Totuyoyowo adi lovina
Yaubada ina Katukeda ana kabikáwana manuna
Yaubada ina Katukeda ana kabikáwana manuna
15
(Guinuwa 15:1-35)
Aumakimaki Yaubada ina Katukeda
ana kabikáwana manuna
ana kabikáwana manuna
1 Paulo be Banabasi sikaaiyaka go, koroto maniyedi Yudiya goi sisou sima Antiyoki goi. Korotoyadi Diyuu nuumisaidi go, sima Totuyoyowo nuumisaidi Antiyoki goi sivatulukoidi sidigo kadi,
‘Sakavaimi kokupōidi nakae Mosese ina sinapu,† Vin 12:3. govila bei ami yava geya kobabaneyeta.’
2 E idi livala Paulo be Banabasi sinove, tuwo korotoyadi taiyao sikaumakimaki gagaina be nakae sivabobolagu. Tauna Yeisu ina tonumisayao Antiyoki goi Paulo, Banabasi be nakae sediyao maniyedi taiyao sikinavedi situko sina Yerusalema goi bei ame aumakimakiyana manuna sivatétala Tomoya ina vamoleyanayao be nakae ana totugugunayao adi tomoyamoyayao taiyao. Nakona idi vatetalayana goi bei silovina.
3 Tauna Tomoya ana totugugunayao Antiyoki goi sivakinaredi ikavava, sina Yerusalema go, sinonoina Poinike ana dadava goi be nakae Samériya ana dadava goi sisiu sivanibiníbita Tomoya ana totugugunayao idi gúguna tamo tamo yaidi goi sivatetelidoko Totuyoyowo manakaedi Yeisu bogina sinumise. Tauna idi vatétala pasina sediyao nuumisaidi liliudi siuyáwana gagaina. 4 E situko sina Yerusalema goi kidi Tomoya ana totugugunayao, ina vamoleyanayao be nakae ana totugugunayao ana tomoyamoyayao siuyaonedi. Ikavava, Paulo kidi sitalavaita kaga liliuna boi Yaubada nimadi goi iguuinuwedi. 5 Go Parisi maniyedi nuumisaidi idi boda yaidi goi sitaoya, sidigo kadi,
‘Itoboine Totuyoyowo nuumisaidi sakavaidi takupoidi be nakae talovinaedi Yaubada ina Katukeda boi Mosese iivinida sikabikaone.’
6 Tuwo Tomoya ina vamoleyanayao be nakae ana totugugunayao adi tomoyamoyayao situgúguna bei ame nuwonuwanayana sibobore. 7 E nuwonuwanayana pasina sikaumakimaki gagaina. Ikavava, Pita itaoya, idigo kana,
‘Segowo, komi bogina koyagoi bego kita yaida goi Yaubada bogina ikinavegu bei sopagu goi Totuyoyowo yaidi Vala Dedevina sinove, e sinumise.† Gui 10:1-43. 8 Yaubada, Tauyana nuwoda bogina iyaagoidi, Totuyoyowo ikamoitamoedi bego kidi ina bodao tutayana Baloma Kimaasabaina ivinidi boi kita nakae ivinida.† Gui 10:44, 2:4. 9 Ivatulukoida bego kina matana goi kita Diyuu be kidi Totuyoyowoyadi tavavasa ame nakae: Atedi inikidi idi numisa pasina boi nakae kita ida numisa pasina ateda inikidi.
10 Tauna kaga unana Yaubada kovakakone? Neta Totuyoyowoyadi idi numisa pasina bogina iuyaonedi go, manakae? Komi latuwomi Yaubada ina Katukeda ana lovina tauyadi sikabikaonedi bego Yaubada iuyaonedi? Iyaa! Lovinayadi moe mou tayamo Tomoya ina tovatotowanayaoyadi yaidi goi bego sikavale go, kita be nakae tubudao geya itoboinedeta mouyana takavale! Neta nakae koguinuwe, Yaubada kovaakakone, bei gamona igoyo. 11 Lovinayadi adi kabikáwana goi ada yava geya tababaneyeta, go sem kita tanumisa bego ida Tomoya Yeisu ina kanuwóiya goi ada yava tababane. Kidi Totuyoyowo tauna nakae; Yeisu ina kanuwoiyayana goi adi yava sibabane.’
12 E boda madabokina situgau, tuwo Banabasi be Paulo sitaiyaakekedi tutayana silumavívita Yaubada manakaena iepaisewedi aba kinana kainaaopaidi siguinuwedi Totuyoyowo yaidi.
