130
ङ याहवेहए घ्याँ ङ्ह्योरिम्
कैंडो क्रेबै त्हेर्बै क्वे
1 ओ याहवेह, गैरु क्ल्ह्योउँइँले ङइ क्हिने ग्वार ह्रिइमुँ!
2 ओ याहवेह, ङइ ग्वार ह्रिब थेमिंन्!
ल्हयो खमिंन् बिसि ङइ ग्वार ह्रिब
क्हिए न्हइ थेमिंन्!
3 ओ याहवेह, म्हिमैंइ लबै पापए हिसाब क्हिजी थेंइ बिस्याँ,
ओ प्रभु, क्हिए उँइँर खाब् राल् खामुँ?
4 दिलेया क्हिजी क्षमा पिंम्,
छतसि ङइ क्हिलाइ मान लम्।
5 ङ याहवेहए घ्याँ ङ्ह्योरिम्, ङए सोइ खीलाइ प्रेंरिम्,
धै खीए बचनर ङइ आशा थेंम्;
6 न्हाँग खोंयो तब् ङ्हे बिसि पालेइ न्हाँग ह्रेब् भन्दा ल्हें
ङए सोइ याहवेहए घ्याँ ङ्ह्योरिम्।
7 ओ इस्राएल, याहवेहए फिर आशा थेंन्!
तलेबिस्याँ याहवेजी खोंयोंन् बिलै म्याँया लरिम्,
धै तोंन्दोरि आछ्याँबै सैउँइँले खीजीन् जोगेमिंम्।
8 इस्राएलइ लबै ताँन् पापउँइँले
खीजी फ्रेमिंब्मुँ।✡130:8 मत्ती १:२१; तीत २:१४