145
याहवेह थेब मुँ
याहवेहए मिं थेब् लदै प्रिंबै दाऊदए क्वे घ्रि।
1 ओ ङए परमेश्वर, ङए म्रुँ, ङ क्हिए मिं थेब् लब्मुँ,
ङ खोंयोंन् बिलै क्हिलाइ धन्यबाद पिंब्मुँ।
2 त्हिंइ ह्रोंसे ङ क्हिलाइ धन्यबाद पिंब्मुँ
धै खोंयोंन् बिलै ङ क्हिए मिं थेब् लब्मुँ।
3 याहवेह थेब मुँ, धै थेब् लसि म्हाँदिल् त्हुब मुँ,
खी कति थेब मुँ बिसि खाबज्यै क्होल् आखाँ।
4 क्हिजी लबै केए बयन पुस्ता घ्रिइ अर्को पुस्ताने लब्मुँ,
धै क्हिजी लबै शक्तिए केमैं चमैंइ बयन लब्मुँ।
5 क्हि बेल्ले छ्याँब नेरो म्हारब मुँ बिसि चमैंइ बयन लब्मुँ;
क्हिजी औदिबै केमैं खैले लगे बिसि क्हिजी लबै केमैंए बारेर ङ मैंब्मुँ,
6 क्हिजी लबै औदिबै थे-थेबै केमैंए बारेर म्हिमैंइ बयन लब्मुँ,
धै क्हि कति थेब मुँ बिसि ङज्यै या बिप्रब्मुँ।
7 क्हिजी थे-थेबै छ्याँबै के लब्मुँ बिसि चमैंइ बयन लब्मुँ
धै क्हिजी लबै ठिक केमैंए बारेर क्वे प्रिंदै जयजय लब्मुँ।
8 याहवेहजी दयाम्हाँया लमुँ धै ल्हयो खमुँ,
खी युनन् ह्रिस आख, धै खोंयोंइ आनुबै म्हाँया लम्।
9 याहवेहजी ताँनए फिर छ्याँब लम्,
ह्रोंसजी बनेबै तोन्दोंरि सैमैंए फिर ल्हयो खमुँ।
10 ओ याहवेह, क्हिजी बनेबै तोन्दोंरि सैमैंइ क्हिलाइन धन्यबाद पिंब्मुँ,
धै क्हिए म्हिमैंइ क्हिए मिं क्वेब्मुँ!
11 ताँन् म्हिमैंइ क्हिजी लबै शक्तिए केमैं था सेरिगे,
धै क्हिए ग्याल्सर्बै छ्याँ-छ्याँबै म्हारबै सैमैं म्रोंरिगे बिसि
12 क्हिए म्हिमैंइ क्हिए ग्याल्सर्बै छ्याँ-छ्याँबै ताँमैंए बयन लब्मुँ,
धै क्हिजी लबै शक्तिए केमैं बिब्मुँ।
13 क्हिए ग्याल्स खोंयोंन् बिलै तरिबै ग्याल्स ग,
पुस्ता-पुस्ता समा क्हिजी क्ल्हे लरिब्मुँ।
याहवेहजी फैबै ताँन् बाछामैं भर लल् खाँब मुँ,
ह्रोंसइ बनेबै तोन्दोंरि सैलाइ खीजी म्हाँया लम्।
14 क्हुरियाब्मैं ताँनलाइ याहवेहजी ल्होमिंम्;
आगुइ प्लेथेंब्मैं ताँनलाइ खीजी रेमिंम्।
15 सो प्ह्याबै तोन्दोंरि सैमैंइ क्हि ङाँइन ङ्ह्योम्,
धै चमैं फो ख्रेंमा क्हिजी चबै सै पिंमुँ।
16 क्हिजी यो प्ल्हसि तोन्दोंरि सै पिंमुँ;
धै ताँन् सो प्ह्याबै सैमैंए सैंर मैंब योमिंब्मुँ।
17 याहवेहजी लबै तोन्दोंरि केमैं ठिक मुँ,
धै ह्रोंसइ बनेबै तोन्दोंरि सैमैंलाइ म्हाँया लम्।
18 याहवेहए मिं किंब्मैं ताँनए चेंदों खी तरिम्,
क्ह्रोसेंन्बै छ्याँबै सैंइ खीए मिं किंब्मैं ताँनए चेंदों खी तरिम्।
19 खीने बालु ङ्हिंब्मैं ताँनए सैंर मैंब खीजी पूरा लमिंम्;
चमैंइ हुइब खीजी थेमुँ धै चमैंलाइ जोगेमिंम्।
20 खीए फिर म्हाँया लब्मैं ताँनलाइ याहवेहजी रक्षा लमिंम्,
दिलेया दुष्टमैं बिस्याँ खीजी नास लवाब्मुँ।
21 ङए सुँइ याहवेहए मिं थेब् लसि पोंब्मुँ।
सो प्ह्याबै तोन्दोंरि सैमैंइ खोंयोंन् बिलै खीए पबित्र मिं थेब् लरिगे।