1 खीजी ङ्ह्‍योरिमा प्ल्हो-प्ल्होबै म्हिमैंइ मन्दिरर्बै भेटि बकसर भेटि झोंरिब् म्रोंइ। 2 झाइले ङ्हाँदु म्हरेस्‍यो घ्रिइ मुइ ङ्हिफुँ झोंबै या खीजी म्रोंइ। 3 छतमा खीजी बिइ, “क्‍ह्रोंसेन ङ क्‍हेमैंने बिमुँ, च तोइ आरेबै म्हरेस्‍योइ अरूमैंइ भन्दा ल्‍हें भेटि झोंइमुँ। 4 तलेबिस्याँ अरूमैंइ ह्रोंसने मुँबै ल्हें मुइमैंउँइँले ल्हेंन् झोंइ, दिलेया चु म्हरेस्‍यो ङ्हाँदु तनाबिलेया खीने तिफुँइ आचैल्‍ले ह्रोंसने मुँबै मुइ ताँन् झोंइ।”

5 “छ्याँ-छ्याँबै युँमाजगो नेरो परमेश्‍वरए मिंर पिंबै छ्याँ-छ्याँबै सैमैंइ सिङाँर्दिसि चु मन्दिर बेल्‍ले छ्याँब् तइमुँ,” बिसि येशूए को-कोइ चेलामैंइ ताँ लरिमा येशूजी बिइ, 6 “क्‍हेमैंइ चु ताँन् सैमैं तोगो म्रोंइमुँ, दिलेया तिगें चु ताँन् फुयाब्‍मुँ। युँमा घ्रिए फिर अर्को युँमा आचैल्‍ले नास तयाब्‍मुँ।”*२१:६ चु भबिष्या बाणि प्‍लिच्यु बर्ष लिउँइ क्ह्रोंसेंन तल, मतलब बि. सं. १२७ सालर (ई. सं. ७० सालर) रोमी फौजइ मन्दिर नास लवाइ।

7 “ओ गुरु, चु ताँन् चिनुमैं खोंयों तम्? चु तबि छेइ बिसि म्हिमैंइ खैले सेल् खाँम्?” बिसि चमैंइ येशूने ङ्योएइ।

8 येशूजी बिइ, “न्ह क्रों मि क्रोंले टिद्, क्हेमैंलाइ खाबज्यै लुल् आखाँरिगे। ल्‍हें म्हिमैं ङए मिं किंसि खब्मुँ, ‘ङ परमेश्वरजी कुलबै म्रुँ ख्रीष्‍ट ग’ बिब्‍मुँ, झाइले अरू म्हिमैंइ ‘ख्रीष्‍ट युबै त्‍हे चेंदो तखइमुँ’ बिब्‍मुँ, दिलेया चमैंए लिलि आल्‍हैदिद्, चमैंइ बिब आङिंन्। 9 ल्हडें नेरो प्‍होंब् नेब तइमुँ रो बिब क्हेमैंइ थेब्मुँ। च त्हेर आङ्हिंन्। तलेबिस्याँ म्हिए च्ह युब् भन्दा ओंसों चु ताँन् ताँमैं तलन् त्‍हुम्। छ तनाबिलेया ह्‍युलए नास अझै तरिब आरे।”

10 येशूजी धबै बिइ, “ह्‍युलए बिरोधर ह्‍युल, ग्याल्सए बिरोधर ग्याल्स रेसि ल्हडें तब्‍मुँ। 11 क्‍ल्‍ह्‍यो क्‍ल्‍ह्‍योरि थेब् थेबै सयो खब्मुँ, अङ्गल तब्‍मुँ, झाइले ङ्हिंन् तबै रोगमैं खब्मुँ। मुर थेब् थेबै ङ्हिंन् ङ्हाँबै चिनुमैं म्रोंब्‍मुँ। 12 चु ताँन् सैमैं तब् भन्दा ओंसों म्हिमैंइ क्हेमैंलाइ ह्रुगुदिब्‍मुँ। चमैंइ क्‍हेमैं क्हासि च्हों धिंजरे बोसि क्हेमैंए मिंर मुद्दा झोंसि झेलर च्युवाब्‍मुँ। क्हेमैंइ ङए मिं किंबइले म्रुँमैं नेरो क्रथेमैंए उँइँर बोब्‍मुँ। 13 दिलेया चमैंने सैं तोंबै ताँ बिबै मौका च त्हेर क्हेमैंइ योंब्‍मुँ। 14 छतसि ह्रोंस जोगेबै ल्हागिर खै बिब् ङ्‍हे बिसि क्हेमैंइ न्हुँ लल् आत्हु। 15 तलेबिस्याँ ङइ क्‍हेमैंलाइ छाबै ज्ञान बुद्धिए ताँ पोंल् पिंब्मुँ, च ताँ पोंमा चमैंइ क्‍हेमैंए ताँए ज्वाफ पिंल् खाँरिब् आरे, क्हेमैंए ताँ थोल् खाँरिब् आरे।✡21:14-15 लूक १२:११-१२ 16 ह्रोंसए आबा-आमा, आघें-अलिमैं, ह्रोंसए थुमैं नेरो ह्रजे-म्हजेमैंज्यै क्‍हेमैं शत्तुरमैंए योर पिंवाब्‍मुँ। झाइले क्हेमैंए न्होंरि को-कोइ चमैंइ सैवाब्‍मुँ। 17 क्‍हेमैंइ ङए मिं किंबइले ताँन् म्हिमैंइ क्हेमैं हेल लब्‍मुँ। 18 दिलेया क्‍हेमैंए क्र प्हो घ्रि या नास तरिब् आरे। 19 छतसि आनारद्, आसिन् समा सैदिद्, छलस्याँ क्‍हेमैं खोंयोंइ बिलै सोसि परमेश्‍वरने टिल् योंब्मुँ।”

