14
आमादुमैंइ “परमेश्वर आरे” बिम्।
क्वे प्रिंब्मैंए चिबए ल्हागिर दाऊदए भजन।
1 आमादुमैंइ ह्रोंसए सैंर “परमेश्वर आरे!” बिमुँ।
चमैंइ छेरन् ङ्हाँबै केमैं लमुँ, चमैं छेरन् ङ्हाँन् तब्मैं मुँ;
छ्याँबै के लब्मैं खाबै आरे।
2 ताँ क्होब्मैं नेरो परमेश्वर म्हैब्मैं
खाबै मुँ उ बिसि
याहवेहजी स्वर्गउँइँले म्हिमैंलाइ ङ्ह्योम्।
3 चमैं ताँन् आछ्याँबै घ्याउँइँ प्रइमुँ, धै चमैं ताँन् छेरन् ङ्हाँन् तयाइमुँ।
खाबज्यै छ्याँबै के आल,
छ्याँबै के लब्मैं घ्रि या आरे।✡14:1-3 रोम ३:१०-१२
4 चु आछ्याँबै के लब्मैंइ तोइ आसे वा?
ह्योइ लुडिब् धोंले चुमैंइ ङए म्हिमैं लुडिसि ह्रोंसए फो न्हम्,
चुमैंइ याहवेहए मिं खोंयोंइ आकिं।
5 छतसि चमैं ङ्हिंसि आदिदिम्,
तलेबिस्याँ ठिक के लब्मैंने बालु परमेश्वर तम्।
6 क्हेमैं दुष्टमैंइ ङ्हाँदुमैंए चाँजोमैं फुवाम्,
दिलेया चमैंइ ग्वार योंबै क्ल्ह्यो याहवेहन् ग!
7 इस्राएलीमैं जोगेमिंबै याहवेह सियोनउँइँले युरिगे बिसि ङ प्राथना लम्!
याहवेहजी ह्रोंसए म्हिमैंलाइ धबै सुख पिंमा
याकूबए सन्तानमैं निस्योब्मुँ धै इस्राएलीमैंया*14:7 इस्राएलीमैं अर्था याकूबए सन्तानमैं। याकूबए अर्को मिं इस्राएल मुँल (उत्पत्ति ३२:२२-३१) बेल्ले सैं तोंब्मुँ!