150
ङ्हेबै सैमैं ह्रासि याहवेहए मिं क्वेरिगे।
1 हल्लेलूयाह!* 150:1 अथवा “याहवेहए मिं क्वेद्!”
खीए पबित्र क्ल्ह्योर याहवेह मिं क्वेद्;
खीजी बनेबै मु बेल्ले थेब् तब् म्रोंसि खीए शक्तिए बयन लद्!
2 खीजी लबै थे-थेबै केमैंए बारेर खीए मिं क्वेद;
खी बेल्ले थेबै परमेश्वर ग, छतसि खीए मिं क्वेद्!
3 क्युए रु ह्रासि खीए मिं क्वेद्;
बीणा नेरो सारङ्गी ह्रासि खीए मिं क्वेद्!
4 खैंचडी ह्रासि सेदै खीए मिं क्वेद्;
बीणा-सारङ्गीं नेरो मुराली ह्रासि खीए मिं क्वेद्!
5 छिनिमिनि ह्रासि खीए मिं क्वेद्;
बेल्ले कोल्ले छ्योंलो ह्रादै खीए मिं क्वेद्!
6 सो प्ह्याबै ताँन् सैमैंइ याहवेहए मिं क्वेरिगे!
हल्लेलूयाह! याहवेहए मिं थेब् लद्!