105
परमेश्वरजी लबै औदिबै केमैंए बयन लद्
1 याहवेहलाइ धन्यबाद पिंन्, खीए प्हलेर ग्वार ह्रिद्;
अरू ह्रेंमैंए म्हाँजोर खीजी लबै केमैं बिमिंन्!
2 खीए ल्हागिरि क्वे प्रिंन्, खीए मिं थेब् लद्;
खीजी लबै औदिबै केमैंए बयन लद्।
3 खीन् पबित्र मुँ बिसि खीए मिं थेब् लद्;
याहवेहलाइ म्हैब्मैंए सैं तोंरिगे।
4 याहवेहनेरो खीए शक्ति म्हैद्;
खोंयोंन् बिलै खीलाइ म्हैद्।
5 ओ खीए के लबै म्हि अब्रहामए सन्तानमैं
ओ खीजी त्हाँबै याकूबए सन्तानमैं,
6 खीजी लबै औदिबै केमैं मैंन्,
खीजी लबै औदिबै केमैं नेरो खीजी लबै निसाफ मैंन्।
7 खीन् याहवेह ङ्योए परमेश्वर ग;
ह्युल् तिगोंन् खीजीन् निसाफ लम्।
8 खीजी ह्रोंसइ फैबै बाछा खोंयोंन् बिलै मैंरिमुँ,
खीजी बिथेंबै ताँमैं हजार-हजार पुस्तामैंए ल्हागिर ग।
9 च बाछा खीजी अब्राहामने फैइ,
खीजी फैबै बाछा पक्का तम् बिबै ताँर इसहाकने कसम चइ।✡105:9 उत १२:७; १७:८; २६:३
10 “ङजी क्हि कनान ह्युल पिंब्मुँ,
च क्हिए हगर्बै अँश तब्मुँ,” बिसि
11 खीजी याकूबने च क्ह्रोंसेंन्बै निसाफ बनेइ,
छले इस्राएलने खोंयोंन् बिलै तरिबै बाछा खीजी फैइ।✡105:10,11 उत २८:१३
12 कनान ह्युलरि चमैं च्योमरे च्हुगुदे मत्त्रे मुँल,
सारय च्हुगुदे, चमैं आगुए ह्युलर्बै म्हिमैं धों मुँल,
13 चमैं घ्रि ह्युलउँइँले अर्को ह्युलर,
धै घ्रि क्ल्ह्योउँइँले अर्को क्ल्ह्योर स्युर प्ररिमल।
14 दिलेया खीजी चमैंए फिर खाबज्यै या तोइ न्होह्रों लल् आपिंल;
चमैंए ल्हागिर खीजी म्रुँमैंलाज्यै या छ बिसि हौदिइ,
15 “ङइ त्हाँबै म्हिमैंलाइ आछुइद्;
ङए अगमबक्तामैंलाइ तोइ न्होह्रों आलद्!”✡105:14,15 उत २०:३-७
16 खीजी च कनान ह्युलर अङ्गल कुल्मिंइ,
धै चमैंइ प्लुबै प्लुमैं या तोइ म्लोल् आपिं;✡105:16 उत ४१:५३-५७
17 खीजी योसेफ मिं मुँबै म्हि घ्रि चमैंए ओंसों कुल्मिंइ,
च केब्छैं तबर चुँवाल।✡105:17 उत ३७:२८; ४५:५
18 म्हिमैंइ चए प्हलेर कडि फैसि दुःख पिंइ,
धै चए खरिर पैए सँउँलि खिमिंइ।
19 योसेफइ बिबै अगम्बाणि पूरा आतन् समा च झेलर टिइ।
“चइ क्ह्रोंसेंन्बै ताँ पोंइ” बिसि
याहवेहजी ह्रोंसए ताँइ प्रमाण पिंइ।✡105:18-19 उत ३९:२०—४०:२३
20 फारो म्रुँइ म्हि कुलबै लिउँइ झेलर्बै क्रथेइ योसेफलाइ पिवाइ,
छले मिश्र ह्युल म्रुँइ चलाइ छ्याब् आरेब ठर्दिमिंइ।✡105:20 उत ४१:१४
21 फारो म्रुँइ चलाइ खीए ताँन् सै न्होरए जिम्मा पिंसि
खीए धिंर्बै क्ल्हे तल् पिंइ।✡105:21 उत ४१:३९-४१
22 म्रुँए के लबै क्रथे मिंथेमैंलाइ योसेफइ छेनाले लोमिंरिगे
धै म्रुँलाइ ताँ लोमिंब्मैंलाज्यै या ज्ञान-बुद्धि पिंरिगे बिसि छान् लइ।
23 च्हमा याकूब मिश्र ह्युलर ह्याइ;
झाइले इस्राएल हामए ह्युलर*105:23 हामए ह्युल मिश्र ह्युलए अर्को मिं। आगु ह्युलर्बै म्हि धोंले टिइ।✡105:23 उत ४६:६; ४७:११
24 याहवेहजी ह्रोंसए इस्राएली म्हिमैं ल्हें लमिंइ;
धै चमैंए शत्तुरमैं भन्दा चमैं बेल्ले भोंब् लमिंइ।
25 खीजी त्हाँबै म्हिमैंलाइ मिश्रीमैंइ आखोरिगे बिसि परमेश्वरजी चमैंए सैं एमिंइ;
खीए के लब्मैंए बिरोधर राबै सैं चमैंलाइ पिंइ।✡105:24-25 प्रस १:७-१४
26 च लिउँइ याहवेहजी ह्रोंसए के लबै म्हि मोशा
नेरो खीजी त्हाँबै हारून कुल्मिंइ।✡105:26 प्रस ३:१—४:१७
