्याल्स घ्रिर्बै म्हिमैं खें-खेंमैंए न्होंर्न आक्ह्रिस्याँ च ग्याल्स नास तयाम्। छलेन धिं घ्रिर्बै परवामैं आक्ह्रिस्याँ चमैं या नास तयाम्। 18 च धोंलेन् दुष्ट ह्रोंसनेन् आक्ह्रिस्याँ चए ग्याल्स खैले टिक्दिल् खाँम्?
“तलेबिस्याँ बालजिबुलए शक्तिउँइँले ङइ मोंमैं ल्हाम् बिसि क्हेमैंइ बिम्। 19 बालजिबुलए शक्तिउँइँले ङइ मों ल्हाम् बिस्याँ, क्हेमैंए टोलिर्बै म्हिमैंइ खाबै शक्तिउँइँले मोंमैं ल्हाम्? छतसि चमैंइन क्हेमैंए निसाफ लब्मुँ। 20 दिलेया परमेश्वरए शक्तिउँइँले ङइ मोंमैं ल्हाम् बिस्याँ, परमेश्वरए ग्याल्सर्बै शक्ति क्हेमैंए म्हाँजोर तखइमुँ बिसि क्हेमैंइ सेल् त्हुम्।
21 “झाइले अर्को ताँ थेद्! भोंबै म्हि घ्रिइ‡11:21 भोंबै म्हि घ्रिइ मतलब दुष्टइ। हत्यारमैं छेसि ह्रोंसए धिं रुँम् बिस्याँ चए सै न्होर खाबज्यै या बोल् आखाँ। 22 दिलेया च भन्दा भोंबै म्हि§11:22 च भन्दा भोंबै म्हि मतलब परमेश्वरए च्ह। चए फिर ह्वानेसि ट्वाहोवाम्, धै च म्हिइ भर लबै हत्यारमैं प्हेंवाम्, धै चए धिंर मुँबै सैमैं बोयासि अरूमैंलाइ चुमिंम्। 23 छतसि ङए ख आलबै म्हि ङए बिरोधी ग। धै ङने बालु आखुबै म्हइ खन्तोंदोंन् फ्रुँवाम्।✡11:23 मर्क ९:४०
ल्हावाबै मों धबै एखब
(मत्ती १२:४३-४५)
24 “झाइले अर्को ताँ: म्हिउँइँले मों त्होंबै लिउँइ च मों बास म्हैबै ल्हागिर छाइ छुइ खन्तोंदोंन् प्रम्। दिलेया खनिरै बास आयोंमा ‘ओंसों टिबै धिंर्न ङ एह्याम्,’ बिम्।
25 “छले च मों एखमा च धिं खाँसों ङ्हाँन्ले फ्योसि सजेथेंब् चइ स्याम्।*११:२५ सजेथेंब् चइ स्याम् च धिं, मतलब म्हि, क्होते मुँ, तलेबिस्याँ च म्हिइ परमेश्वरए प्ल्ह सैंर आथेंइमुँ। 26 छतसि च मों ह्यासि अझै ह्रोंस् भन्दा दुष्ट मों ङिउँलो पखसि चमैं ताँन् च न्होंर टिम्। झाइले च म्हिए छ्ह ओंसोंबै भन्दा लिउँइँबै झन् आछ्याँब तम्।”
क्ह्रोसेंन्ले आशिक योंब
27 येशूजी छ बिरिमा हुल न्होंउँइँले च्हमिरि घ्रिइ थेबै कैले बिइ, “क्हिलाइ फिसि ङ्हे तिंबै आमाइ बेल्ले आशिक योंइमुँ।”
28 दिलेया येशूजी च च्हमिरिने बिइ, “ओ नानि, ङए ताँ थेद्! खाबइ परमेश्वरए ताँ थेमुँ धै खीजी बिब् म्हाँदिमुँ, च म्हिइ झन् आशिक योंब्मुँ।”
शक्तिए चिनु उँइँन् बिब
(मत्ती १२:३८-४२)
