25
सोलोमनए अरू अहानमैं
1 सोलोमनए चु अहानमैं यहूदार्बै म्रुँ हिजकियाए म्हिमैंइ सार्दिसि थेंब् ग।
2 म्हिमैंइ क्होसे क्होल् आखाँबै ताँमैंउँइँले या परमेश्वरए मिं थेब् तम्;
छाबै ताँमैं क्होमिंबै म्रुँलाइ ताँनइ म्हाँदिम्।
3 खैले स्वर्गमैं बेल्ले नुल्ले मुँ, धै पृथ्बी गैरु मुँ,
छलेन म्रुँमैंए सैंर तो मुँ बिब खाबज्यै सेल् आखाँ।
4 चाँदिर मुँबै कस तेवाद्,
धै सुनारइ छ्याँबै भाँड बनेल् खाँब्मुँ।
5 आछ्याँबै म्हिमैं म्रुँउँइँले बैरु तेवाद्,
धै चए ग्याल्स भोंब तब्मुँ।
6 म्रुँए ओंसों ह्रोंसन् थेब आतद्,
धै थे-थेब म्हिमैंए म्हाँजोर टिल् आम्हैद्।
7 तलेबिस्याँ थेबै म्हिमैंए ओंसों क्हि टिबै क्ल्ह्योउँइँले क्हि क्युरु खारवाब् भन्दा
“क्हि चु क्होइ खसि टिद्,” बिब क्हिए ल्हागिर इजेत तम्।✡25:6-7 लूक १४:८-१०
क्हिए मिइ म्रोंबै ताँमैं बिबर
8 आतुरले अदालतर आह्याद्;
तलेबिस्याँ क्हिए ङ्हेब्-ट्हुब्मैंइ लिउँइ
फापिन् लइबिस्याँ क्हिइ तो लमुँ?
9 ङ्हेब्-ट्हुब्मैंने ह्रोंसए ताँए छलफल लमा
अरू म्हिए लोबै ताँमैं आबिद्।
10 आस्याँ च ताँ थेब्मैंइन क्हिलाइ फापिन् लब्मुँ,
धै क्हिए इजेत ह्याब्मुँ।
11 ठिकले पोंबै ताँ
चाँदिए थलिर थेंबै माराए स्याउ धों तब् ग।
12 छेन्ले थेबै म्हिए ल्हागिर बुद्धि मुँबै म्हिइ हौदिबै ताँ
निखुर माराए ङ्हेंबै रिङ न्हर खिब् धों तब् ग।
13 बालि खैबै त्हेर ख्वालमा ङ्युँबै क्युइ खों सल् लब् धोंले
भर लल् खाँबै सँउँसर बोबै म्हिइ
चलाइ कुल्मिबै क्ल्हेमैंए सैं तोंल् लम्;
14 ह्रोंसइ पिंइ आपिंबै क्होल्से पिंइ बिसि थब् प्हैंबै म्हि
नाँ आयुबै न्हाँम्स्यो नेरो खैं धों तब् ग।
15 ह्रिस आखल्ले पोंबै म्हिइ शासन लब्मैंलाइ वाँल् खाँम्;
धै छ्याँबै ताँ पोंमा ह्रिब्मैं या गाल्दिवाल् खाँम्।
16 खुदु योंइ बिस्याँ चल् खाँब् मत्त्रे चद्;
आस्याँ ल्हें चइ बिस्याँ क्हिइ रुइवाब्मुँ।
17 ह्रोंसए ङ्हेब्-ट्हुब्मैंए धिंर घरि-घरि आह्याद्,
आस्याँ क्हिलाइ म्रोंसि वाक्क ङ्हाँसि चइ हेल लब्मुँ।
18 ह्रोंसए ङ्हेब्-टुब्मैंए बिरोधर स्योलिबै ग्वाइ पिंबै म्हि
प्हरे, सेलाँ धै म्ह्रुछु तबै मेत्हले धों तब् ग।
19 दुःख तबै त्हेर भर लल् आखाँबै म्हिए फिर भर लब
चुयाबै स नेरो जोर्नि प्ल्ह्याबै प्हले धों तब् ग।
20 सैंर दुःख मुँबै म्हिए उँइँर क्वे प्रिंब
खुँबै त्हेर खिबै क्वें प्हेंसि बोब,
नेरो घार चज क्युँ झोंब् धो तम्।
21 क्हिए शत्तुर फो ख्रेंइमुँ बिस्याँ चब् चल् पिंन्,
धै क्यु पिइमुँ बिस्याँ चलाइ क्यु पिंन्।
22 छलमा चए क्रर लुँरिबै मि भुर कुवाब् धों तब्मुँ,
धै याहवेहजी क्हिलाइ इनाम पिंब्मुँ।✡25:21-22 रोम १२:२०
23 उतरउँइँले युबै खैंइ नाँ स्योवाब् धोंले
स्योलिबै ताँ पोंबै लेइ ह्रिस खल् लम्।
24 प्होंगि मिबै प्ह्रेंस्योने धिंर बालुन् टिब् भन्दा
बरु कौसिर्बै कुन घ्रिर टिब छ्याँब् तम्।
25 ङ्युँबै क्युइ क्यु पिब सल् लब् धोंले
ह्रेंगोउँइँले खबै छ्याँब सँउँसर तम्।
26 दुष्ट म्हिए उँइँर ठिक के लबै म्हि कुरब
आछ्याँबै क्युए मुल् नेरो क्ह्रुसि क्यु युबै धरु धों तब् ग।
27 क्वे खुदु ल्हें चब छ्याँब आङिं,
छलेना ह्रोंसन मान म्हैब छ्याँब आत।
28 ह्रोंसए सैंलाइ अधीनर थेंल् आखाँबै म्हि
गारा आझोंबै सहर धों तब् ग।