1 झाइले च प्‍हेल ङि छेबै स्‍वर्गदूत ङि न्‍होंर्बै घ्रि ङ ङाँर खसि बिइ, “छुइ खो, ङइ क्हिलाइ च मिं चल्‍दिबै फ्यालुस्योइ*17:1 च मिं चल्‍दिबै फ्यालुस्यो चए मतलब बेबिलोन सहर - पद ५ नेरो १८ ङ्ह्‍योद्। खैबै सजैं योंम् बिसि उँइँमिंस्‍यो। च सहरए कार्ग्युले ल्हें स्योंमैं मुँ।✡17:1 यर ५१:१३ 2 पृथ्‍बीर्बै ताँन् म्रुँमैं च फ्यालुस्योने टिइमुँ। धै ह्‍युलर्बै म्‍हिमैं या च फ्यालुस्योनेन् ब्यभिचार लसि प्हा थुँब् धोंले म्हेरइमुँ।”✡17:2 यशै २३:१७; यर ५१:७

3 झाइले ङ पबित्र प्ल्हए न्होंर मुँमा च स्‍वर्गदूतइ क्यु आयोंबै क्ल्ह्‍योरि ङलाइ क्‍हासि बोइ। चर च्हमिरि घ्रि ओल्‍ग्‍या खेदो फिर क्हुँरिब् ङइ म्रोंइ। च खेदोए ज्यु तिगोंन् परमेश्‍वरए आब्रु वाबै ताँमैं प्‍ह्रिथेंल, धै चल क्र ङि नेरो रुँ च्‍यु मुँल।✡17:3 दर्शन १३:१ 4 च च्हमिरिइ कलाँजी रङर्बै क्‍वें नेरो ओल्‍ग्‍या क्‍वें खिल, धै चइ माराए घानामैं नेरो सै ल्हें फेबै सकलि तुथुमैं पैरेल। चए योर्बै माराए प्‍हेल चइ लबै ब्यभिचारए केमैंइ प्‍लिंल।✡17:4 यर ५१:७ 5 च च्हमिरिए ङ्‌होर मिं घ्रि प्‍ह्रिल। च मिंए अर्थ “थेबै बेबिलोन सहर, अथवा पृथ्‍बीर्बै आछ्याँबै ब्यभिचार लबै ताँन् फ्यालुस्योमैं नेरो छेरन ङ्हाँबै के लबै ताँन् म्‍हिए आमा चुन् ग बिब् मुँल।” 6 झाइले च च्हमिरिइ परमेश्‍वरए म्‍हिमैंए को नेरो येशूए ल्हागिर सिब्‍मैंए को थुँसि म्हेरब ङइ म्रोंइ।

च म्रोंसि ङ प्लेटोयाइ। 7 दिलेया स्‍वर्गदूतइ ङने बिइ, “क्‍हि तले प्लेटोयाल? ङइ क्हिने च फ्यालुस्योलाइ नोबै क्र ङि नेरो रुँ च्‍यु मुँबै खेदोए अर्थ खोल्‍दिमिंस्‍यो। 8 च खेदो ओंसों मुँल, दिलेया तोगो आरे। च बेल्‍ले गैरु क्रोंउँइँले त्होंब्मुँ, झाइले नास तयाब्‍मुँ। धै ह्‍युल बनेब् भन्दा ओंसों छ्ह योंब्‍मैंए मिं प्‍ह्रिथेंबै कितबर मिं आरेब्मैं च खेदो म्रोंसि प्लेटोयाब्‍मुँ। तलेबिस्याँ च खेदो ओंसों सोगों मुँल, तोगो आरेलेया धबै सोसि खब्मुँ।✡17:8 दान ७:७; दर्शन ११:७; भज ६९:२८

9 “क्होबै म्हिमैंइ मत्‍त्रे चु ताँ क्‍होल् खाँम्: च क्र ङिए अर्थ कों ङि ग, धै च कों ङिए फिर च च्हमिरि†17:9 च कों ङिए फिर च च्हमिरि चए गुप्‍त मतलब रोम बिबै थेबै सहर, अथवा रोमी सरकार, तलेबिस्याँ रोम सहर कों ङिए फिर बेनल। क्हुँमुँ। झाइले च क्र ङिए अर्को मतलब म्रुँ ङि‡17:9 म्रुँ ङि मतलब, रोम सहरर्बै पलो पलो ग्याल्स लबै थेबै म्रुँ ङि। ग। 10 चमैं न्होंरि म्रुँ ङ्‌हए पलो तल् खाँइ, म्रुँ घ्रिइ अझै ग्याल्स लसिन् मुँ, ङिखेबै म्रुँल अझै पलो आखइमुँ। च म्रुँ खसि तिस्याँदे मत्‍त्रे ग्याल्स लल् योंब्‍मुँ। 11 झाइले ओंसों सोगों मुँब दिलेया तोगो सियाबै खेदो प्ह्रेखेबै लार्बै म्रुँ ग। चु म्रुँ ङि न्‍होंर्बै घ्रि ग, दिलेया च नास तयाब्‍मुँ।

12 “क्‍हिइ म्रोंबै रुँ च्‍युए अर्थ च्‍योंबै म्रुँ च्‍यु ग। चमैंइ तिंयाँ समा ग्याल्स लल् आयोंइमुँ, दिलेया चमैंइ च खेदोने बालु घण्टा घ्रिए ल्हागिर ग्याल्स लल् योंब्‍मुँ।✡17:12 दान ७:२४ 13 च म्रुँ च्‍युए सैं घ्रिन् तसि खेंमैंए ग्याल्सए हग नेरो भों च खेदोलाइ पिंब्मुँ। 14 चमैंइ क्‍यु च्हजए बिरोधर ल्हडें लब्‍मुँ। दिलेया क्‍यु च्हज नेरो खीजी हुइसि त्‍हाँबै बिश्‍वास लबै म्‍हिमैंइ चमैंलाइ ट्होवाब्‍मुँ, तलेबिस्याँ खी प्रभुमैंए फिर्बै प्रभु नेरो म्रुँमैंए फिर्बै म्रुँ ग।”

15 झाइले च स्‍वर्गदूतइ ङने बिइ, “च फ्यालुस्यो मुँबै सहरए कारर्ग्युबै स्योंमैं क्‍हिइ म्रोंइमुँ वा? चमैंए अर्थ स्यो-स्यो ह्‍युलमैं, स्यो-स्यो म्‍हिमैं, स्यो-स्यो ह्रेंमैं नेरो स्यो-स्यो क्युइमैं ग। 16 क्‍हिइ म्रोंबै च रुँ च्‍यु§17:16 रुँ च्‍यु मतलब, म्रुँ च्‍यु मुँबै खेदोइ च फ्यालुस्योलाइ हेल लब्मुँ, धै चने मुँबै ताँन् सैमैं प्हेंवासि चलाइ क्‍लुना लवाब्‍मुँ। चमैंइ चए से चब्‍मुँ, झाइले चलाइ मिर झोंवाब्‍मुँ। 17 तलेबिस्याँ च म्रुँमैं च्‍युलाइ परमेश्‍वरजी छाबै के लबै सैं पिंइ: परमेश्‍वरजी बिबै ताँ ताँन् आतन् समा च खेदोइ ग्याल्स लरिगे बिसि चमैंइ ताँन् सैं घ्रिले खेंमैंए ग्याल्स लबै भों च खेदोलाइ पिंब्मुँ।

18 “क्‍हिइ म्रोंबै च्हमिरि थेबै सहर ग, चइ पृथ्‍बीर्बै ताँन् म्रुँए फिर ग्याल्स लम्।”