29 छले म्हिए हुल् ल्हें तदै ह्यामा येशूजी बिइ, “तिंजोरोबै म्हिमैं दुष्ट ग। चुमैंइ ङ परमेश्वरजी कुल्मिंबै म्हि ग बिस्याँ ङिने प्रमाण उँइँन् बिम्। दिलेया स्योंम्बै योना बिबै अगमबक्ताए छ्हर तब् धों तबै चिनु मत्त्रे चुमैंइ म्रोंल योंब्मुँ, अरू चिनु म्रोंल् योंरिब् आरे।✡11:29 मत्ती १६:४; मर्क ८:१२ 30 तलेबिस्याँ निनबे बिबै सहरर्बै म्हिमैंए ल्हागिर योना†११:३० योना योना थेबै ताँग न्होंरि सोंरों टिसि सोइ। च धोंले येशू सियासि पाबै सोंरोंर धबै सोइ। औदिबै चिनु तब् धोंले म्हिए च्ह तिंजोरोबै म्हिमैंए ल्हागिर प्रमाण तब्मुँ।✡11:30 योना ३:४ 31 झाइले निसाफ लबै त्हिंइर शेबा‡11:31 शेबा ग्रिक क्युइरि, दक्षण बिबै ह्युलर्बै म्रुँस्यो रासि तिंजोरोबै म्हिमैंलाइ छ्याब् ल्हैदिब्मुँ, तलेबिस्याँ स्योंम्बै इस्राएल ह्युलर्बै सोलोमन म्रुँए ज्ञानए ताँ थेबर ह्रेंगो ह्युलउँइँले च म्रुँस्यो खइ। दिलेया थेद्! सोलोमन म्रुँ भन्दा झन् थेबै म्हि तोगो चुर मुँ।✡11:31 १ म्रुँ १०:१-१०; २ इति ९:१-१२ 32 झाइले निसाफ लबै त्हिंइर निनबे बिबै सहरर्बै म्हिमैंइ तिंइजोरोबै म्हिमैंए फिर छ्याब् मुँबन् ठर्दिब्मुँ, तलेबिस्याँ योनाउँइँले परमेश्वरए ताँ थेसि निनबे बिबै सहरर्बै म्हिमैंइ ह्रों-ह्रोंसए आछ्याँबै के पिसि परमेश्वरउँइ सैं एल। छतसि थेद्! योना भन्दा झन् थेबै म्हि चुर मुँ।”✡11:32 योना ३:५
येशूजी मि म्रोंबै ताँए बारेर लोमिंब
(मत्ती ५:१५; ६:२२-२३)
33 येशूजी धबै बिइ, “खाबज्यै या बत्ति म्रोसि च्ह्योगों न्होंर आलो, मतलब भाँडोइ आउथें, बरु धिं न्होंर खबै म्हिमैंइ मि म्रोंरिगे बिसि नुबै क्ल्ह्योर थेंम्।✡11:33 मत्ती ५:१५; मर्क ४:२१; लूक ८:१६ 34 क्हिए मि ज्युर्बै बत्ति ग। क्हिए मिइ छ्याँबै सै ङ्ह्योइ बिस्याँ क्हिए ताँन् सैं या छ्याँब तसि चारब तम्। दिलेया मिइ आछ्याँब सै ङ्ह्योइ बिस्याँ क्हिए सैं या आछ्याँब तसि मिछु तयाम्। 35 छतसि क्हेमैंने मुँबै चारब मि मिछु आतरिगे बिसि सैं चिद्।§११:३५ मतलब, लोमिंबै तो-तो ताँ म्हिमैंइ छ्याँब् ङ्हाँमुँ, च ताँ लिउँइ आछ्याँब् आतरिगे बिसि सैं चिद्। 36 क्हिए ज्युर मिछु आतल्ले ज्यु तिगोंन् चारब सै मुँस्याँ बत्ति चारब धोंले क्हिए ज्युउँइँले परमेश्वरए मिं चारब्मुँ।”*११:३६ मतलब, छ्याँबै मिइ परमेश्वरउँइ ङ्ह्योसि सैंर छ्याँब् छ्याँबै ताँमैं मत्त्रे तम्, दिलेया दुष्ट मिइ आछ्याँबै घ्याँउँइ ङ्ह्योसि दुष्ट ताँमैं सैंर तम्।
येशूजी फरिसीमैंए फिर छ्याब् ल्हैदिब
(मत्ती २३:१-३६; मर्कूस १२:३८-४०)
