1 ओ अलि-अङाँमैं, आखिरि बिलन् त्हुबै ताँ चु मुँ: प्रभुने घ्रिन् तसि खोंयोंन् बिलै सैं तोंन्। क्हेमैंने ओंसोंन् बिल् खाँबै ताँमैं धबै प्‍ह्रिबर ङ छोरों आङ्हाँ, तलेबिस्याँ चु ताँमैंइ क्‍हेमैंलाइ आछ्याँबै घ्याँर प्रबउँइँले जोगेमिंमुँ। 2 आछ्याँबै के लब्‍मैं, नगिमैं धोंले नेब्मैं, नेरो ज्युर्बै ट्हुबि क्‍याँब्मैंउँइँले न्ह क्रों मि क्रोंले टिद्। 3 ङ्योम् ज्युर चिनु लबै केर भर लब्मैं आङिं! ङ्योम् छ्याँबै सैंइ खों न्होंउँइँलेन् परमेश्‍वरलाइ म्हाँदिब्मैं ग, तलेबिस्याँ ङ्योइ परमेश्‍वरए पबित्र प्ल्हउँइँलेन् खीलाइ म्हाँदिइमुँ। धै ख्रीष्‍ट येशूजी लबै केर ङ्योइ प्हैंल् खाँम्।

4 खाबज्यै ज्युर लबै चिनुर भर थेंबै कारण मुँ बिसि मैंम् बिस्याँ, ङलम् झन् ल्हें कारण मुँ। 5 तलेबिस्याँ ङलम् फिबै प्रेरोर ज्युर चिनु लल। ङ इस्राएल ह्रेंर्बै बेन्यामीन कुलर्बै ग, हिब्रूमैंलैया हिब्रू ग, मोशाइ प्ह्रिबै ठिममैं म्हाँदिबै फरिसी घ्रि ग,*3:5 फरिसी घ्रि ग फरिसीमैंइ छ्वेर प्ह्रिबै ठिममैं ताँन् छेनाले म्हाँदिमल✡3:5 रोम ११:१; चिब्मैं २३:६; २६:५ 6 जोसए बारेर बिले बिस्याँ, ङइ येशू ख्रीष्‍टए फिर बिश्‍वास लब्मैं ह्रुगुदिइ! धै ठिक केमैंए बारेर बिले बिस्याँ मोशाइ प्ह्रिबै ठिममैंइ बिब् धोंबै केमैं लसि छ्याब् आरेबै म्हि मुँल।✡3:6 चिब्मैं ८:३; २२:४; २६:९-११ 7 दिलेया च सैंमैं ङए ल्हागिर ओंसों छ्याँब तना बिलेया ङइ ख्रीष्‍टए उँइँर च सैमैं तो धोंइ आङ्हाँइमुँ। 8 च्हौ मत्‍त्रे आङिं, क्ह्रोंसेंन बिब् गो बिस्याँ येशू ख्रीष्‍ट ङए प्रभु ङो सेल् योंबै थेबै ताँ, अरू सैमैंने च्हैंमा ताँन् सैमैं तोगो ङइ फाकर्बै सैमैं धों ङ्हाँम्। तोगो ङइ ख्रीष्‍ट येशूजी पिंबै ताँन् सैमैं योंल् खाँरिगे बिसि खीए ल्हागिर ताँन् सै पिवाइमुँ, च ताँन् सैमैं स त्हुल धोंन् ङ्हाँइमुँ। 9 छतसि तारे ङ खीने बालुन् तदा ङ्हाँइमुँ। ह्रोंसइ लबै धर्मउँइँले, नेरो मोशाइ प्ह्रिबै ठिममैं म्हाँदिबइले ङ धर्मि तब आङि, बरु येशू ख्रीष्‍टए फिर बिश्‍वास लबइले ङ परमेश्‍वरए उँइँर ठिक ठर्दिइमुँ। छले ङ परमेश्‍वरउँइँले ठिक ठर्दिब् ग। 10 खी सिसि धबै खैले सोइ खगे बिसि खीए शक्‍ति ङइ क्होल् खाँरिगे, धै खी सिब् धोंलेन् ङइ या सिलन् त्हुलै सिसि खीजी नोब् धों तबै दु:ख नोल् खाँरिगे। 11 तल् खाँम् बिस्याँ ङ सिसि धबै सोल् खाँरिगे।

