28
याहवेह ङए शक्ति नेरो ढाल ग
दाऊदए भजन
1 ओ याहवेह, ङ लोबै पारा, क्हिनेन् ङ ग्वार ह्रिमुँ,
ङइ ग्वार ह्रिमा आथेब् धों आलमिंन्,
क्हिजी ङए ताँ आथेमिंस्याँ,
सिसि क्रोंर ह्याब्मैं धों ङ तब्मुँ।
2 ल्होमिंन् बिसि क्हिनेन् ग्वार ह्रिमुँ,
धै क्हिए ताँन् भन्दा पबित्र क्ल्ह्योउँइ ङ ह्रोंसए यो क्वेमुँ,
छतसि ङए ताँमैं थेमिंन्।
3 दुष्ट म्हिमैं नेरो आछ्याँबै के लब्मैंने बालु ङलाइ दण्ड आपिंन्!
चमैंइ ह्रोंसए ङ्हेब्मैंने बालु छ्याँबै ताँ लम्,
दिलेया चमैंए खोंर बिस्याँ आछ्याँबै ताँ मैंम्।
4 चमैंइ लबै आछ्याँबै केमैं
नेरो चमैंए योइ लबै केमैं ङ्ह्योसि योंल् त्हुबै दण्ड चमैंलाइ पिंन्;
चमैंए योइ खैबै के लइमुँ छाबन् दण्ड चमैंलाइ पिंन्,
चमैंइ योंल् तुबै दण्ड चमैंलाइ पिंन्।✡28:4 दर्शन २२:१२
5 याहवेहजी लबै केमैं
नेरो खीए योजी लबै केमैं चमैंइ वास्ता आल,
छतसि खीजी चमैंलाइ नास लवाब्मुँ,
खोंयोंइ चमैंलाइ बनेरिब् आरे।
6 याहवेहए मिं थेब् तरिगे!
तलेबिस्याँ ल्हयो खमिंन् बिबै प्राथना लमा खीजी थेमिंइमुँ।
7 याहवेह ङए शक्ति नेरो ङए ढाल ग!
ङइ खीनेन् सैं केइमुँ, धै खीजीन् ङ ल्होमिंबइले
ङए सैं बेल्ले तोंइमुँ,
धै ङ भजन प्रिंसि खीलाइ धन्यबाद पिंब्मुँ।
8 याहवेहजी खीए म्हिमैंलाइ भों पिंम्,
धै खीजी त्हाँबै म्रुँ जोगेसि रक्षा लमिंम्।
9 क्हिए म्हिमैं जोगेमिंन्, धै ह्रोंसजी त्हाँबै म्हिमैंलाइ आशिक पिंन्!
चमैंए प्ह्रोंछैं तमिंनु, धै खोंयोंन् बिलै चमैंए वास्ता लमिंन्।