Yemesa ina lovina Yaubada ina Katukeda
ana kabikáwana manuna
ana kabikáwana manuna
13 E tutayana sibóbwara ikavava, Yemesa itaoya, idigo kana,
‘Segowo, konovēgu! 14 Saimoni‡ Saimoni: Ame tauyana youyuwoina moe Pita. bogina ilumavívita Yaubada manakaena Totuyoyowo igiminuwonuwonedi bego maniyedi yaidi goi ikinavedi toinina ina bodao. 15 Saimoni ina lumavivitayana Yaubada ina tokabivalavala tayamo ina livala ikamoitamoe bego ame dogoiyana bei isowóduwo. Tauyana Yaubada ina livala itaalavaite, idigo kadi,
16 “ ‘Niga bei akaluvilamna ama
bei aguinuwe ame nakae:
Devida ina kalibúbuna vada nakae
bogina itagayagaya go,
bei ayowomnei.
Vadayana bogina idáura go,
bei ayowo vau.
17 Moe nakae aguinuwe,
e bei tomota kesakesaidi itoboinedi
yau Yauwe sibabanegu.
Nakae Totuyoyowo neta bogina avayokoidi
yau guna kitomyao
bei itoboinedi sibabanegu’,
Yauwe kaena.
Ame dogoiyadi Tauyana bei iguinuwedi.”
Emosi 9:11-12
18 Ame guinuwayadi boi nimatu go, ima ame tuta tomota bogina siyagoidi.† Ais 45:21. 19 Tauna yau alovina ame nakae: Ava Totuyoyowova neta situgavila go, Yaubada simeko, mou geya tavinidita bego kita Diyuu ida sinapu sikabikaonedi, 20 go sem adi leta tagīni taetūne ina kidi tasanabodedi ame nakae: Awoinu kaasalaidi yaubada polapola yaidi†a Tat 34:15-17. taabu sikakāika. Aiyuwoina masisi goyogoyoina taabu siguuinūwe.†b Vin 18:6-23. Aitonina yoguyogu ma ikaikaidi taabu sikakāika. Aivasina ikaika taabu sinimnīm.†c Vin 17:10-16. Ame sinapuyadi itoboinedi sitotoidi. 21 Moitamo nakae itoboine. Boi nimatu go, ima ame tuta Yaubada ina Katukeda ana totalavaitayao asa tamo tamo goi sikaaiyaka unana Atukedayana Sabati tamo tamo idi kaba tugúguna goi sikaatuyaivi, e tomota siinovedi.’
22 Tuwo Yemesa ibóbwara ikavava, e kidi Tomoya ina vamoleyanayao be nakae ana totugugunayao madi tomoyamoyayao liliudi silovina sidigo kadi,
‘Itoboine neta koroto yaida goi takinavedi bei taetunedi Paulo be Banabasi taiyao sina Antiyoki.’
Tuwo koroto adi taiyuwo sikinavedi, korotoyadi yoidi Yudasa, tauyana youyuwoina moe Basabasi, be Sailasi. Korotoyadi tovakumgo Tomoya ina tonumisayao yaidi. Sikinavedi ikavava, Paulo be Banabasi taiyao sietunedi sina Antiyoki. 23 Ego leta tayamo sigini bego Yudasa be nakae Sailasi itoboinedi sinave. Letayana ame nakae kadi,
‘Kai Tomoya ina vamoleyanayao be nakae sedao adi tomoyamoyayao leta ame kagini kaetune iwo komi semao Totuyoyowo nuumisaimi Antiyoki goi be Siriya goi be nakae Silisiya goi yaimi. Uyama.
24 Livala bogina kanove bego Diyuu nuumisaidi maniyedi yaima goi bogina siwo sivatulukoimi go, idi vatulukwanayana pasina atemi siyova be nakae nuwomi sitúkala. Go geya kaetunedita siwo, go sem moe toinidi idi nuwonúwana goi siwo. 25 Tauna dogoiyana manuna bogina katugúguna. Kai nuwoma tayamo goi kalovina kama,
“Itoboine neta koroto maniyedi takinavedi ida kaloyao Banabasi be Paulo taiyao taetunedi sina yaidi.”
26 Kidi Banabasi be Paulo yawoidi bogina sikasaledi‡ Sikasaledi: Ame livalayana maniyedi Buki Kimaasabaina kadi, ‘Sinuwoupa.’ ida Tomoya Yeisu Guyau yaina. 27 Nakae kalovina, tauna koroto adi taiyuwo bogina kakinavedi kaetunedi siwo; korotoyadi moe Yudasa be Sailasi. Tauyadi bei silatuwokoimi nakae kaga leta ame goi kagini. 28 Moitamo. Baloma Kimaasabaina kai taiyao ima nuwonúwana bego mou gagaidi geya kavinimita, go sem kanuwonúwana lovina ame to kokabikaonedīmo:
29 Awoinu kaasalaidi yaubada polapola yaidi taabu kokakāika.
Aiyuwoina ikaika taabu konimnīm.
