97
याहवेहजी ग्याल्स लम्
1 याहवेहजी ग्याल्स लम्, पृथ्बी सैं तोंरिगे;
मा ङ्युँइर्बै कोंमैं सैं तोंरिगे!
2 खीए कारर्ग्युले न्हाँम्स्यो नेरो मिछु खैब मुँ;
राजगद्दिर टिसि खीजी ठिक केमैं नेरो ठिक निसाफ लम्।
3 खीए ओंसों ओंसों मि ह्यामुँ,
धै खीए कारर्ग्यु मुँबै शत्तुरमैं ख्रोंवाम्।
4 खीए कम्लि-तिम्लिइ ह्युलर चारम्;
पृथ्बीइ म्रोंसि थरथरले त्हारम्।
5 ताँन् ह्युलर्बै क्ल्हे याहवेहए उँइँर
क्योंलों धोंले कोंमैं युलियाम्।
6 खीजी लबै ठिक केमैंए बयन मुइ लम्,
धै खी कति थेब मुँ बिसि ताँन् ह्रेंमैंइ म्रोंम्।
7 कु पूजा लब्मैं ताँन् फापिल् त्हुम्,
कुलाइ थेबै सै ङ्हाँसि फ्योब्मैं ताँन् फापिल् त्हुम्;
छतसि ओ ताँन् देवतामैं, खीए प्हले फ्योद्!
8 ओ याहवेह, क्हिजी ठिक निसाफ लबै ताँ
सियोनर्बै म्हिमैंइ थेसि सैं तोंइमुँ,
धै यहूदार्बै नाँसमैं सैं तोंइमुँ।
9 तलेबिस्याँ ओ याहवेह, ह्युलए फिर ताँन् भन्दा थेबै परमेश्वर क्हिन् म्रुँ ग;
ताँन् देवतामैं भन्दा थेब क्हिन् मुँ।
10 याहवेहने म्हाँया लब्मैं ताँनइ आछ्याँबै केमैं लब पिवारिगे!
तलेबिस्याँ खीजी ह्रोंसए म्हिमैंलाइ रक्षा लमिंम्;
धै दुष्टमैंए योउँइँले चमैं फ्रेमिंम्।
11 ठिक के लब्मैंए फिर परमेश्वरए ह्वे चारम्,
धै छ्याँबै खों प्ह्याब्मैं सैं तोंल् योंब्मुँ।
12 ओ ठिक के लब्मैं, याहवेहने सैं तोंन्,
धै खीए पबित्र मिंर धन्यबाद पिंन्!