22
दुःख योंबै त्हेर सैं नब
क्वे प्रिंब्मैंए चिबए ल्हागिर, “त्हिंयाँ प्योबै त्हेर्बै फो आमा” बिबै भाकार प्रिंल् त्हुबै दाऊदए भजन घ्रि।
1 ओ ङए परमेश्वर, ओ ङए परमेश्वर, क्हिजी ङ तले पिवाल?✡22:1 मत्ती २७:४६; मर्क १५:३४
सैं आतोंसि क्रोसेया
ङ आजोगेमिंल्ले क्हि तले ङ ङाँइँले ह्रेंगो तल?
2 ओ ङए परमेश्वर, ङइ त्हिंइ ह्रोंसे क्हिए मिंन् किंइमुँ,
म्हुँइँस ह्रोंसे या क्हिनेन् ग्वार ह्रिइमुँ छान् ललेया ङ छिं आङ्हाँइमुँ।
3 दिलेया क्हि पबित्र परमेश्वर राजगद्दिर टिम्,
इस्राएलीमैंइ क्हिए मिं क्वेम्।
4 ङिए खेमैं माँमैंइ क्हिए फिर्न भर लमल,
चमैंइ क्हिए फिर भर लबइले क्हिजी चमैं जोगेमिंइ।
5 चमैंइ ओरदै क्हिनेन् ग्वार ह्रिइ, छतसि चमैं सोइ।
चमैंइ क्हिए फिर्न भर लबइले चमैं फा पिल् आत्हुल।
6 दिलेया ङ प्हुँलुँ धोंन् तब् मुँ, म्हि आङिं बिसि
म्हिमैंइ ङलाइ तोइ धोंइ आङ्हाँ,
धै ङलाइ प्ह्रइमुँ।
7 ङलाइ म्रोंब्मैं ताँनइ ङउँइ ङ्ह्योसि
म्हदे म्लिंसि छ बिदै खरि च्यारम्:✡22:7 मत्ती २७:३९; मर्क १५:२९; लूक २३:३५
8 “याहवेहजीन् जोगेमिंम् बिसि खीए फिर्न चइ भर लम्।
च म्रोंसि याहवेह सैं तोंम्,
छतसि खीजीन् चलाइ जोगेमिंरिगे,” बिसि चमैंइ ङलाइ प्ह्रम्।✡22:8 मत्ती २७:४३
9 चमैंइ तोन् बिलेया आमाए फोउँइँले ङलाइ तेब क्हिन् ग।
आमाए क्ह्वेंउँइँलेन् क्हिजी ङलाइ क्हिए फिर भर लब लोमिंइ।
10 फिबै त्हे ओंनोंन् ङ क्हिलन् ग,
आमाए फोर मुँब् ओंनोंबै ङए परमेश्वर क्हिन् ग।
11 ङ ङाँइले ह्रेंगो आतमिंन्,
तलेबिस्याँ ङए न्होह्रों लल् म्हैब्मैं ल्हें मुँ,
ङलाइ ल्होमिंब खाबै आरे।
12 साँढे धोंले भोंबै शत्तुरमैंइ ङ घेर्दिइमुँ,
बाशान*22:12 बाशानयर्दन स्योंए पुर्वउँइबै बाशान बिबै क्ल्ह्योर खेदोए ल्हागिर छ्याँबै छि योंमल। छतसि बाशानर्बै साँढेमैं बेल्ले भोंब् तल। ह्युलर्बै भोंबै साँढेमैं धों तबै शत्तुरमैं ङए कारग्युले मुँ।
13 फो ख्रेंसि ङ्हेदै ह्वाखबै सिंहमैं धोंले
ङए न्होह्रों लबै ल्हागिर चमैंइ सुँ आँ लम्।
14 क्यु ङेयाब् धोंले ङए भों नुयाइमुँ,
ङए ह्रिबए जोर्निमैं ताँन् प्ल्ह्याइमुँ।
ङए खों युलुयाबै मम् बत्ति धोंन् तयाइमुँ।
15 भों नुयासि ङ तियाबै पु धोंन् तयाइमुँ,
ङए ले ताइ ह्रेंयाइमुँ,
सियारिगे बिसि क्हिजी ङ त्हुलर भ्योंथेंइमुँ।
16 दुष्ट म्हिमैं ङए कारग्युले मुँ,
नगिमैंइ धोंले चमैंइ ङ घेर्दिइमुँ,
चमैंइ ङए यो प्हलेमैंर खुँ थोंवाइमुँ।
17 ङए ताँन् ह्रिबमैं ङइ च्योल् खाँम्,
म्हिमैंइ आछ्याँबै सैंले ङ ङाँइ ङ्ह्योबै ङ्ह्योबन् लम्।
18 चिट्टा झोंसि चमैंइ ङए क्वें
खें-खेंमैंए न्होंर चुम्।✡22:18 मत्ती २७:३५; मर्क १५:२४; लूक २३:३४; यूह १९:२४
19 दिलेया ओ याहवेह, ङ ङाँइले क्हि ह्रेंगो आतमिंन्!