27 चमैंइ मिश्रीमैंए म्हाँजोर खीजी लबै औदिबै केमैं उँइँमिंइ;
छलेन हामए ह्युलर चमैंइ खीए शक्तिए केमैं उँउँइ।
28 खीजी मिछु खैब कुलमा ताँन् ह्युल आचि-म्हाँचि तयाइ,
तलेबिस्याँ खीजी पोंबै ताँमैंए बिरोध चमैंइ लल।✡105:28 प्रस १०:२१-२३
29 खीजी चमैंए ह्युलर्बै स्योंमैं ताँन् को लवाइ,
धै चर्बै ताँगमैं ताँन् सियाइ।✡105:29 प्रस ७:१७-२१
30 चमैंए ह्युल प्हद्गोमैंइ प्लिंयाइ;
चमैंए म्रुँमैं रोबै क्ल्ह्योजरे या प्हद्गोमैंइ प्लिंयाइ।✡105:30 प्रस ८:१-६
31 खीजी पोंब् धोंलेन्
चमैंए ह्युल तोगोंन् च्योमि नेरो मोसोइ प्लिंयाइ।✡105:31 प्रस ८:१६,१७,२०-२४
32 खीजी नाँलाइ तिस्यु लमिंइ,
धै चमैंए ह्युल तिगोंन् काम्लि-तिम्लि रामिंइ।
33 खीजी चमैंए अँगुरए धुँ नेरो तोंबुए धुमैं नास लवाइ
धै चमैंए ह्युलर्बै सिंधुमैं चुवाइ।✡105:32-33 प्रस ९:२२-२५
34 खीजी बिब् धोंले तिरिमैं
नेरो च्योलै आखाँबै नम्ज्योंमैं खइ,
35 नम्ज्योंमैंइ चमैंए ह्युलर्बै ताँन् प्याँ-पिंमैं नेरो
चमैंए म्रोंर्बै रा-रोमैं चवाइ।✡105:34-35 प्रस १०:१२-१५
36 झाइले खीजी चमैंए ह्युलर्बै च्ह थेब नास लवाइ,
चमैंए ओंसों फिबै च्हमैं सैवाइ।✡105:36 प्रस १२:२९
37 मारा नेरो चाँदिने खीजी इस्राएलीमैंलाइ बैरु तेमिंइ,
धै चमैंए न्होंर खाबलै या न्होह्रों आत।
38 चमैं त्होंसि ह्यामा मिश्र ह्युल सैं तोंइ,
तलेबिस्याँ इस्राएलीमैंने चमैं ङ्हिंमल।✡105:37-38 प्रस १२:३३-३६
39 छरि तरिगे बिसि खीजी न्हाँम्स्यो थेंमिंइ,
धै म्हुँइँसर मि म्रोंरिगे बिसि मि पिंइ।✡105:39 प्रस १३:२१-२२
40 चमैंइ चबै सै ह्रिमा खीजी बट्टाइ नमेमैं पिंइ
धै मुर्बै क्हें चमैंलाइ म्रेंन्ले पिंइ।✡105:40 प्रस १६:२-१५
41 खीजी पारा तिवामा क्यु त्होंइ,
क्यु आयोंबै क्ल्ह्योर स्यों धोंले क्यु बगेइ।✡105:41 प्रस १७:१-७; गन्ती २०:२-१३
42 खीजी ह्रोंसए के लबै म्हि अब्राहामने
फैबै पबित्र बाछा चिइ।
43 खीजी ह्रोंसइ त्हाँबै म्हिमैंलाइ सैं तोंन् लदै
जयजय बिदै ओरदै पखइ।
44 खीजी चमैंलाइ आगु ह्रेंमैंए ह्युल पिंइ,
धै अरू म्हिमैंइ दुःख लसि योंबै सैमैं ताँन् चमैंइ क्ल्हे लइ।✡105:44 यहो ११:१६-२३
45 खीजी बिबै निसाफमैं चमैंइ ङिंरिगे,
धै खीए ठिममैं म्हाँदिरिगे बिसिन् चु ताँन् तब् ग।
याहवेहए मिं थेब् लद्!
✡105:9 105:9 उत १२:७; १७:८; २६:३
✡105:11 105:10,11 उत २८:१३
✡105:15 105:14,15 उत २०:३-७
✡105:16 105:16 उत ४१:५३-५७
✡105:17 105:17 उत ३७:२८; ४५:५
✡105:19 105:18-19 उत ३९:२०—४०:२३
✡105:20 105:20 उत ४१:१४
✡105:21 105:21 उत ४१:३९-४१
*105:23 105:23 हामए ह्युल मिश्र ह्युलए अर्को मिं।
✡105:23 105:23 उत ४६:६; ४७:११
✡105:25 105:24-25 प्रस १:७-१४
✡105:26 105:26 प्रस ३:१—४:१७
✡105:28 105:28 प्रस १०:२१-२३
✡105:29 105:29 प्रस ७:१७-२१
✡105:30 105:30 प्रस ८:१-६
✡105:31 105:31 प्रस ८:१६,१७,२०-२४
✡105:33 105:32-33 प्रस ९:२२-२५
✡105:35 105:34-35 प्रस १०:१२-१५
✡105:36 105:36 प्रस १२:२९
✡105:38 105:37-38 प्रस १२:३३-३६
✡105:39 105:39 प्रस १३:२१-२२
✡105:40 105:40 प्रस १६:२-१५
✡105:41 105:41 प्रस १७:१-७; गन्ती २०:२-१३
✡105:44 105:44 यहो ११:१६-२३