3
दाऊदइ परमेश्वरने ग्वार ह्रिब
ह्रोंसए च्ह अब्शालोमउँइँले न्हेयामा दाऊदइ प्ह्रिबै भजन।✡3:0 २ शमू १५:१३—१७:२२
1 ओ याहवेह, ङए शत्तुरमैं बेल्ले ल्हें मुँ!
ङए बिरोधर रेब्मैं या ल्हेंन् मुँ!
2 “परमेश्वरजी चलाइ ल्होमिंरिब् आरे,”
बिसि ङए बारेर ल्हें म्हिइ बिरिइमुँ।
तिस्याँदे मैंन्
3 दिलेया ओ याहवेह, क्हि ङलाइ जोगेमिंबै ढाल ग,
क्हिजी ङलाइ मान पिंम्,
क्हिजी ङए क्र कैंडो लमिंम्।
4 ङ थेबै कैले याहवेहने ग्वार ह्रिब्रें लमुँ,
धै खीजी ह्रोंसए पबित्र कोंउँइँले ङलाइ ज्वाफ पिंमुँ।
तिस्याँदे मैंन्
5 ङ रोमा न्हरु खयामुँ, धै छोरमुँ,
तलेबिस्याँ याहवेहजीन् ङ जोगेमिंम्।
6 ङए बिरोधर ङए कारग्युले राबै
हजार च्यु शत्तुरमैंने या ङ ङ्हिंरिब् आरे।
7 ओ याहवेह ल्हुसे!
ओ ङए परमेश्वर, ङलाइ जोगेमिंन्!
ङए ताँन् शत्तुरमैंए क्ह्राँबोर ल्हिमिंन्;
धै दुष्टमैंए स चोमिंन्।
8 क्हिए आशिकए यो क्हिए म्हिमैंए फिर तरिगे;
तलेबिस्याँ याहवेहजी ह्रोंसए म्हिमैं जोगेमिंम्।
तिस्याँदे मैंन्