33
याहवेहए खोंयोंइ आनुबै म्हाँया
1 ओ ठिक के लब्मैं, सैं तोंदै याहवेहए मिंर भजन प्रिंन्!
छ्याँबै सैं प्ह्याब्मैंइ खीए मिंर क्वे प्रिंब ङ्हेंम्।
2 बीणा ह्रादै याहवेहए मिं थेब् लद्;
तार च्यु मुँबै सारङ्गी ह्रादै खीए मिंर क्वे प्रिंन्।
3 खीए ल्हागिर छारा क्वे घ्रि प्रिंन्;
जय जय लदै क्ह्युरल्ले बाजामैं ह्राद्।
4 तलेबिस्याँ याहवेहजी बिबै ताँ ठिक मुँ;
धै खीए ताँन् केमैं भर लल् खाँब तम्।
5 याहवेहजी खाबलाज्यै या आफेल्ले ठिक निसाफ लब खोम्;
खीजी लबै छ्याँबै केमैं ह्युल तिगोंन् मुँ।
6 याहवेहए बचनइ मु बनेइ,
धै चर मुँबै तोन्दोंरि सै बनेइ।
7 खीजी मा ङ्युँइर्बै क्यु खागु लमुँ;
खीजी गैरु मा ङ्युँइमैं ह्रोंसए धन्सरर थेंमुँ।✡33:7 उत १:१०
8 पृथ्बीर्बै ताँन् म्हिमैं याहवेह म्रोंसि ङ्हिंरिगे;
ह्युलर टिबै ताँन् म्हिमैंइ खीलाइ म्हाँदिरिगे।
9 तलेबिस्याँ खीजी बचन पोंसि तोन्दोंरि सैमैं लमिंइ;
खीजी तयाद् बिमा ताँन् सै तयाइ।
10 अरू ह्रेंमैंइ लबै आछ्याँबै चाँजोमैं याहवेहजी फुवाम्,
चमैंइ लल् म्हैबै आछ्याँबै केमैं खीजी तल् आपिं।
11 दिलेया याहवेहजी लबै चाँजोमैं बिस्याँ खोंयोंन् बिलै तरिम्,
खीए खोंर मैंबै ताँमैं पुस्ता पुस्ता समा तरिम्।
12 याहवेहलाइ परमेश्वर बिसि म्हाँदिबै म्हिमैंइ आशिक योंम्।
खीजी ह्रोंसए म्हिमैं लबर चमैंलाइ त्हाँइ।
13 याहवेहजी स्वर्गउँइँले ङ्ह्योमुँ
धै खीजी म्हिमैंए ताँन् सन्तानलाइ म्रोंमुँ।
14 खीजी ह्रोंस टिबै राजगद्दिउँइँले
पृथ्बीर्बै ताँन् म्हिमैं ङ्ह्योरिम्।
15 ताँन् म्हिमैंलाइ मैंबै सैं पिंब खीन् ग,
धै चमैंइ लबै तोन्दोंरि केमैं खीजी म्रोंम्।
16 सेनाए भोंउँइँले म्रुँ जोगेल् आखाँ;
नेबर ह्याबै म्हि ह्रोंसए भोंउँइँले सोल् आखाँ।
17 ट्होबै ल्हागिर घोडाए फिर भर लब तोनतोर्न ग,
च कतिन् भोंलेया जोगेल् आखाँ।
18 दिलेया याहवेहजी खीने ङ्हिंब्मैंए छैं लम्;
तलेबिस्याँ ङिइ खीए फिर आशा थेंइमुँ।
19 छतसि ङिलाइ सोगों थेंबै ल्हागिर
अँङ्गालरै या खीजी ङिंलाइ तोइ सैरै या खाँचो आलमिं।
20 बिसि याहवेहए फिर आशा थेंसि ङिइ खीए घ्याँ ङ्ह्योरिम्;
तलेबिस्याँ ङ्योलाइ ल्होमिंब नेरो ङ्योए रक्षा लबै परमेश्वर खीन् ग।
21 खीजीन् ङ्योए सैं तोंन् लमिंम्,
तलेबिस्याँ खीए पबित्र मिंर ङ्योइ भर लम्।
22 ओ याहवेह, क्हिए फिर ङिइ आशा थेंइमुँ;
छतसि क्हिए खोंयोंइ आनुबै म्हाँया ङिए फिर तरिगे।