37 येशूजी चु ताँमैं बिल् खाँबै लिउँइ फरिसी घ्रिइ येशूलाइ खीए धिंर चब् चबर हुइ। झाइले येशू चए धिंर ह्यासि चब् चबर क्हुँइ। 38 येशूजी यो आख्रुल्ले चब् म्रोंसि च न्हिम्तो लबै फरिसी प्लेटोयाइ। 39 छतमा येशूजी चने बिइ, “क्हेमैं फरिसीमैं थलि प्हेलाए फि-फि छेन्ले म्याम्।†11:39 थलि प्हेलाए फि-फि छेन्ले म्याम् भाँडोए फि-फि म्याब् धोंले चमैंइ ह्रोंसए ज्यु या फि-फि ख्रुम्। दिलेया क्हेमैंए सैंर बिस्याँ आछ्याँबै ताँमैं नेरो लोबइ प्लिंइमुँ।”
40 “ओ, आमादुमैं! बैरुबै सै बनेबै परमेश्वरजीन् न्होंर्बै सै या बनेब आङिं वा? 41 क्हिए थलि प्हेलार मुँबै सैमैं आयोंब्मैं पिंन्। छ लस्याँ न्हों मुँलेया बैरु मुँलेया क्हेमैंए ल्हागिर ताँन् चोखो तब्मुँ।
42 “धिक्कार मुँ फरिसीमैं क्हेमैं सैं क्रोल् त्हुम्! क्हेमैंइ जिरा-मरिज पतिना छाबै च्युगुथिर सैमैंलै या च्योसि च्युबाँर्बै तिबाँ परमेश्वरए मिंर पिंमुँ, दिलेया क्हेमैंइ अरूए फिर ठिक निसाफ आल, धै परमेश्वरलाइ सैं न्होंउँइँले म्हाँया आल। च्युबाँर तिबाँ पिंब छ्याँब ग, दिलेया अरू केमैं या क्हेमैंइ छेनाले लल् त्हुमल।✡11:42 लेबी २७:३०
43 “धिक्कार मुँ फरिसीमैं क्हेमैं सैं क्रोल् त्हुम्! क्हेमैं च्हों धिंजगोर ह्यामा मान योंल् त्हुबै क्ल्ह्योर क्हुँल् म्हैमुँ! धै बजारजरे ह्यामै या म्हिमैंइ मान लसि म्हाँदिरिगे ङ्हाँम्।
44 “धिक्कार मुँ क्हेमैं सैं क्रोल् त्हुम्! क्हेमैं छ्यों म्ह्यों आयोंबै छगों धों तब् ग, ‘न्होंर सिनु मुँ’ बिब आसेसि म्हिमैं चए फिफि प्रम्।”
45 शास्त्रिमैंए न्होंर्बै घ्रिइ येशूने बिइ, “ओ गुरु, क्हिइमि छाबै ताँमैं बिसि ङिए आब्रु वाइ।”
46 येशूजी बिइ, “क्हेमैं शास्त्रिमैंलाज्यै या धिक्कार मुँ! सैं क्रोल् त्हुम्! म्हिमैं नोल् आखाँबै ति क्हेमैंइ नोद् बिमुँ, दिलेया क्हेमैं बिस्याँ यो च्याफै टिरिम्।
47 “धिक्कार मुँ, क्हेमैं क्रोल् त्हुम्! तलेबिस्याँ क्हेमैंए खेमैंइ सैवाबै स्योंम्बै अगमबक्तामैंए मान लब् प्हैंसि क्हेमैंइ छ्याँबै देवलमैं बनेमुँ। 48 क्हेमैंइ छलमा ‘ङिए खेमैंए केमैं ठिकन् मुँल,’ बिमुँ। तलेबिस्याँ चमैंइ स्योंम्बै अगमबक्तामैं सैवाइ, दिलेया क्हेमैंइ चमैंए ल्हागिर देवल बनेइ। 49 छतसि ‘ङइ चमैं ङाँर अगमबक्तामैं नेरो स्यार्बो कुलम्,’ बिसि तोन्दोंन् ताँ सेबै परमेश्वरजी बिल। ‘दिलेया च कुलब्मैं न्होंरि को-कोइलाइ चमैंइ सैवाब्मुँ, कोइलाइ ह्रुगुदिब्मुँ।’ 50 छतसि ह्युल केब् ओंनोंबै तिंयाँ समा अगमबक्तामैं सैवाबै पापए सजैं तिंजोरोबै म्हिमैंइ बेहोर्दिल् त्हुम्। 51 ओं, ङ क्हेमैंने बिमुँ, हाबिल सैवाबै त्हे ओंनोंबै पबित्र मन्दिर नेरो ख्रो पिंबै क्ल्ह्योए म्हाँजोर जखरिया सैवाबै त्हे समार्बै ताँन् सजैं तिंजोरोबै म्हिमैंइ बेहोर्दिल् त्हुम्।✡11:51 उत ४:८; २ इति २४:२०-२१
