30
आगूरइ बिबै अहानमैं
1 याकेए च्ह आगूरए अहानमैं। भबिष्याबाणि:
इथीएल नेरो यूकाललाइ आगूरइ चु अहान बिब् ग।
2 म्हिमैंए न्होंर ताँ आक्होब ङन् ग;
म्हिने मुँल् त्हुबै बुद्धि ङने आरे!
3 ङने बुद्धि आरे,
ङइ याहवेहए बारेर तोइ आसेइमुँ।
4 स्वर्ग समा खाब् क्रेयासि युइमुँ?
खाबइ ह्रोंसए मुठिर खैं क्हाइमुँ?
ह्रोंसए क्वेंर खाबइ मा ङ्युँइ बेर्दिइमुँ?
पृथ्बीए साँद खाबइ तोक्दिइमुँ?
खीए मिं तो जा, धै खीए च्हए मिं तो जा?
क्हिइ सेइमुँ बिस्याँ ङने बिद्!
5 परमेश्वरए ताँ छ्याब आरेब मुँ;
खीए प्हलेर खब्मैं ताँनल खी ढाल ग।
6 खीए बचनर तोइ आथौदिद्,
आस्याँ खीजी क्हिलाइ हौदिब्मुँ धै स्योर्गों बिब्मुँ।
7 ओ परमेश्वर ङइ क्हिने ताँ ङ्हिं ह्रिम्;
ङ सिब् भन्दा ओंसों च ताँमैं ङए ल्हागिर लमिंन्:
8 स्योर तेब नेरो लुबै ताँमैं ङउँइँले ह्रेंगो थेंमिंन्;
धै ङ ङ्हाँदु आलमिंन्, प्लबै या आलमिंन्;
दिलेया ङए ल्हागिर चैदिबै चबै सै पिंन्।
9 आस्याँ प्लब् तबइले ङइ क्हिलाइ म्लेयालै
धै “याहवेह खाब् जा?” बिसि ङइ बिलै;
ङ ङ्हाँदु तसि ह्योलै,
धै ङए परमेश्वरए मिं ङइ वालै।
10 क्ल्हेए ओंसों चए केब्छैंलाइ आस्यारद्;
आस्याँ चइ क्हिलाइ सराप झोंब्मुँ, धै क्हि दोषि ठर्दिब्मुँ।
11 कोइ म्हिमैंइ ह्रोंसए आबालाइ सराप झोंम्,
धै आमाए छ्याँबै बयन आल।
12 अरू म्हिमैं ह्रोंसन् शुद्ध मुँ ङ्हाँम्,
दिलेया चमैंइ ह्रोंसए सैंर्बै क्ह्रि आख्रुइमुँ।
13 चमैं ह्रोंसन् बेल्ले छ्याँब मुँ बिसि थेब् प्हैंम्,
चमैंए मिइ कति आछ्याँन्ले ङ्ह्योमुँ!
14 चमैंए समैं सेलाँ धों तब् ग;
चमैंए बङ्गारा क्होजा धों तब् मुँ।
चमैंइ ङ्हाँदुमैंलाइ क्ल्ह्योंवाम्,
धै आयों-आख्युब्मैंलाइ सैवाम्।
15 जुकाल च्हमि ङ्हिं मुँ:
चमैंइ “पिंन्! पिंन्!” बिदै ओररिम्।
खोंयोंइ सान्दोक् आतबै सै सोंथो मुँ;
खोंयोंइ “योइ” आबिबै सै प्लिथो मुँ।
16 क्रों, प्हसे आफिबै च्हमिरि,
कारा क्ल्ह्यो नेरो मिइ
खोंयोंइ “तइ” आबि।
17 ह्रोंसए आबालाइ प्ह्रब
नेरो आमालाइ म्हि आच्हिबै म्हिए मि
ब्याँसिर्बै कगामैंइ चोब्मुँ,
धै क्व्रेमैंइ चवाब्मुँ।
18 ङए ल्हागिर अचम्मबै सै सोंथो मुँ, चमुँ;
धै ङइ क्होलन् आखाँबै ताँ प्लिथो मुँ:
19 मुर क्व्रेमैं खैले प्हुरब,
पाराए फिर प्हुरि खैले प्रब,
मा ङ्युँइर झाज खैले प्रब,
नेरो फ्रेंसि छमिने खैले प्रब।
20 फ्रें क्ल्योंप्रबै च्हमिरिए चाल छाब् तम्:
च म्हिने प्रमुँ, धै ज्यु ख्रुमुँ,* 30:20 च म्हिने प्रमुँ, धै ज्यु ख्रुमुँ, हिब्रू क्युइर, चइ चमुँ धै सुँ फ्योमुँ
झाइले “ङइ तोइ गल्ति आलइमुँ,” बिम्।
21 पृथ्बीलाइ त्हारल् लबै सैमैं सोंथो मुँ;
पृथ्बीइ सैदिल् आखाँबै सै प्लिथो मुँ:
22 केब्छैं म्रुँ तब,
बुद्धि आरबै म्हिमैं म्रेंन्ले चल् योंब,
23 म्हाँया आयोंबै च्हमिरिइ ब्ह्या लब,
धै ह्रोंसए नेब्स्योए क्ल्ह्योर केब्स्यो टिब।
24 पृथ्बीर च्योंब सै प्लिथो मुँ,
दिलेया चमैं बेल्ले बुद्धि मुँब मुँ:
25 नौरोमैं ल्हें भोंब आरे,
दिलेया ख्वालबै त्हेर चमैंइ चबै सैमैं खुथेंम्;
26 भइँकोदलेमैं ल्हें भोंब आरे;
दिलेया चुइ पारार रो बनेसि टिम्;
27 तिरिमैंल म्रुँ आरे,
दिलेया चमैं हुलले प्रम्;
28 खोरेलाइ योइ क्हाल् खाँम्,
दिलेया च म्रुँए दरबारर टिम्।
29 छेन्ले प्रबै सै सोंथो मुँ,
ठ-ठारले प्रबै सै प्लिथो मुँ:
30 खेदोमैंए न्होंर सिंह बेल्ले भोंब तम्,
च तो सैने या आङ्हिं;
31 ठ-ठारले प्रबै नग भले,
र बुख्या,
नेरो सैनामैं कारर्ग्यु लसि प्रबै म्रुँ।
32 क्हि बुद्धि आरेबै के लप्रसि ह्रोंसन् थेब् प्हैंसि पोंस्याँ,
धै क्हिइ आछ्याँब चाँजोमैं लस्याँ,
ह्रोंसए सुँर योइ म्रुद्!
33 तलेबिस्याँ ङ्हे लोइरि छ्युगु त्होंम्,
नखुँ नेस्याँ को युम्,
छलेन आगुलाइ ह्रिस खल् लस्याँ प्होंगि तम्।