28
येशू सिबउँइँले धबै सोगों तब
(मर्कूस १६:१-१०; लूका २४:१-१२; यूहन्ना २०:१-१०)
1 प्रिबै त्हिंइए प्हँन्हाँग्धों आइतबार न्हाँक्कर्न मि म्रोंबै छझँ मग्दालाथेंस्यो मरियम नेरो अर्को मरियम छगों ङ्ह्योबर ह्याइ। 2 च त्हेर थेबै सयो खइ, तलेबिस्याँ स्वर्गउँइँले प्रभुए दूत घ्रि युसि छगों हुथेंबै युँमा प्लिंवासि युँमाए फिर टिइ। 3 चए लि बिजुलि धोंले चारब मुँल, धै चए क्वें क्लिं धोंब तार्ग्या मुँल। 4 छाब् म्रोंसि रुँबै म्हिमैं ङ्हिंसि त्हारइ, धै सिब् धोंन् तयाइ।
5 दिलेया स्वर्गदूतइ च च्हमिरिमैंने बिइ, “क्हेमैं आङ्हिंन्! क्हेमैं क्रूसर च्योवाबै येशू म्हैबर खब् ग बिसि ङइ सेइमुँ। 6 येशू चुर आरे। खीजी ओंसोंन् बिब् धोंले खी सोगों तसि रेल् खाँइमुँ। खो, खी पाबै क्ल्ह्यो ङ्ह्योद्। 7 क्हेमैं युनन् ह्यासि खीए चेलामैंने ‘खी सिबउँइँले धेबै सोगों तसि रेल् खाँइमुँ। धै क्हेमैं भन्दा ओंसों खी गालील ह्युलर ह्यारिइमुँ। चर्न क्हेमैंइ खीलाइ म्रोंब्मुँ,’ बिद्, लु, ङइ बिल् त्हुबै ताँ क्हेमैने बिमिंइमुँ।”
8 छबिमा चमैं ङ्हिंब् धों ङ्हाँदै सैं तोंदै आतुरले छगोंउँइँले त्होंसि खीए चेलामैंने सँउँसर बिबर न्हेह्याइ।
9 छले ह्यारिमा तिखेर्न येशू चमैंने त्होसि “क्हेमैंने शान्ति तरिगे,” बिइ। धै चमैं चेंदो खसि येशूए प्हले क्हासि फ्योइ। 10 झाइले येशूजी चमैंने बिइ, “आङ्हिंन्! क्हेमैं ङए अलिमैं ङाँर ह्यासि चमैंने ‘गालील ह्युलर ह्याद्।’ चर्न चमैंइ ङलाइ म्रोंब्मुँ,” बिद्।
ख्रो पिंबै खेगि चिब्मैंइ सिपाइमैंने बिबै ताँ
11 च च्हमिरिमैं घ्याँर ह्यारिमा येशूए छगों रुँबै को-कोइ सिपाइमैं सहरर ह्यासि ख्रो पिंबै खेगि चिब्मैंने चर तबै ताँमैं बिइ। 12 च ताँ थेसि ख्रो पिंबै खेगि चिब्मैं शास्त्रिमैंने त्होसि सल्ला लइ, धै चमैंइ सिपाइमैंने मुइ ल्हें पिंसि 13 बिइ, “ ‘ङि रोरिबै त्हेर येशूए चेलामैं खसि सिनु ह्योइ बोयाना,’ बिसि क्हेमैंइ बिद्। 14 चु ताँ रोमी क्रथेइ थेस्याँ ङिइ चलाइ क्ह्रिल् लमिंसि क्हेमैंलाइ जोगेमिंस्यो।”
15 छबिमा सिपाइमैंइ मुइ किंसि चमैंइ बिब् धोंले लइ। छतसि तिंयाँ समा या यहूदीमैंइ चु ताँन् बिप्ररिइमुँ।
येशूजी बिबै लिउँइँबै ताँमैं
(मर्कूस १६:१४-१८; लूका २४:३६-४९; यूहन्ना २०:१९-२३; चेला चिब्मैंए केमैं १:६-८)
16 च च्युसे घ्रि चेलामैं येशूजी ह्याद् बिबै गालीलर्बै कोंर ह्याइ।✡28:16 मत्ती २६:३२; मर्क १४:२८ 17 चमैंइ चर खीलाइ म्रोंसि सैं तोंसि फ्योइ, दिलेया कोइ चेलामैंइ बिस्याँ संका लइ। 18 छतमा येशू चमैं ङाँर खसि बिइ, “स्वर्ग नेरो पृथ्बीर्बै तोन्दोंरि हग परमेश्वरजी ङने पिंइमुँ। 19 छतसि क्हेमैं ह्युलर्बै ताँन् ह्रेंमैं ङाँर ह्यासि चेलामैं लदु, धै परमेश्वर आबा, परमेश्वर च्ह नेरो पबित्र प्ल्हए मिंर क्युर प्ल्हुँमिंसि बप्तिस्मा पिंन्।✡28:19 चिब्मैं १:८ 20 झाइले ङइ क्हेमैंने ल्हैदिबै आलसि आतबै ताँन् केमैं लद् बिसि चमैंलाइ लोमिंन्। थेद्! ह्युल नुयाबै त्हिंइ समा ङ खोंयोंन् बिलै क्हेमैंने बालुन् तब्मुँ।”