3
बप्तिस्मा पिंबै यूहन्नाइ सैं तोंबै ताँ बिमिंब
(मर्कूस १:१-८; लूका ३:१-१८; यूहन्ना १:१९-२८)
1 च त्हेर बप्तिस्मा पिंबै*3:1 बप्तिस्मा पिंबै बप्तिस्माए अर्थ “क्युर प्लुँसि चोखो लमिंब” यूहन्ना यहूदीया ह्युलर्बै क्यु आयोंबै क्ल्ह्योजरे खसि परमेश्वरए ताँ छले बिमिंबर होंइ। 2 “पाप लब् पिसि परमेश्वरउँइ सैं एद्, तलेबिस्याँ स्वर्गर्बै ग्याल्स चेंदोन् खइमुँ।”✡3:2 मत्ती ४:१७; मर्क १:१५ 3 स्योंम्बै यशैया बिबै अगमबक्ताइ छ बिसि यूहन्नाए बारेर प्ह्रिल:✡3:3 यशै ४०:३
“क्यु आयोंबै क्ल्ह्योर म्हि घ्रिइ कै तेसि छ बिसिन् मुँ,
‘याहवेहए ल्हागिर घ्याँ छ्याद्!
खी प्रबै ल्हागिर आछ्याँबै घ्याँमैं क्योंएँन्!’ ”
4 यूहन्नाइ सलुए मुइए क्वें खिमल, ट्हुबिए पेटि खिमल, तिरि नेरो क्वे खुदु चमल।✡3:4 २ म्रुँ १:८ 5 यरूशलेम सहरउँइँले, यहूदीया ह्युलर्बै ताँन् क्ल्ह्यो-क्ल्ह्योउँइँले नेरो यर्दन स्यों खागुबै नाँसजरेउँइँले ल्हें म्हिमैं च ङाँर ह्यारिल। 6 झाइले चमैं ताँनइ “ङिइ पाप लइमुँ,” बिसि यूहन्नाउँइँले यर्दन स्योंर प्ल्हुँसि बप्तिस्मा किंइ।
7 दिलेया फरिसीमैं नेरो सदुकीमैं न्होंर्बै ल्हें म्हि या खीने बप्तिस्मा किंबर खब् म्रोंसि यूहन्नइ चमैंने बिइ, “ओ प्हुरि धों तबै म्हिमैं, परमेश्वरए ह्रिसउँइँले स्योल् खाँम् बिसि खाबइ क्हेमैंने बिइ?✡3:7 मत्ती १२:३४; २३:३३ 8 बरु परमेश्वरउँइ सैं एसि छ्याँबै केमैं लसि उँइँन्। 9 ‘ङि यहूदीमैं परमेश्वरजी त्हाँबै म्हि अब्राहमए खलकर्बै तसेरो ङि परमेश्वरए सजैंउँइँले स्योल् योंब्मुँ,’ बिसि ह्रों-ह्रोंसन् बिआप्रद्। तलेबिस्याँ ङ क्हेमैंने बिमुँ, परमेश्वरजी अब्राहमए ल्हागिर चु युँमाउँइँले या सन्तान् लमिंल् खाँम्।✡3:9 यूह ८:३३ 10 तोगोंन् सिं धुँर त फेल् खाँइँमुँ। छतसि छ्याँबै रो आरोबै ताँन् सिंधुँ परमेश्वरजी थोवाब्मुँ, धै मिर ख्रोंवाब्मुँ।✡3:10 मत्ती ७:१९
11 “क्हेमैंए सैं परमेश्वरउँइँ एइ बिब् उँइँबर ङइ क्युर प्ल्हुँमिंसि बप्तिस्मा पिंम्। दिलेया ङए लिलि युबै म्हि ङ भन्दा बेल्ले शक्ति मुँब मुँ। खीजी क्हेमैं परमेश्वरए पबित्र प्ल्ह नेरो मिइ बप्तिस्मा पिंब्मुँ। ङम् खीए जुत्ता नोबै लायगर्बै आरे। 12 सोंग्या टाबै नउलि खीए योर्न मुँ।†3:12 नउलि खीए योर्न मुँ सोंग्या टाब् धोंले खीजी छ्याँब नेरो आछ्याँबै म्हि स्यो-स्यो लब्मुँ। खीजी ताँन् खालर्बै सोंग्या छेन्ले टाब्मुँ, धै खीए गहुँ धन्सारर खागु लब्मुँ, धै ताँन् पुइ खागु लसि खोंयोंइ आसिबै मिर ख्रोंवाब्मुँ।”
येशूजी यूहन्नाउँइँले बप्तिस्मा किंब
(मर्कूस १:९-११; लूका ३:२१-२२)
13 झाइले येशू यूहन्नाने बप्तिस्मा किंबर गालील ह्युलउँइँले यर्दन स्योंर युइ। 14 दिलेया यूहन्नाइ येशूने “क्हिजी ङलाइ बप्तिस्मा पिंल् त्हुब् ग। क्हिजी ङने बप्तिस्मा किंब् आ?” बिसि बप्तिस्मा किंबर क्वेबर होंइ।
15 दिलेया येशूजी यूहन्नाने बिइ, “तोगो छान् तरिगे। छले ङ्योइ परमेश्वरजी बिब् धोंले लब् छ्याँब मुँ।” छबिमा यूहन्नाइ येशूलाइ बप्तिस्मा पिंइ।
16 बप्तिस्मा किंल् खाँबै तोदोंन् येशू क्युउँइँले बैरु त्होंखमा स्वर्ग थोंसि परमेश्वरए प्ल्ह तोंगु धोंले ह्रोंसए फिर युरिब खीजी म्रोंइ। 17 झाइले “चु ङइ खोबै च्ह ग, चु म्रोंसि ङ बेल्ले सैं तोंइमुँ बिबै कै घ्रि स्वर्गउँइँले युइ।”✡3:17 उत २२:२; भज २:७; यशै ४२:१; मत्ती १२:१८; १७:५; मर्क १:११; लूक ९:३५
*3:1 3:1 बप्तिस्मा पिंबै बप्तिस्माए अर्थ “क्युर प्लुँसि चोखो लमिंब”
✡3:2 3:2 मत्ती ४:१७; मर्क १:१५
✡3:3 3:3 यशै ४०:३
✡3:4 3:4 २ म्रुँ १:८
✡3:7 3:7 मत्ती १२:३४; २३:३३
✡3:9 3:9 यूह ८:३३
✡3:10 3:10 मत्ती ७:१९
†3:12 3:12 नउलि खीए योर्न मुँ सोंग्या टाब् धोंले खीजी छ्याँब नेरो आछ्याँबै म्हि स्यो-स्यो लब्मुँ।
✡3:17 3:17 उत २२:२; भज २:७; यशै ४२:१; मत्ती १२:१८; १७:५; मर्क १:११; लूक ९:३५