27
1 प्हन्हाँ छ लमुँ छु लमुँ बिसि प्हैंसि आपोंन्,
तलेबिस्याँ प्हन्हाँ तो तम् बिब क्हिइ आसे।✡27:1 याक ४:१३-१६
2 ह्रोंसन् थेब् प्हैंसि आपोंन्, आगुइन क्हिलाइ थेब् लरिगे;
आगुइन क्हिए छ्याँबै बयन लरिगे।
3 युँमा नेरो बलुवा बेल्ले ल्हिम्;
च भन्दै या आमादुमैंइ पखबै दुःख झन् ल्हिम्।
4 ह्रिस खबै म्हिने दयाम्हाँया आत; छाबै म्हि तोन्-तोर्न त्होंदो राम्;
दिलेया ह्रिस लबै म्हिए ओंसों खाब राल् खमुँ?
5 न्होह्रों लब् सेसेया म्हाँया खसि तोइ आबिल्ले टिब् भन्दा
चइ लबै गल्ति उँइँमिंब छ्याँब् ग।
6 क्ह्रिबै थुइ छ्याँब तरिगे बिसिन् हौदिस्याँ चए ताँ क्वेंल् खाँम्,
दिलेया शत्तुरइ म्हाँया लब् धों तलेया चए सैंइ आछ्याँबन् मैंम्।
7 बेल्ले म्रेंबै म्हिइ क्वे खुदु या आनि;
दिलेया फो ख्रेंब्मैंइ आलिंबै सै या लिंन् छोरम्।
8 धिं पिइरि प्रबै म्हि
च्होंउँइँले प्हुरयाबै नमें धों तम्।
9 लिंबै थाँ खबै अत्तर नेरो छ्युगुइ म्हिलाइ आनन्द लम्,
छलेन क्ह्रिबै थुइ पिंबै सल्लाइ सैं तोंन् लम्।
10 ह्रोंसए थु नेरो ह्रोंसए आबाए थुलाइ आम्लेद्,
धै क्हिए फिर दुःख तखमा ह्रेंगो मुँबै ह्रोंसए आघें अलिमैंए धिंर आह्याद्,
तलेबिस्याँ ह्रेंगो मुँबै ह्रोंसए आघें अलिमैं भन्दा
ह्रोंसए चेंदोंर्बै ङ्हेब्-ट्हुब्मैं ग्वार्दिब छ्याँब तम्।
11 ओ ङए च्ह, ङलाइ म्हि आच्हिल्ले पोंब्मैंए उँइँर ङइ जवाफ पिंल् योंरिगे बिसि
बुद्धि मुँब् तद्, ङए सैं तोंन् लबै के लद्।
12 बुद्धि मुँबै म्हिइ ह्रोंसए फिर न्होह्रों तम् बिब ह्रेंगोउँइँलेन् म्रोंसि लोबै क्ल्ह्यो म्हैम्,
दिलेया च्हैंब् मैंब् लल् आखाँबै म्हि छाइन ह्याम् धै दुःख योंबर फेम्।
13 ङो आसेबै म्हिए जमानि टिबै बुद्धि आरेबै म्हिल क्वें या किंथेंन्;
धै फ्रें क्ल्योंप्रबै च्हमिरिए ल्हागिर चइ जमानि टिस्याँ चने मुँबै सैमैं बन्दगिर थेंन्।
14 न्हाकर्न रेसि थेबै कैले ह्रोंसए थुलाइ खाबज्यै आशिक पिंम् बिस्याँ,
च सराप पिंब् धोंन् तब्मुँ।
15 बर्खर झरि त्हिंब
नेरो प्होंगि मत्त्रे मिबै च्हमिरि घ्रिन् ग;
16 छाबै च्हमिरिलाइ अधीनर थेंब् बिब खैंलाइ क्हाब् धोंन् तब् ग,
धै योइ छ्युगु क्हाब् धोंन् ग।
17 पैइन पैए धार झोंब् धोंले
म्हिइन ह्रोंसए थुलाइ म्याम्।
18 तोंबु धुँलाइ छेनाले ङ्ह्योबै म्हिइन चए रो चब्मुँ,
छलेन ह्रोंसए क्ल्हेए सेवा लबै म्हिइन मान योंब्मुँ।
19 क्युर लि म्रोंब् धोंले
म्हि खैतब् मुँ बिसि चए खोंइन म्रोंम्।
20 क्रों नेरो नासइ*27:20 हिब्रू क्युइर: सेओल नेरो आबाद्दोन न्होह्रों लब् आपिब् धोंले
म्हिए मिइ म्रोंबै सैमैं आयोंन् समा सन्तोक आत।
21 मारा चाँदि मिर खार्दिब् धोंले
आगुइ लबै बयनउँइँले म्हि खैतब् मुँ बिसि सेल् खाँम्।
22 नारि ह्रेंदोर प्ह्रोब् धोंले
आमादुलाइ खलर झोंसि म्ल्ह धोंले धोंलेया
चइ ह्रोंसए आमादु बानि पिरिब् आरे।
23 ह्रोंसए र-क्युमैं खै तरिइमुँ बिसि छेनाले छैं लद्;
धै न्ह क्रों मि क्रोंले ह्रोंसए बगालमैं ङ्ह्योद्,
24 तलेबिस्याँ सै न्होर खोंयोंन् बिलै आटि;
छलेन पुस्ता-पुस्त समा मुकुट कुल् योंम् बिब आरे।
25 कारयाबै छिमैं खैंवामा कमलो छिमैं पलेब्मुँ,
धै कोंजरेबै पिंग्या छिमैं खुब्मुँ,
26 च लिउँइ क्युमैंए पै क्हिए ल्हागिर क्वें तब्मुँ,
धै र-बुख्यामैं क्ल्ह्यो किंबै सै तब्मुँ।
27 झाइले क्हि नेरो क्हिए परवाइ चबै ल्हागिर,
नेरो क्हिए केब्स्योमैं न्हबै ल्हागिर
क्हिए रमैंए ङ्हेइ योब्मुँ।