20 येशूजी धबै बिइ, “यरूशलेमलाइ सेनामैंइ घेर्दिरिब् म्रोंमा तारे यरूशलेम नास तबै त्हे तबि छेना बिब क्हेमैंइ सेद्। 21 च त्‍हेर यहूदीया ह्‍युलर मुँब्‍मैं कोंउँइ भौदिरिगे। यरूशलेम सहर न्‍होंर मुँब्‍मैं सहर बैरु भौदिह्‍यारिगे, छलेन नाँसर मुँब्‍मैं यरूशलेम सहर न्‍होंर आहोंरिगे। 22 तलेबिस्याँ परमेश्‍वरए छ्वेर प्ह्रिबै ताँमैं ताँन् पूरा तबै ल्हागिरि परमेश्‍वरजी बदला किंबै त्‍हिंइ च तब्‍मुँ।✡21:22 होशे ९:७ 23 च त्‍हेर प्‍हसे नोब्‍मैं नेरो क्‍वेंदर कोलो मुँबै आमामैं खै लब ओंछेंमैं! तलेबिस्याँ ह्‍युल तिगोंन् बेल्‍ले ङ्हिंन् तबै दुःख खब्मुँ, झाइले परमेश्‍वरए ह्रिस चु ह्रेंए फिर तब्मुँ। 24 शत्तुरमैंइ चमैं को-कोइ सेलाँइ (तरवारइ) सैवाब्‍मुँ, कोइ फैसि ह्‍युल ह्‍युलर बोब्‍मुँ। परमेश्‍वरजी चमैंने तोक्‍दिबै त्‍हे आतन् समा अरू ह्रेंर्बै म्हिमैंइ यरूशलेम खेंमैंए अधीनर थेंब्मुँ।”

25 येशूजी धबै बिइ, “लयाँ, त्‍हिंयाँ नेरो मुर्बै सारामैंर औदिबै चिनुमैं म्रोंब्‍मुँ। थेबै कैले खबै मा ङ्युँइए भेल्‍गइ लमा ताँन् ह्‍युलर्बै म्‍हिमैं ङ्हिंसि बेल्‍ले आतिदिब्‍मुँ।✡21:25 यशै १३:१०; इज ३२:७; योए २:३१; दर्शन ६:१२-१३ 26 ह्‍युलर ङ्हिंन् ङ्हाँन् तब्‍मुँ बिसि म्‍हिमैं मुर्छा तयाब्मुँ। तलेबिस्याँ च त्हेर मुर्बै सैमैं या लायाब्मुँ‌। 27 च लिउँइ म्हिए च्ह थेबै शक्‍ति नेरो म्हारल्‍ले न्‍हाँम्‍स्योर युरिब म्हिमैंइ म्रोंब्‍मुँ।✡21:27 दान ७:१३; दर्शन १:७ 28 छाबै ताँ तबर होंमा क्‍हेमैं रेसि क्र कैंडु लद्। तलेबिस्याँ च त्‍हेर्न क्‍हेमैं जोगेमिंबै त्‍हे चेंदो तब्‍मुँ।”

29 खीजी चमैंने चु अहानै बिइ, “तुँबु धुँ नेरो अरू सिं धुँमैं ङ्‍ह्‍योद्। 30 च सिं धुँमैं छारा प्‍हो पलेब् म्रोंसि क्हेमैंइ बर्ख ल्‍हौदिना बिसि सेम्। 31 छलेन ङइ बिबै चु ताँन् ताँमैं तखब् म्रोंसि परमेश्‍वरए ग्याल्स चेंदोन् मुँना बिब क्‍हेमैंइ सेद्। 32 क्ह्रोंसेंन ङ क्हेमैंने बिमुँ, ङइ बिबै चु ताँन् ताँमैं पूरा आतन् समा चु पुस्ता म्हरिब् आरे। 33 मु नेरो पृथ्‍बी नास तयाब्‍मुँ, दिलेया ङइ बिबै ताँ म्‍हरिब आरे।

34 “छतसि क्हेमैं खैले टिल् त्‍हुम् बिसि सैंर मैंसि टिद्! ल्हें चब-थुँबाए लिलि आप्रद्, प्हा ल्‍हें थुँसि आम्हेरद् धै छ्ह खैले थोब् ङ्‍हे बिसि न्हुँ आलद्। छले ह्‍युलर्बै सैमैंर सैं ह्‍यारिमा थाइ आसेन्‍ले तिखेर्न च त्हिंइर क्हेमैं ङोर स्‍याब् धोंले स्याब्मुँ। 35 तलेबिस्याँ छलेन थाइ आसेल्‍ले पृथ्‍बीर्बै ताँन् म्हिमैंए फिर च त्हिंइ खब्मुँ। 36 छतसि च ङ्हिंन् तबै ताँमैंउँइँले जोगेसि म्हिए च्हए उँइँर राल् योंबै ल्हागिर परमेश्‍वरने प्राथना लब्रें लसि न्ह क्रोंले टिद्।”

37 येशूजी त्हिंइ ह्रोंसे मन्दिरर परमेश्‍वरए ताँमैं लोमिंमल। धै म्‍हुँइँसर जैतून बिबै कोंर ह्‍यासि बास टिब्रें लमल।✡21:37 लूक १९:४७ 38 झाइले खीजी लोमिंबै ताँ थेबर म्हिमैं न्‍हाँकर्न मन्दिरर खमल।