ओ ङए भों, युनन् ङलाइ ग्वार पिंन्।
20 सेलाँउँइँले ङ जोगेमिंन्,
चु नगिमैंउँइँले ङ सिल् आपिंन्।
21 चेंमैंए सुँउँइँले ङ फ्रेमिंन्,
धै क्ह्योंर्बै साँढेए रुउँइँले ङ जोगेमिंन्।
याहवेहए मिं क्वेब
22 ङए अलिमैंए उँइँर क्हिजी लबै छ्याँबै केमैंए बयन लदै ङ क्हिए मिं थेब लब्मुँ।✡22:22 हिब्रू २:१२
ल्हें म्हि च्होंबै क्ल्ह्योरै या ङ क्हिलाइन थेब् लब्मुँ
23 ओ याहवेहलाइ मान लब्मैं, खीलाइन थेब् लद्!
ओ याकूबए ताँन् सन्तानमैं, खीए मिं क्वेद्!
ओ इस्राएलए ताँन् सन्तानमैं, खीने ङ्हिंन्!
24 तलेबिस्याँ आगुइ ह्रुगुदिसि दुःख योंबै म्हिलाइ खीजी ल्होमिंम्,
हेलै या आल,
खीजी ह्रोंसए मोंडा छाबै म्हिमैंउँइँले आलो,
चइ ल्होमिन् बिसि ग्वार ह्रिमा खीजी थेम्।
25 ल्हें म्हि च्होंबै क्ल्ह्योर ङए छ्याँबै बयन तल् पिंब क्हिन् ग,
छतसि क्हिलाइ मान लब्मैंए उँइँर बाछा फैसि लम् बिबै के ङइ पूरा लब्मुँ।
26 ङ्हाँदुमैं चसि म्रेंब्मुँ,
याहवेह म्हैब्मैंइ खीलाइन थेब् लब्मुँ।
धै चमैं खोंयोंन् बिलै सोरिल् योंब्मुँ!
27 ह्युलर मुँबै ताँन् ह्रेंमैंइ क्हिलाइन मैंब्मुँ
धै क्हि ङाँइँन तोखब्मुँ।
ह्रें-ह्रेंर्बै म्हिमैं ताँनइ
क्हिलाइन फ्योब्मुँ।
28 तलेबिस्याँ ताँन् ह्रेंमैंए म्रुँ क्हिन् ग,
क्हिजीन् खन्तोंदोंन् ग्याल्स लम्।
29 ह्युलर्बै ताँन् प्लो प्लोब्मैंइ भोज चदै सैं तोंदै क्हिए मिं क्वेब्मुँ।
ह्रोंसलाइ जोगेल् आखाँब्मैं सर्न कोंनेल् त्हुब्मुँ,
चमैं ताँनइ क्हिए उँइँर्न च्हि तुँब्मुँ।
30 लिउँइ खबै सन्तानइ खीए के लब्मुँ,
लिउँइ खबै पुस्तमैंने या चमैंइ याहवेहए बारेर बिमिंब्मुँ,
31 तिंयाँ समा आफिबै म्हिमैंलाज्यै या
चमैंइ खीजी लबै ठिक केमैंए बारेर बिमिंब्मुँ।
✡22:1 22:1 मत्ती २७:४६; मर्क १५:३४
✡22:7 22:7 मत्ती २७:३९; मर्क १५:२९; लूक २३:३५
✡22:8 22:8 मत्ती २७:४३
*22:12 22:12 बाशानयर्दन स्योंए पुर्वउँइबै बाशान बिबै क्ल्ह्योर खेदोए ल्हागिर छ्याँबै छि योंमल। छतसि बाशानर्बै साँढेमैं बेल्ले भोंब् तल।
✡22:18 22:18 मत्ती २७:३५; मर्क १५:२४; लूक २३:३४; यूह १९:२४
✡22:22 22:22 हिब्रू २:१२