1 “स्‍वर्गर्बै ग्याल्स म्रोंए क्‍ल्‍हे घ्रि धोंन् तब् ग। च क्ल्हे न्‍हाँक्‍कर्न ह्रोंसए म्रोंर के लबै म्रोंमैं म्हैबर बैरु ह्‍याइ। 2 चइ म्रोंमैंने तिगेंर योंबै नों सै तोक्दिसि चमैं के लबर म्रोंर कुल्‍मिंइ।

3 “झाइले कु ह्राबै त्हेजरे धबै बैरु ह्‍यामा चइ अरू म्‍हिमैं के आरेसि छलेन् रारिब् म्रोंइ। 4 छतसि चइ चमैंने बिइ, ‘क्‍हेमैं या ङए म्रोंर के लबर ह्‍याद्। क्‍हेमैंइ योंल् त्हुबै नों सै ङइ पिंस्‍यो।’ 5 छबिमा चमैं के लबर म्रोंर ह्‍याइ।

“धबै च क्‍ल्‍हे च्युसे ङ्हिं ह्राबै त्हेजरे धै सों ह्राबै त्हेजरे या बैरु ह्‍यासि म्‍हिमैंने छान् बिइ। 6 छलेन ङेसर्बै ङ्‍ह ह्राबै त्हेजरे च धबै बैरु ह्‍यामा अरू म्‍हिमैं छलेन् रारिब् म्रोंइ। धै चमैंने, ‘क्हेमैं त्हिंइतिमि छलेन् चुर तले रारिल?’ बिसि ङ्योएइ।

7 “चमैंइ बिइ, ‘खोइ, खाबज्यै या केर आल्‍हैदि। तो लब?’

“चइ चमैंने बिइ, ‘छ बिस्‍याँ क्‍हेमैं या ङए म्रोंर के लबर ह्‍याद्।’

8 “झाइले ङेसा तमा क्‍ल्‍हेइ के लब्मैंए चिबने बिइ, ‘म्रोंमैं हुइसि नों सै पिंन् धाँसे लिलि खब्‍मैंलाइ ताँन् भन्दा ओंसों पिंनु, धाँसे ओंसों खब्‍मैंलाइ ताँन् भन्दा लिलि पिंन्।’✡20:8 लेबी १९:१३; व्य २४:१५ 9 छबिमा ङेसर्बै ङ्‍ह ह्राबै त्हेर खसि के लब्मैं खइ। चमैं ताँनइ तिंगेंर्बै नों सै योंइ। 10 झाइले धाँसे ओंसों के लब्मैं खइ, चमैंइ अरूइ भन्दा खेंमैंइ नों सै ल्हें योंलै ङ्हाँइ। दिलेया चमैं ताँनइ तिंगेंर्बै नों सै योंइ। 11 चमैंइ ह्रोंसए नों सै योंबै लिउँइ क्‍ल्‍हेए बिरोधर पोंबर होंइ। 12 ‘चु लिउँइ खबै म्‍हिमैंइ घण्‍टा घ्रि मत्‍त्रे के लइ, ङिइमि त्‍हिंइतिमि त्‍हिंयाँर सिया सियाले के लइ। दिलेया क्‍हिइ चमैंलाज्यै या ङिलाइ पिंब् धों प्रेन् नों सै पिंइ,’ बिसि चमैंइ बिबर होंइ।

13 “दिलेया च क्‍ल्‍हेइ चमैं न्‍होंर्बै म्‍हि घ्रिने बिइ, ‘ओ थु, ङइ क्‍हिए फिर तोइ अनिया आलइमुँ। क्‍हिइ ङने तिंगेंर्बै नों सैर के लम् बिसि बिब् आङिं वा? 14 क्‍हिए नों सै किंसि ह्‍याद्। चु क्‍हैल्‍ले खब्‍मैंलाज्यै या क्‍हिलाइ पिंब् धों प्रेन् नों सै ङइ पिंम्। 15 ङए मुइ ङइ तो लदा ङ्हाँमुँ च लल् आयों रो वा? ङइ ल्हयो खब् म्रोंसि क्‍हिए मि तले छब?’

