24
मान लल् त्हुबै म्रुँ
दाऊदए भजन घ्रि
1 पृथ्बी नेरो चर मुँबै तोन्दोंरि सैमैं याहवेहलन् ग,
ह्युल नेरो चर टिब्मैं ताँन् खीलन् ग,✡24:1 १ कोर १०:२६
2 तलेबिस्याँ खीजी पृथ्बी मा ङ्युँए फिर थेंइमुँ,
धै पृथ्बीए जग गैरु क्युए फिर थेंइमुँ।
3 याहवेए कोंर खाब् क्रेल् खाँमुँ?
धै खीए पबित्र क्ल्ह्योर खाब् राल् खाँमुँ?
4 आछ्याँबै केमैं आलब्मैं,
छ्याँबै सैं प्ह्याब्मैं,
कु ङाँइ सैं आल्हैदिब्मैं
धै स्योलिबै ताँर कसम आचब्मैंन्,
याहवेहए कोंर क्रेल् खाँम्।✡24:4 मत्ती ५:८
5 छाबै म्हिमैंइन याहवेह ङाँइँले आशिक योंब्मुँ,
धै चमैंलाइ जोगेमिंबै परमेश्वरजी चमैंलाइ ठिक ठर्दिमिंब्मुँ।
6 खीलाइ म्हैबै म्हिमैं छाबन् तम्,
चमैंइ याकूबए परमेश्वरने त्होबै सैं लम्।
तिस्याँदे मैंन्
7 ओ मुल् म्रामैं, मान लल् त्हुबै म्रुँ होंरिगे बिसि
क्हेमैंए क्र कैंडो लद्!
ओ स्योंम्बै म्रामैं, नुब् तद्!
8 मान लल् त्हुबै म्रुँ खाब् जा?
याहवेहन् ग! खी भोंब नेरो शक्ति मुँब मुँ,
याहवेहजीन् ल्हडें ट्होम्।
9 ओ मुल् म्रामैं, मान लल् त्हुबै म्रुँ होंरिगे बिसि
क्हेमैंए क्र कैंडो लद्!
ओ स्योंम्बै म्रामैं, नुब तद्!
10 मान लल् त्हुबै म्रुँ खाब् जा?
स्वर्गर्बै सेनामैंए चिब याहवेहन् ग!
खीन् मान लल् त्हुबै म्रुँ ग।
तिस्याँदे मैंन्