Aitonina yoguyogu iwoina ma ikaikaina taabu kokakāika.
Aivasina moe masisi goyogoyoina taabu koguuinūwe.
Neta sinapu ame nakae kototoidi, e komi imi guinuwa bei dedevina.
Ame tauna ima nuwonúwana.’
Paulo ma senao Yemesa ina leta
sinave Tomoya ana totugugunayao
idi gúguna tamo tamo sivatulukoidi
sinave Tomoya ana totugugunayao
idi gúguna tamo tamo sivatulukoidi
30 Tauna nakae tauyadi sietunedi sisou sina Antiyoki goi Tomoya ana tonumisayao sikaunokunokudi sima, e letayana sivinidi. 31 E letayana sikabi, sikatuyaivi ikavava, siuyáwana unana letayana atedi ivapatupatudi.
32 E kidi go Yudasa be Sailasi adi taiyuwo nakae Yaubada ina tokabivalavalayao. Tauna tauyadi idi livala maanawena goi tonumisayao atedi sivapatupatudi be nakae sikitogagedi. 33-34 E adi taiyuwokova sikaaiyaka aaa, kidi sediyao sivaduduwedi kadi,
‘Yaubada ina tuboina yaimi.’
Ikavava, adi taiyuwokova sikaluvilamna sina adi toetunayao yaidi.‡ Nakona tomwana 34 Luke geya iginiyeta, go sem tokaidámana tayamo toinina ina nuwonúwana iyato. Tokaidamanayana igini kana, ‘Ago Sailasiyana ilovina bego amoko goi ikaiyaka.’ 35 E kidi go Paulo be Banabasi Antiyoki goi sikaaiyaka, sediyao nuumisaidi badabadaidi taiyao Tomoya Valena sivatulúkwana be nakae sitalavaite.
Paulo ilovina bego ina Tomoya ana totugugunayao
idi gúguna tamo tamo ivadademneidi
idi gúguna tamo tamo ivadademneidi
(Guinuwa 15:36—16:5)
Paulo be Banabasi
situmasaba aumakimaki pasina
situmasaba aumakimaki pasina
36 E maliyalina maniyedi mlidi Paulo Banabasi ilatuwoko idigo kana,
‘Takaluvīla tāna asa tamo tamo boi Tomoya valena bogina tataalavaite, e ana tonumisayao tavadadēdi tagitēdi tauyadi idi numisa nakonakae.’
37 E kina go Banabasiyana idigo kana,
‘Dedevina tāna, go latuwogu Iyoni takabi taiyao tana.’
Iyoniyana youyuwoina moe Maki. 38 Go kina Pauloyana ikatae idigo kana,
‘Geya. Tauyana boi Pampíliya goi ikalaveda, e geya ivaitedeta bego ida paisewa talukavave. Tauna tauyana geya takabiyeta, go sem ikaiyaka.’† Gui 13:13.
39 E moeko goi aumakimaki gagaina isowóduwo, tauna adi taiyuwo situmasaba. Tuwo Banabasi itaoya, Maki ikabi, siiwo sina oga sisowoya sikailova sina simla Saipiro. 40 E kina go Pauloyana itaoya, Sailasi ikinave go, kidi sediyao nuumisaidi Antiyoki goi sikasaledi Tomoya yaina bei ikanuwoiyedi idi paisewa manudi. 41 E tuwo adi taiyuwokova sitaoya sina Siriya parovinsi goi be Silisiya parovinsi goi sivanibiníbita Tomoya ana totugugunayao sikitogagedi.
†15:1 Vin 12:3.
‡15:14 Saimoni: Ame tauyana youyuwoina moe Pita.
†15:18 Ais 45:21.
†b15:20 Vin 18:6-23.
†c15:20 Vin 17:10-16.
‡15:26 Sikasaledi: Ame livalayana maniyedi Buki Kimaasabaina kadi, ‘Sinuwoupa.’
‡15:33-34 Nakona tomwana 34 Luke geya iginiyeta, go sem tokaidámana tayamo toinina ina nuwonúwana iyato. Tokaidamanayana igini kana, ‘Ago Sailasiyana ilovina bego amoko goi ikaiyaka.’