52 “क्हेमैं शास्त्रिमैं धिक्कार क्हेमैं क्रोल् त्हुम्! क्हेमैंइ क्ह्रोसेंन्बै ज्ञान बुद्धि योंबै म्राए साँजु किंबम् किंइ, दिलेया क्हेमैं ह्रोंसै या न्होंर आहों, होंल् म्हैब्मैंलाज्यै या क्हेमैंइ होंल् आपिं।”
53 येशू च धिंउँइँले त्होंबै लिउँइ शास्त्रिमैं नेरो फरिसीमैंइ खीए बिरोध लदै खीने ल्हें ताँमैं ङ्योएबर होंइ। 54 “येशूजी ताँ पोंमा खनिज्यै गल्ति स्यासि ताँ क्हाल् योंम् उ?” बिसि चमैंइ दाउ ङ्ह्योएबर होंइ।
*11:8 11:8 चैदिबै तोन्दोंरि सै पिंब्मुँ छले ह्रिबै ह्रिबन् लमा ह्युलर मुँबै थुइमि क्हेमैंलाइ पिंम् बिस्याँ झन् क्हेमैंलाइ म्हाँया लबै परमेश्वर आबाजी कति ल्हें पिंलै।
†11:15 ११:१५ बालजिबुल दुष्ट बिबै स्योर तेबै थेबै मोंए अर्को मिं ग।
✡11:15 11:15 मत्ती ९:३४; १०:२५
✡11:16 11:16 मत्ती १२:३८; १६:१; मर्क ८:११
‡11:21 11:21 भोंबै म्हि घ्रिइ मतलब दुष्टइ।
§11:22 11:22 च भन्दा भोंबै म्हि मतलब परमेश्वरए च्ह।
✡11:23 11:23 मर्क ९:४०
*11:25 ११:२५ सजेथेंब् चइ स्याम् च धिं, मतलब म्हि, क्होते मुँ, तलेबिस्याँ च म्हिइ परमेश्वरए प्ल्ह सैंर आथेंइमुँ।
✡11:29 11:29 मत्ती १६:४; मर्क ८:१२
†11:30 ११:३० योना योना थेबै ताँग न्होंरि सोंरों टिसि सोइ। च धोंले येशू सियासि पाबै सोंरोंर धबै सोइ।
✡11:30 11:30 योना ३:४
‡11:31 11:31 शेबा ग्रिक क्युइरि, दक्षण
✡11:31 11:31 १ म्रुँ १०:१-१०; २ इति ९:१-१२
✡11:32 11:32 योना ३:५
✡11:33 11:33 मत्ती ५:१५; मर्क ४:२१; लूक ८:१६
§11:35 ११:३५ मतलब, लोमिंबै तो-तो ताँ म्हिमैंइ छ्याँब् ङ्हाँमुँ, च ताँ लिउँइ आछ्याँब् आतरिगे बिसि सैं चिद्।
*11:36 ११:३६ मतलब, छ्याँबै मिइ परमेश्वरउँइ ङ्ह्योसि सैंर छ्याँब् छ्याँबै ताँमैं मत्त्रे तम्, दिलेया दुष्ट मिइ आछ्याँबै घ्याँउँइ ङ्ह्योसि दुष्ट ताँमैं सैंर तम्।
†11:39 11:39 थलि प्हेलाए फि-फि छेन्ले म्याम् भाँडोए फि-फि म्याब् धोंले चमैंइ ह्रोंसए ज्यु या फि-फि ख्रुम्।
✡11:42 11:42 लेबी २७:३०
✡11:51 11:51 उत ४:८; २ इति २४:२०-२१