16 “छलेन लिलिबै ओंसों तब्मुँ धै ओंसोंबै लिलि तब्‍मुँ।”✡20:16 मत्ती १९:३०; मर्क १०:३१; लूक १३:३०

17 येशू यरूशलेमउँइ ह्‍यारिमा च्युसे ङ्हिं चेलामैंलाइ स्योले बोसि बिइ, 18 “ङ्यो यरूशलेमउँइ ह्‍यासिन् मुँ। तारे म्हिए च्ह म्‍हिमैंइ ख्रो पिंबै खेगि चिब्मैं नेरो शास्‍त्रिमैंए योर पिंवाब्‍मुँ, धै चमैंइ खीलाइ सैलन् त्हुबै छ्याब् ल्हैदिब्मुँ। 19 झाइले खीलाइ बिल्‍लि लसि कोर्राइ प्रुसि क्रूसर च्योवाद् बिसि चमैंइ अरू ह्रेंमैंए योर पिंवाब्‍मुँ, दिलेया सोंरोंर खी धबै सोगों तसि खब्‍मुँ।”

20 च लिउँइ जब्‍दियाए प्ह्रेंस्योइ ह्रोंसए च्‍ह ङ्हिं*20:20 ह्रोंसए च्‍ह ङ्हिं याकूब नेरो यूहन्‍ना येशू ङाँर बोसि खीए उँइँर च्हि तुँसि यो छ्युँ लइ।

21 छलमा येशूजी “क्‍हिलाइ तो चैदिइ?” बिसि चने ङ्योएइ।

चइ बिइ, “क्‍हिए ग्याल्सर, ङए च्हमैं ङ्हिंर घ्रि क्हिए क्योलोउँइ अर्को त्हेब्रेउँइ टिल् योंरिगे।”

22 दिलेया येशूजी चमैंने बिइ, “क्‍हेमैंइ तो ह्रिरिइमुँ च सै क्‍हेमैंइ था आसे। तारे ङइ नोबि छेबै दुःख क्‍हेमैंइ नोल् खाँम्‍मा?” बिमा

चमैंइ “खाँम्,” बिइ।

23 छबिमा येशूजी चमैंने बिइ, “ङइ नोब् धों तबै दुःख क्‍हेमैंज्यै या नोब्मुँ। दिलेया ङए क्‍योलो नेरो त्हेब्रेउँइ टिल् पिंबै ताँ ङए योर आरे। च क्ल्ह्‍योमैं ङए आबाजी ओंसोंन् खाब्मैंए ल्हागिर तयार लथेंइमुँ चमैंए ल्हागिर्न ग।”

24 चु ताँ थेसि चेलामैं च्‍यु च त्ये ङ्हिंने ह्रिस खइ। 25 छतसि येशूजी चमैं ताँन् खी ङाँर हुइसि बिइ, “चु ह्‍युलर्बै म्रुँमैंइ म्हिमैंए फिर क्ल्हे लम्, धै चिबनाँब्मैंइ म्‍हिमैंए फिर अधिकार लम् बिब क्‍हेमैंइ सेइमुँ। 26 दिलेया क्‍हेमैं न्‍होंर बिस्‍याँ छ तरिब् आरे। क्‍हेमैंए न्होंरि खाब् थेब तदा ङ्हाँमुँ, चइ च्योंब् तसि क्हेमैंए सेवा लल् त्‍हुम्।✡20:25-26 लूक २२:२५-२६ 27 क्हेमैंए न्होंरि खाब् थेब तदा ङ्हाँमुँ च क्‍हेमैंए केब्छैं तल् त्‍हुम्।✡20:27 मत्ती २३:११; मर्क ९:३५; लूक २२:२६ 28 छलेन म्हिए च्ह या अरूमैंउँइँले सेवा योंबर युब आङिं, दिलेया सेवा लबर नेरो ल्‍हें म्‍हिमैंए पापउँइँले फ्रेमिंबर ह्रोंसए ज्यु पिंबर युब् ग।”

29 च लिउँइ खेंमैं यरिहो बिबै सहरउँइँले ह्‍यारिमा म्हिए हुल येशूए लिलि ल्हैदिइ। 30 घ्याँए रेर टिरिबै कनमैं ङ्हिंइ येशू च घ्‍याँउँइँले ह्‍याइनमुँ बिब् थेसि “ओ प्रभु, दाऊदए च्ह, ङिए फिर ल्हयो लमिंन् बिदै ओरइ।”

31 छबिमा म्‍हि हुलइ “आओरद्!” बिसि चमैं हौदिइ, दिलेया चमैं झन् सार्ले “ओ प्रभु, दाऊदए च्ह, ङिए फिर ल्हयो लमिंन्,” बिसि ओरइ।

32 छ बिब् थेमा येशू प्ररिबै तोर्न रायाइ धै चमैं हुइसि बिइ, “क्‍हेमैं तो चैदिइ? ङइ क्हेमैंए ल्हागिरि तो लमिंले?”

33 चमैंइ खीने “प्रभु, ङिए मि म्रोंन् लमिंन्,” बिइ।

34 येशूजी ल्‍हयो खसि चमैंए मिर छुइमिंइ धै छुइबै तोदोंन् चमैंए मि म्रोंल् खाँब् तयाइ धै चमैं येशूए लिलि ल्‍हैदिइ।