12 ङइ चु ताँन् सै योंल् खाँइमुँ धै ङइ लल् त्हुबै ताँन् के लल् खाँइमुँ बिसि आङिं, दिलेया फेल् त्हुबै क्ल्ह‍योर फेबै ल्हागिर ङ अझै ओंसों बडिरिइमुँ। च फेल् त्हुबै क्ल्ह‍योर ङ फेरिगे बिसि ख्रीष्‍ट येशूजी ङलाइ ओंसोंन् त्हाँइ। 13 अलि-अङाँमैं, अझै ङ फेल् त्हुबै क्ल्ह्‍योर आफेइमुँ। छतसि ङइ ह्‍याल् खाँबै ताँमैं म्‍लेवासि तारे तखबै ताँमैंर भोंन्ले ओंसों बडिबै के लइमुँ। 14 छतसि परमेश्‍वरजी ख्रीष्‍ट येशूर थेंमिंबै स्वर्गर्बै आशिक योंबर फेल् त्हुबै क्ल्ह्‍योर फेबै ल्हागिर ङ भोंन्ले ओंसों बडिसेन्मुँ।

15 ङ्यो येशू ख्रीष्‍टए फिर बिश्‍वास लब्मैं ताँनइ छाबन् सैं मैंल् त्‍हुम्। दिलेया क्‍हेमैं न्‍होंरि को-कोइ स्योबन् सैं मैंस्‍याँ परमेश्‍वरजी च ताँ या क्‍हेमैंलाइ क्होमिंब्‍मुँ। 16 छतसि ङ्यो खैले चु समा खइ, छलेन ओंसों बडिदै ह्‍याले।

17 ओ अलि-अङाँमैं, ङइ लब् धोंले लरिद्। ङिइ लबै केमैं क्हेमैंइ म्रोंइमुँ, क्हेमैंज्यै या छान् लद्। छतसि ङिइ लब् धोंले लबै म्हिमैंलाइ ङ्ह्‍योसि चमैंए लिलि प्रद्।✡3:17 १ कोर ४:१६; ११:१ 18 ङइ चु ताँ ल्‍हें खे क्हेमैंने बिल् खाँइमुँ, धबै या बिमुँ। ङए सैं बेल्‍ले नइमुँ। को-कोइ म्हिमैंम् अझै क्रूसर सिमिंबै येशू ख्रीष्‍टए शत्तुरन् तसि छ्ह थोम्। 19 चुमैं लिउँइ नर्गर नास तब्‍मुँ, तलेबिस्याँ फोन् चुमैंए देवता ग। धै फापिल् त्‍हुबै केमैं लल् योंमा चुमैं सैं तोंम। चमैंए सैं खोंयोंइ बिले चु ह्‍युलर्बै सैमैंर फिरन् तरिम्। 20 दिलेया ङ्योए नागरिकता स्वर्गर मुँ। छतसि ङ्योलाइ मुक्‍ति पिंबर स्वर्गउँइँले युबै प्रभु येशू ख्रीष्‍टए घ्याँ ङ्यो ङ्‍ह्‍योरिम्। 21 च त्हेर खीजी ङ्योए केर आफेबै ज्युलाइ खील् धों तबै ज्यु लमिंब्मुँ। खीजी खैले ताँन् सैमैं खीए न्होंर थेंल् खाँमुँ, छलेन ङ्योए केर आफेबै ज्यु या फेर्दिवासि खील् धों तबन् लमिंब्‍मुँ।