भाग सों
73
भजनमैं ७३—८९
परमेश्वरजी ङए सैं क्होमिंसि चैदिबै सै तोन्दोंरि पिंरिम्
आसापए भजन घ्रि।
1 क्ह्रोंसेंन इस्राएलए ल्हागिर,
छ्याँबै सैं प्ह्याब्मैंए ल्हागिर,
परमेश्वर स्वाब मुँ।
2 दिलेया ङए प्हले प्लेबर होंल,
प्हले प्लेब् धोंले ङए बिश्वास म्हायाबि छेल,
3 तलेबिस्याँ दुष्टमैं छ्याँब् तब् म्रोंसि
च थेब् प्हैंब्मैंए फिर ङइ ह्रिस लमल।
4 चमैं आसिन् समा दुःख तरिब् आरे;
चमैं नब्-छब् आत, चमैंए ज्यु भोंब तम्।
5 अरू म्हिमैंइ धोंले चमैंइ दुःख आयों;
अरू म्हिमैंए फिर आछ्याँबै ताँमैं खब् धोंले चमैंए फिर आख।
6 सिक्रि खिल् योंमा सैं तोंब् धोंले थेब् प्हैंमा चमैं सैं तोंम्;
धै क्वें खिब् धोंले चमैंइ प्होंगि कैगि लम्।
7 चमैंए सारो सैंउँइँले दुष्ट केमैं खम्;
चमैंए सैंइ खोंयोंन् बिलै आछ्याँब ताँ मैंरिम्।*73:7 हिब्रू क्युइर चु पद स्पस्ट आरे।
8 चमैंइ आगुए बिल्लि लम्, झाइले दुष्ट ताँ पोंम्;
धै ङम् ङन् ग बिसि अरूलाइ क्र ओलै आपिं।
9 मु ङिलन् ग बिसि चमैंए सुँइ बिम्,
धै चमैंए लेइ पृथ्बी तिगोंन् अधीन लम्।
10 छतसि परमेश्वरए म्हिमैं चमैं ङाँइ एखम्,
धै ल्हें क्यु थुँब् धोंले चमैंए ताँ क्वेंम्।†73:10 हिब्रू क्युइर चु पद स्पस्ट आरे।
11 “ङ्योइ लबै के परमेश्वरजी खैले सेमुँ?
ताँन् भन्दा थेबै परमेश्वरने ज्ञान मुँ वा?” बिसि चमैंइ बिमुँ।
12 दुष्टमैं छाब तम्:
चमैं खोंयोंइ न्हुँ आल, चमैंए सै न्होर ल्हें तरिम्।
13 क्ह्रोंसेंन ङइ तोनतोर्न ह्रोंसए सैं छ्याँब् प्ह्याइमुँ,
धै गल्ति आलइमुँ बिसि ङइ यो ख्रुइमुँ।
14 त्हिंतिमिन् ङइ दुःख योंइमुँ;
धै न्हाँग ह्रोंसे ङइ दण्ड योंल् त्हुइमुँ।
15 दिलेया दुष्टमैंइ पोंब् धोंले ङज्यै या पोंस्याँ
क्हिए सन्तानलाइ ङइ दु:ख पिंमल।
16 चु ताँमैं ङइ क्होल् म्हैमा
ङए ल्हागिर बेल्ले गारो तइ।
17 दिलेया लिउँइ ङ परमेश्वरए पबित्र क्ल्ह्योर होंमा
खी ङाँर खसि मत्त्रे चमैंए लिउँइ तरिबै ताँमैं ङइ क्होइ।
18 क्ह्रोंसेंन क्हिजी चमैंलाइ प्हले प्लेबै क्ल्ह्यो जरे थेंम्;
क्हिजी चमैं नास तयाबर भ्योंवाँम्।
19 थाइ आसेल्ले चमैं नास तयाम्,
चमैं बेल्ले ङ्हिंमा ताँन् नोबोइ!
20 न्हाँगर छोरमा म्होंड म्हयाब् धोंले,
ओ प्रभु, क्हि छोरमा चमैंलाइ तो धोंइ आङ्हाँ।
21 ङए सैंर दुःख तल,
ङए सैं ककाँ क्युँ-क्युँ ङ्हाँल,
22 छतसि ङ च्हैंब् मैंल् आखाँब नेरो ताँ क्होल् आखाँब् मुँल;
क्हिए उँइँर ङ खेदो धोंन् तब् मुँल।
23 दिलेया ङ खोंयोंन् बिलै क्हिने बालुन् मुँ;
क्हिजी ङए क्योलो यो क्हामुँ।
24 क्हिजी सल्ला पिंसि ङलाइ डोरेमिंम्,
धै लिउँइ ङ क्हि ङाँर मान योंबै क्ल्ह्योर बोब्मुँ।
25 ङए ल्हागिर स्वर्गर क्हि बाहेक अरू खाब् मुँ?
धै पृथ्बीरै या क्हि बाहेक ङइ खोब खाबै आरे।
26 ङए सैं नेरो ज्यु ङ्हिंन-ङ्हिंन् भों आरेलै खाँम्,
दिलेया परमेश्वरजी ङए सैंर भों पिंम्
धै खोंयोंन् बिलै ङए चैदिबै सै क्हिन् ग।
27 क्हिउँइँले ह्रेंगो तब्मैं सियाब्मुँ;
क्हिलाइ बिश्वास आलसि पिवाब्मैं क्हिजी नास लम्।
28 दिलेया परमेश्वरने चेंदो तरिब ङए ल्हागिर छ्याँब ग,
याहवेह परमेश्वरए प्हलेर्न ङ ग्वार योंबर खइमुँ।
छतसि क्हिए ताँन् केमैंए बयन ङइ लब्मुँ।